Biblica® Open Nkanda wu Moyo, Nguizani Yimona ayi Minkunga 2002
Minkunga 98
Nzambi wizidi mu sambisa nza
Nkunga.
Yimbidilanu Yave nkunga wumona
bila wuvengi mambu ma kitoko.
Koko kuandi ku lubakala ayi koko kuandi kunlongo
mivengi phulusu mu diambu diandi.
Yave wuzabikisa phulusu andi ;
ayi wumonisa busonga buandi kuidi makanda.
Wutebukila luzolo luandi moyo
ayi kikhuikizi kiandi kuidi nzo yi Iseli.
Zitsukusunu zioso zi ntoto
zimona phulusu yi Nzambi eto.
Yamikina mu khini kuidi Yave, ntoto wumvimba ;
ludila mu nkunga mi mayangi va kimosi ayi miziki.
Lubula miziki kuidi Yave mu ngitala,
mu ngitala ayi mu biyoko bi nyimbidi ;
mu zitulumbeta ayi mu biyoko bi phoka yi dimemi,
yamikinanu mu khini va ntuala Yave, ntinu.
Bika mbu wuwakikisa biyoko va kimosi
ayi kadika kima kidi muna ;
bika nza ayi babo bobo banzingilanga muawu bayamikina.
Bika minlangu minneni mibula mioko miawu.
Bika miongo miyimbila va kimosi mu khini ;
bika bayimbila va ntuala Yave
bila wulembo yizi mu diambu di sambisa ntoto.
Niandi wela sambisa nza mu busonga
ayi batu mu bufuana.
Biblica® Open Nkanda wu Moyo, Nguizani Yimona ayi Minkunga 2002. Copyright © 2002 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.