Minkunga 51

Kuidi ngeyo ndivodidi masumu

Nkunga Davidi kuidi pfumu minyimbidi ; mu thangu mbikuidi Natani kayiza kuidi Davidi mu kitsuza kiandi ayi Betaseba.

1A Nzambi, wumboni kiadi

boso buididi luzolo luaku lu ngolo ;

boso buididi kiadi kiaku kinneni,

kubula zinzimbala ziama.

2Sukula mambimbi mama moso.

Ayi wuphedisa mu disumu diama.

3Bila nzebi zinzimbala ziama

ayi disumu diama didi ku ntualꞌama mu zithangu zioso.

4Kuidi ngeyo, veka kaka ndivodidi masumu ;

ayi ndivengi mambimbi va meso maku ;

muingi wumonika wusonga mu thangu wutuba

ayi wukambulu zimbala mu thangu wunsambisa

5Bukiedika, minu ndidi nkua masumu tona mu mbutukulu ;

nkua masumu tona thangu ngudi ama kabaka buemba buama.

6Bukiedika ngeyo tidi ti kiedika kiba mu khati ku nitu.

Wundonga nduenga mu khati yi ntimꞌama

7Wuphedisa mu isopi buna ma ndivedila ;

wutsukula buna ndiela ba wuphembi

viokila mvula yi matadi ma phembi ;

8Bika ndimona khini ayi ndiyangalala

Bika mimvesi miomi wukosikisa mi yangalala.

9Sueka zizi kiaku va ntuala masumu mama

ayi kubula mbimbi ama yoso.

10Vanga mu minu ntima wuvedila, a Nzambi

ayi buela kitula mu minu pheve yimona ayi yikinda.

11Kadi kukhuka va ntuala zizi kiaku ;

kadi botula pheve aku yinlongo mu minu.

12Wuphutudila khini yi phulusu aku

ayi bika wuphana Pheve yi luzolo lu mboti muingi yikhindisa.

13Buna ndiela longa zinzila ziaku

kuidi bobo beti vanga zinzimbala,

ayi bankua masumu bela vutuka kuidi ngeyo.

14Wuphukisa mu nzimbala yi menga, a Nzambi

Nzambi yoyi yeti kuphukisa,

ayi ludimi luama luela yimbidila busonga buaku.

15A Yave zibula bididi biama,

ayi munuꞌama wela yamikisa nzitusu aku.

16Ngeyo wuzolanga ko makaba,

bila enati buawu ; nganu ndinatina mawu ;

ayi wumonanga khini ko mu makaba mayoko.

17Makaba ma Nzambi madi pheve yi kosakana

ntima wukosakana ayi wu kiadi

a Nzambi, wulendi ku milenza ko.

18Mu diambu di mamboti maku,

bika wuvangila Sioni mamboti,

tunga diaka bibaka bi Yelusalemi.

19Kuna kuela ba makaba ma busonga,

makaba mayoko mamvimba meti kumonisa khini.

Buna zingombi zimbakala ziela tambuku va ntalꞌaku.