Minkunga 52

Tsukulu yi nkua kimvuama weti yamisa batu

Nkunga Davidi kuidi pfumu minyimbidi mu thangu Dowengi muisi Edomi, kayiza vumbudila Sawuli kipholo ti Davidi wuyenda ku nzo Ahimeleki.

1Bila mbi wulembo kukiniemisina mu diambu di mambimbi, ngeyo nkua ngolo e ?

Bila mbi wulembo kukiniemisina mu lumbu kimvimba

ngeyo kambulu nzitusu va meso ma Nzambi e ?

2Ludimi luaku lunyindulanga mambu ma mbivusu ;

ludedikini banga lezuale yidi meno ma ngolo.

Ngeyo wunsadilanga luvunu.

3Ngeyo lutidi zola mambu mambimbi

viokila mamboti ;

luvunu viokila mambu ma kiedika.

4Ngeyo lutidi zola mambu moso momo mambivisanga,

ngeyo ludimi lu luvunu.

5Bukiedika Nzambi wela kubuisa mu mbivusu yika yilendi suka ko.

Wela kubuila ayi wela kukanzuna mu nzoꞌaku yi ngoto.

Wela kuvuza va ntoto wu batu badi moyo.

6Batu basonga bela mona

ayi bela mona tsisi bela kunseva bu bela tuba :

7“Vava vadi mutu wukambulu kitula Nzambi zingolo ziandi

Vayi wubedi tulanga diana diandi

mu kimvuama kiandi kiwombo

ayi wukitukidi mutu wu ngolo mu bunganga bankaka.”

8Vayi minu ndidi

banga nti wu olive, wuwedi meza ma nlangu mu nzo yi Nzambi.

Ndintulanga diana diama mu luzolo mu ngolo lu Nzambi

mu zithangu zioso ayi mu mimvu mioso.

9Ndiela kuzitisa mu zithangu zioso

mu diambu di momo wuvanga ;

mu dizina diaku ndiela tula diana bila didi dimboti,

ndiela kuzitisa va meso ma banlongo.