কুলিজকুরাআ কামি 2

সাকরাত রাঃআ মাহা রে রীলামালা আত্মা রাঃআ হিচু

1নিয়া তায়মতে ড়েলিমাহা হুলাং ইহুদি কুরাঃআ সাকরাত পরব ভোজ রাঃআ তায়ম সাকরাত মাহা কে সাকরাত রাঃআ মাহা গামেয়াকু। মাহা সেটেরানা, ইঙ্কূ যতচ মিৎ মনেতে, মিৎ থাংরে হুন্ডিয়েনন্তেকু বিন্তিরে তাহিনকেনাকু।1 2ইন্তং আচকাগে নিরালা হাতেন কুঠিন জোরতে হয়অ রাঃআ সাডি লেকা সাডি হিচেনা, অকা অড়ারে ইঙ্কূ দুবলেনাকু, ইনা অড়া রাঃআ যত থাংরে ইনা পাসরায়না। 3হেৎদ আলাং লেকা নেলতে এনকান গাদা সেঙ্গেলরাঃআ এলাং ইঙ্কূ নেল নামকেৎয়াকু হেৎদ ইনাকু ইঙ্কূ মিমিৎ কুরাঃআ চেতাংরে হিচ সেটেরেনা। 4ইনাতে ইঙ্কূ যতচ রীলামালা আত্মাতেকু পেরেজেনা হেৎদ আত্মা অকয়কে চিল্কা চিল্কা জাগারতে গামরাঃআ দাড়ি এমকেৎকুয়ায়্য়, এনকাগে ইঙ্কূ এটা এটা জাগারতে থুতি গাম এহব কেৎয়াকু। 5ইনা হুলাং যীরুশালেম শেহার রে বাসায়ান ইহুদিকু রাঃআ হেৎদ নিরালা রাঃআ লাতাররে মিমিৎ জাতি হাতেন হিচাকানা কু ঈশ্বর রাঃআ হড়, এনথাংরে তাহিন কেনাকু। 6ইনা নানান হুনার জাগার আয়ুম কাতে এনথাংরে গাদাকু হুন্ডিনাকু হেৎদ ইঙ্কূ যতচ গে কুঠিন হায়কাটেনাকু, চিয়াচি যতচ ইঙ্কূ আপান আপিন রাঃআ জাগারতে ইঙ্কূয়া থুতি গাম আয়ুমকেৎ কুয়াকু। 7ইন্তং যতচ কুঠিনগে হাহাড়া হেৎদ হায়কাটকাতে গাম লাগায়নাকু, নিকু যে হড়কু থুতি গামে তানাকু নিকু যতচ কি গালিলিয় রিঙ্কূ লহয় তানাকু? 8এন্খান আবু চিল্কাতে আবুয়া নিজে মাই জাগার রাঃআ জাগারতে ইঙ্কূয়া থুতি গাম আয়ুম তাৎ কুয়াবু? 9পার্থীয়, মাদীয় হেৎদ এলমীয় হড় হেৎদ মেসোপটেমিয়া, ইহুদিয়া মুলুক হেৎদ কাপ্পাদকিয়া, পন্ত হেৎদ এশিয়া মুলুক। 10ফুরুগিয়া হেৎদ পামফুলিয়া, মিশর হেৎদ লুবিয়া মুলুক রাঃআ কুরিনীয় রাঃআ কাতারে তাহিয়ান হেৎদ রোম শেহার মুলুক রিঙ্কূ বাসিন্দাকু। 11ইহুদি হেৎদ ইহুদি ধরমরে ধরমাতাঙইচকু হেৎদ ক্রীতীয় হেৎদ আরব রিঙ্কূ বাসিন্দা যে আবু, যতচ আপান আপিন জাগারতে ঈশ্বর রাঃআ হাহাড়া হেৎদ বুগিন কামি রাঃআ থুতি ইঙ্কূয়া মচা হাতেন আয়ুম তাৎআবু। 12নিয়া যত নেলকাতে ইঙ্কূ যতচ হাহাড়া হেৎদ বরকাতে মিহুড় এটাগিচ কে গাম লাগায়নায়, নিয়াকু রাঃআ মানে কিনা? 13অট এটাকু লান্দাকাতে গাম লাগায়নাকু নিকু মাৎকম রাঃআ রস নুঃউ কাতে বুলাকানাকু।

পিতর রাঃআ গাগাম

14ইন্তং পিতর গেলে মিৎ কুলিচকু লঅ তিঙ্গুয়েন্তে জোরতে কিকিচ কাতে ইঙ্কূয়া দিশা কাতে গামকেৎয়ায়্য়, এ ইহুদি হেৎদ যিরুশালেম শেহার রিঙ্কূ বাসিন্দাকু, আপেয়া নিয়া রাঃআ অর্থ সারি জরুর তানা, ইনাতে আপে ইঞা থুতি মনতে আয়ুমেপে। 15চিয়াচি আপে কিনা আটকারে তানাপে ইনা দ লহয়, নিকু হড়কু যাহায় বুল-ভূতুড়াঙ লহয়, চিয়াচি নাহা এখেন সেতা বাসিয়ামা (নয় টাড়াঙ) কানা। 16মেন্খান নিয়াটা ইনা ঘটনা তানা, অকা বাবত তে যোয়েল ভাবি জাগারিজ গামতাৎআয়,2 17"মুচাৎ মাহা রে এনকা হুইওয়া, ঈশ্বর গামেয়ায়, ইঞ যতচ মান্মি রাঃআ চেতাংরে ইঞা আত্মা দুলেয়াইঞ, ইনাতে আপেয়া কড়াহন হেৎদ কুড়িহনকু ভাবি জাগার গামেয়াকু, আপেয়া জুয়ানকু ভেট নামেয়াকু হেৎদ আপেয়া হাড়াম-বুঢিকু হঅ কুকুমু নেলেয়াকু। 18অট ইনা হুলাংকুরে ইঞ ইঞা মুনিশ হেৎদ মুনিশ কুরাঃআ চেতাংরে ইঞা আত্মা দুলেয়াইঞ, হেৎদ ইঙ্কূ ভাবি জাগার গামেয়াকু। 19ইঞ নিরালা চেতাংরে নাআহানা আদভূত লক্ষণ হেৎদ লাতার ধার্তিরে নাআহানা চিহ্না, মায়ম, সেঙ্গেল হেৎদ শুকুলরাঃআ রিম্বিল উদুয়াপেয়াইঞ। 20প্রভু রাঃআ ইনা মাপরাং হেৎদ বিশেষ মাহা রাঃআ হিচু মাড়াঙতে বেলা নুম্বাগোআয় হেৎদ চাঁনডু মায়ম লেকা আরাচাবাআ। 21হেৎদ এনকা হুইওয়া, যতচ অকয় প্রভু রাঃআ নুতুমতে রাঃআয়াকু, ইঙ্কূ রুক্ষীয়া নামেয়াকু। 22এ খেরোয়াল রিঙ্কূ হড়কু নিয়া থুতি আয়ুমেপে। নাসরত রিনিজ যীশু হাহাড়া, পরাক্রম হেৎদ বুগিন কামিরাঃআ চিহ্না হরকাতে আপেয়া হান্ডে ঈশ্বর রাঃআ হাতেন প্রমাণিত মান্মি, ইনি রাঃআ মাধ্যমতে ঈশ্বর আপেয়া তালারে নিয়া যত কামি তাৎআয়, চিল্কা আপে যতচ সারিয়াপে, 23ইনিকে ঈশ্বর রাঃআ মাড়াঙ পরিকল্পনা লেনায় হেৎদ আকেল লেকাতে সম্পা হুইলেনায় হেৎদ আপে ইনিকে অধার্মিক কুরাঃআ দ্বারায়তে ত্রুশরে হাকা কাতে গয়চ লিয়াপে। 24ঈশ্বর গজঃঅ জ্বলান লাড়েচ কাতে ইনিকে গজঃঅ হাতেন রাকাব তিইআয়, চিয়াচি ইনিকে সাব দঃহঅ গজঅ রাঃআ সাধ্য কাঃআ তাহীনকেনা।3 25চিয়াচি দায়ুদ রাপাজ ইনি রাঃআ বাবদতে গামতাৎআয় "ইঞ প্রভুকে হার মাহা ইঞা সামাংরে নেলিকেনাইঞ, চিয়াচি ইনি ইঞা মান্ডি তিহি দররে মেনাইয়া, যেন ইঞ আলঞ আকা পাকা কাইঞ। 26নিয়া নাতিনাং ইঞা মন কুশিআয় হেৎদ ইঞা আলাং সারাও মান্তেয়ায়, হেৎদ ইঞা হড়মোহঅ আশারে বাসাআয়। 27চিয়াচি আম ইঞা জিউ পাতাল পুরিরে কাম বাগি তুকায়া, হেৎদ নিজেরাঃআ রীলামালা হড়কে ক্ষয় কায় নেল দাড়িকুআয়। 28আম ইঞকে জিউরাঃআ হরা উদুতিঞআম, আমা মেৎ মুহাড়তে ইঞকে কুশিতে পেরেজিঞাম।4 29হাগাইঞকু, ইনি মুশিঞ রিনিজ কূল হাপড়াম দাউদ রাপাজ রাঃআ বাবত তে ইঞ জোরকাতে গাম দাড়িআইঞ যে, ইনি গয়চাকানায় হেৎদ ইনিকে কবর এম হুইয়াকানায়, হেৎদ ইনি রাঃআ কবর তিহিঞ যাকিৎ আবুয়া তালারে (1 রাপাজ) 30এন্তে, ইনি ভাবি জাগারিজ তাহিন কেনায় হেৎদ সারিকেনায়, ঈশ্বর দিব্যি কাতে নিয়া এক্ড়ার করালাৎ আয় যে, ইনি রাঃআ কূল রিনিজ মিহুড়কে ইনি রাঃআ কূলাসন রে দুবিআয়, 31হেৎদ ইনি খ্রীষ্টরাঃআ গচ হাতেন জীউৎ রাঃআ বাবত তে নিয়া থুতি গামলাৎ আয় যে, ইনিকে পাতাল পুরিরে কায় বাগি তুকা কানায়, ইনি রাঃআ হড়মো কা শয়াআ।5 32নিই যীশু কেগে ঈশ্বর গয়চ হাতেন রাকাবতিয়ায়, আবু যতচ অকয় রাঃআ লুকুন্দী তানাবু। 33এন্তে, আপে অকা নেলতাৎ আপে হেৎদ আয়ুমতাৎ আপে, ইনা নিয়াতানা, যে, ঈশ্বর রাঃআ মান্ডি তিহি দররে রাকাবঅ রাঃআ তায়মতে হেৎদ এক্ড়ার লেকাতে বাঃ রাঃআ হাতেন রীলামালা আত্মা আতাং হাতা তায়মতে, যিশু কে ইনি ইনা আইদারী দুল তাৎআয়। 34চিয়াচি রাপাজ দাউদ সেরমাতে কায় রাকাবা কানায়, মেন্খান নিজে নিয়া থুতি গামতাৎআয় "প্রভুঈশ্বর ইঞা প্রভু কে গামা কিয়াআ, আম ইঞা মান্ডি তিহি দররে দুবমে, 35চিমিন ভুর ইঞ আমা বাইরিকুকে আমা কাটা দঃহ রাঃআ জায়গা কাইঞ বানহাআ।6 36খেরোয়ালকু রাঃআ যত কূল নিশ্চিত সারিপে যে, অকয়কে আপে ত্রুশরে হাকা লিয়াপে, ইনি যীশু কেগে ঈশ্বর প্রভু হেৎদ খ্রীষ্ট বারানকিন কেগে করাতিৎ ইয়ায়।7

আপি জুলু হড় মন্ডলীরে খন্জা য় নাকু

37নিয়া থুতি আয়ুমকাতে ইঙ্কূয়া অন্তর কুঠিন আঘাত লাগায়না, হেৎদ ইঙ্কূ পিতর হেৎদ এটা কুলিচ কুকে গামকেৎ কুয়াকু "বকইঞতালেয়াতুকু আলে কিনা চিকায়াআলে? 38ইন্তং পিতর ইঙ্কূকে গামাৎ কুয়ায়্য় য় "আপে যতচ আপেয়া কাই ঈকা রাঃআ নাতিনাং মন পাল্টায়পে হেৎদ যীশু খ্রীষ্ট রাঃআ নুতুমতে ডুবুলোঅপে, এন্খান রীলামালা আত্মা রাঃআ ভর নামেয়াপে। 39চিয়াচি নিয়া এক্ড়ার আপে হেৎদ আপেয়া হন-হপনকুরাঃআ নাতিনাং হেৎদ অকয় সাঙ্গিনরে হেৎদ চিন্তি হড়কে প্রভু আবুয়া ঈশ্বর রাঃআ আউকুয়ায়্য়য়। 40অটঃহঅ গাদা থুতি গামকাতে ইনি লুকুন্দী ী এমলাৎআয় হেৎদ ইঙ্কূকে কষামুদি কাতেন গামালাৎ কুয়ায়্য় য় "নিয়া কাল রিঙ্কূ বাড়িচ হড়কু রাঃআ রেয়াজ হাতেন আপে নিজে কুকে রখেয়াকূপে।8 41ইন্তং অকয় পিতর রাঃআ থুতি আয়ুম কেৎয়াকু, ইঙ্কূ ডুবুল হাতাকেৎয়াকু, ইনাতে ইনা হুলাং প্রায় আপি জুলু9 আত্মা ইঙ্কূলঅ পাতিয়ান কু লঅ মেশা খন্জায়নাকু।

পাতিয়ানকু রাঃআ সহভাগিতা।

42হেৎদ ইঙ্কূ কুলিচ কুরাঃআ চেচেদ হেৎদ সহভাগিতারে আকুয়া তালারে যতচ য়্য় হাটিং একেনাকু জম নু, পিঠা কেচারে হেৎদ বিন্তিরে মাহা পারমঅ কেনা। 43ইন্তং যতচ রাঃআ ভিতাররে বরঅ বলয়নাঃ হেৎদ কুলিচ কু গাদা হাহাড়া কামি হেৎদ চিহ্না -কামি করায়কেনাকু। 44হেৎদ অকয় পাতিআয়নাকু, ইঙ্কূ যতআঃ মিশাতে দঃহয় কেনাকু, 45হেৎদ ইঙ্কূ ইঙ্কূয়া যত সম্পত্তি হেৎদ ঢিপা বাইত-ক্ষেত আখরিং কাতে, অকয় রাঃআ চিল্কা জরুর হুইওকেনা ইনিকে এনকা অর্থ এম হুইওকেনা। 46হেৎদ ইঙ্কূ মিৎ মনতে জাহের থান্তে সেনঃঅকেনাকু হেৎদ অড়ারে কুশিতে কেচা পিঠা জমেৎ কেনাকু হেৎদ কুশি লঅ হেৎদ উদার মনেতে জমা জমেৎ কেনাকু, 47ইঙ্কূ ঈশ্বর রাঃআ গুনমানত য় কেনাকু হেৎদ ইনাতে যতচ হড় রাঃআ হান্ডে ইঙ্কূ দুলাড় রাঃআ পাত্র চিফ্না। হেৎদ অকয় রুক্ষীয়া নামেকেনাকু, প্রভু ইঙ্কূকে মন্ডলীরে জুড়াকেৎ কুয়ায়্য়য়।