কড়া অনুবাদ
কুলিজকুরাআ কামি 1:8
Verse 8 is marked below, with the whole chapter around it. Read from the start
যীশু দ সেরমাপুরি তে রাকাব এনায়।
গুনমান থিওফিল, ইঞ দ মাড়াঙ পুথিটা ইনা যত বাবত ইদিকাতে অল তাৎআইঞ, অকা যীশু ইনা হুলাং যাকিৎ করা হেৎদ চেচেদ এতহব লাৎআয়। অকা হুলাং ইনি আয়া বাছায়ান কুলিচ কুকে রীলামালা আত্মা রাঃআ তে হুকুম এমকেৎ কুতে সেরমাতে সেনেনায়। নিজেরাঃআ দুঃখ সাহাকেৎতে গজ বিরিৎ তায়মতে ইনি দ ঢের লেকা চিপ্না এমকাতে ইঙ্কূয়া হান্ডে নিজেকে জীউৎ উদুয়াকেৎ কুয়ায়্য় য়, পুলি মাহা যাকিৎ ইঙ্কূয়া হান্ডে নেল-সদর তুকাকেৎ কুয়ায়্য় য়, হেৎদ ঈশ্বর রাঃআ মুলুক রাঃআ বাবদ তে নাআহানা থুতি গাম কেৎকুয়ায়্য় য়। হেৎদ ইনি ইঙ্কূলোঅ যজম অক্ত নাপাম মেন্তে নিয়া হুকুম এমাৎকুয়ায়্য়, আপে যিরুশালেম শেহার শাহার হাতেন বাহারতে আলপে সেনা মেন্খান আপুরাঃআ এক্ড়ার লাৎআয় অকা দান রাঃআ থুতিকু ইঞা হান্ডে আয়ুম তাৎ আপে, ইনা রাঃআ তাঙ্গিপে। চিয়াচি যোহন দ দাঃআ রে ডুবুলেৎ কুকেনায়, মেন্খান আপে দ হুডাং মাহা তায়ম খানগে প্রভু রাঃআ রীলামালা আত্মাতে ডুবুলআঃপে।1 এন্তে ইঙ্কূ যতচ মিশাতে ইনিকে কুলিকিয়াকু, প্রভু, নিয়া কি ইনা মাহা তানা, চিন্তং আম খেরোয়াল দিসুম রাঃআ তিহিরে পারহড় এম রুয়াড় কুয়াম? ইনি ইঙ্কূকে গামকেৎ কুয়ায়্য়, অকা মাহাকু চি কাল আপু নিজে রাঃআ আইদারি রে দহঃঅ তাৎআয় ইনা আপেয়া সারিরাঃআ বাবত লহয়তানা। মেন্খান রীলামালা আত্মা আপেয়া চেতান রে হিচ লেংখান আপে দাড়িপে নামেয়া, হেৎদ আপে পারহড় যীরুশালেম শেহার, গোটা ইহুদিয়া মুলুক দিশুম হেৎদ শমরিয়া দিশুমরে হেৎদ ধারতি রাঃআ মুচাৎ যাকিৎ ইঞা লুকুন্দী হুইওয়াপে।
সেরমাপুরি তে রাকাব
চিন্তং প্রভু যীশু নিয়া যত থুতিকু গামেতানায়, ইনি ইঙ্কূয়া মেদরাঃআ সামাং রে রাকাব ইদি লাগায়নায়, মিয়াৎ রিম্বিল ইঙ্কূ য়া নেলহরা হাতেন ইনিকে দানাংকিয়ায়। ইনি সেনঃতানায় হেৎদ ইঙ্কূ নিরালা দর মিৎ ঢেকতে কয়ঃঅ তাৎ আকু, এনকান অক্ত, পুন্ডি সনঃঅ তুসিংআ কানাকিন বার হড় ইঙ্কূ য়া হান্ডে তিঙ্গুই নাকিন, হেৎদ ইনকিন গামকেয়াকিন, দুলাড়িয়া গালিল রিঙ্কূ হড়কু, আপে নিরালা দর কয়অ কাতেন তিঙ্গুয়া কানাপে চিয়া? ইনি দ যীশু আপেয়া হান্ডে হাতেন সেরমাতে রাকাবেনায়, ইনিকে চিল্কা সেরমাতে সেনঃঅ নেল কিয়াপে, এনে এনকাগে ইনিকে রুয়াড় হিচু নেলিয়াপে। ইন্তং ইঙ্কূ জৈতুন নুতুমান বুরু হাতেন যীরুশালেম শেহার তেকু রুয়াড় সেনেনা। ইনা বুরু যীরুশালেম শেহার রাঃআ কাতারে, মিয়াৎ ঝিরাও মাহা রাঃআ হরা তারা মাইল। শেহার তে সেনকাতে কদেরে ইঙ্কূ তাহিনকেনাকু, ইনা চেতাং রাঃআ অড়াতে চেলা সেনেনাকু পিতর, যোহন, যাকোব হেৎদ আন্দ্রিয়, ফিলিপ হেৎদ থোমা, বর্থলময় হেৎদ মথি, আলফেয়ের রাঃআ হনতেদ যাকোব হেৎদ ঈশ্বর ভক্ত শিমোন, জীলট হেৎদ যাকোব রাঃআ বকতেদ যিহুদা, ইঙ্কূ যতচ গে কুড়িহন কুলঅ, হেৎদ যীশু রাঃআ মাইতেদ মরিয়ম হেৎদ যীশু রাঃআ বকতেদ তুকুলঅ মিৎ অন্তরতে বিন্তিরে তাহিনাকু।
যিহুদা রাঃআ গান্ডূ রে মিহুড় কুলিচ রাঃআ বহাল
ইনা হুলাং মিৎ হুলাং প্রায় মিৎ চাকি রিলে হড় মিৎ থাংরে হুন্ডি লেনাকু, এন থাংরে পিতর বকতেদ কুরাঃআ তালারে তিঙ্গুয়েন্তে গামাকেৎ কুয়ায়্য় দুলাড়িয়া বকইঞকু, অকয় যীশু কে সাবলিয়াকু, ইঙ্কূকে হরা উদুলাৎ কুয়ায়্য় য় অকা যিহুদা, ইনি রাঃআ ব্যাপারতে রীলামালা আত্মা দায়ুদ রাঃআ মচা হাতেন মাড়াঙতে অকা গামলাৎআয়, ইনা শাস্ত্রীয় জাগার পুরা হুইওরাঃআ জরুর তাহিনোকেনা। চিয়াচি ইনি (যিহুদা) হড় দ আবুলঅ তাহিলেনায় হেৎদ নিয়া সেবাকামী রাঃআ হাকদার হুইলেনায়। ইনি দ বাড়িচ কামী রাঃআ কামানি তে মিয়াৎ বাইত কিরিং লাৎআয়। ইনা তায়ম ইনিদ তাবের কাতে অতেরে নুরেনায়, ইনি রাঃআ লাহিচ অটেজেন্তে পটা যত উডুঙয়েনা, হেৎদ যীরুশালেম শেহার রিঙ্কূ যতচ হড় ইনাটা সারি নামলাৎ আকু, নিয়া মেন্তে ইঙ্কূয়া জাগারতে ইনা বাইত/অতে হকলদামা অর্থাৎ "মায়ম ভূমি নুতুমতে সারিয়াকু। চিয়াচি দুরাং পুথিরে অল মেনা "ইনিরা ডিপা উজাড়োকাআ, ইনারে তাহিনাকু এনকান যাহায় আলোকু তাহীনকাআ হেৎদ ইনিরা পালক রাঃআ গান্ডূ এটা যাহায়কে এম হুইওকাআ।2 এন্তে, ইনা হুলাং যাকিৎ, চিমিন মাহা যীশু আবুয়া তালারে তাড়ম ভাড়ায় কেনায়, ইমিন মাহা হারহুলাং অকয় আবুলঅ সুতুঃ এমতাঃআকু, যোহন রাঃআ ডুবুল হাতেন এহব কাতেন অকা হুলাং প্রভু যীশু কে আবুয়া হান্ডে হাতেন সেরমাতে রাকাব হুইয়া কানায়, নিকুয়া মিয়াৎ হড় আবুলঅ ইনি রাঃআ জিউৎ-রাকাব রাঃআ লুকুন্দী ী হুইওয়ায়, নিয়াটা অবশ্যই জরুড় তানা। ইন্তং ইঙ্কূ নিকিন বার হড়কে তিঙ্গুকেৎ কিনাকু, যোষেফ অকয়কে বার্শবা গামায়াকু, অকয় রাঃআ উপাধি যুষ্টতানা। হেৎদ মত্তথিয়, হেৎদ ইঙ্কূ বিন্তি কেৎয়াকু, এ প্রভু আম যতচ রাঃআ অন্তর সারিয়াম, এন্তে নিকিন বার হড় রাঃআ তালারে অকয়কে বাছা তিয়াম ইনিকে উদুয়িইম। যিহুদা নিজে রাঃআ থাংতে সেনঅ নাতিনাং নিয়া যে সেবা রাঃআ হেৎদ কুলিচ রাঃআ গান্ডূ আড়া গিডিতাৎ আয়, ইনি রাঃআ বদলতে গান্ডূ হাতা রাঃআ নাতিনাং উদুয়ালেম। তায়মতে বার হড় রাঃআ নাতিনাং অন্দাজাহালাং কেৎয়াকু, হেৎদ মত্তথিয় রাঃআ নুতুমতে গুলিবাঁট নুরেনা, ইনাতে ইনি গেলে মিৎ কুলিচ কুলঅ সাথ এমকেয়ায়।
Source notes (2)
- Cross-reference মথি 3:11
- Cross-reference দুরাঃআং মালা 69:25; 109:8
কড়া অনুবাদ. Copyright © 2024 Bridge Connectivity Solutions Pvt. Ltd. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.