Biblica® Open Nkanda wu Moyo, Nguizani Yimona ayi Minkunga 2002
Minkunga 99
Lubuongimina Yave bila widi wunlongo
Yave weti yala,
bika makanda matita
vuandisidi kundu kiandi ki kipfumu va khatitsika Bakeluba.
Bika ntoto wunikuka.
Yave widi wunneni mu Sioni
widi wuyayusu va yilu makanda moso.
Bika bazitisa dizina diaku dinneni ayi ditsisi.
Niandi widi wunlongo.
Ntinu widi wu lulendo wunzolanga busonga.
Ngeyo wukindisa mambu mafuana
Mu Yakobi, wuvanga momo madi masonga ayi malulama.
Luyayisa Yave, Nzambi eto.
Lubuongama va ntuala buangu kioki
keti tetikanga malu mandi.
Niandi widi wunlongo.
Moyize ayi Aloni baba va khatitsika
zinganga ziandi zi Nzambi ;
Samueli wuba va khatitsika bobo bantelanga
dizina diandi,
batela Yave
ayi niandi wuba vana mvutu.
Niandi wuba yolukila mu dikunzi di dituti.
Bawu bakeba zinzengolo ziandi
ayi zithumunu ziosi kaba vana.
A Yave, Nzambi eto, ngeyo wuba vana mvutu.
Ngeyo wuba kuidi Iseli, ngeyo wuba Nzambi
yoyi yiba kuba lemvukilanga ;
ka diambu ko ngeyo wuba kuba vananga
thumbudulu mu mavanga mawu mambimbi.
Yayisanu Yave, Nzambi eto.
Lubuongama va ntuala mongo andi wunlongo
bila Yave, Nzambi eto, widi wunlongo.
Biblica® Open Nkanda wu Moyo, Nguizani Yimona ayi Minkunga 2002. Copyright © 2002 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.