Biblica® Open Nkanda wu Moyo, Nguizani Yimona ayi Minkunga 2002
Minkunga 29
Mbembo Yave
Nkunga Davidi.
Luvana kuidi Yave, beno batu badi ngolo ;
Luvana nkembo kuidi Yave ayi zingolo.
Luvana nkembo kuidi Yave
wufuanikini mu dizina diandi.
Lubuongimina Yave mu kiezila ki kinlongo kiandi.
Mbembo Yave yidi va mbata minlangu.
Nzambi yi nkembo wulembo dumi.
Yave wulembo dumi va mbata minlangu minneni.
Mbembo Yave yidi yi lulendo,
mbembo Yave yidi yi nzitusu.
Mbembo Yave yinkelulanga minti mi sedeli ;
Yave wunkelulanga minti mi sedeli midi mu Libani mu bitini.
Wunzamisanga Libani banga muana wungombi ;
Silioni banga muana wu phakasa.
Mbembo Yave yilembo totula minlaki mi mbazu.
Mbembo Yave yintitisanga dikanga.
Yave wuntitisanga dikanga di Kadesi.
Mbembo Yave yimbutisanga minsuma ;
yeti vambisa minsitu.
Mu Nzoꞌandi, bima bioso bilembo yamikina :
“nkembo”.
Yave wumvuandanga va kundu ki kipfumu va mbata khuka minlangu ;
Yave weti vuanda banga ntinu mu zithangu zioso.
Yave weti vana batu bandi zingolo ;
Yave weti sakumuna batu bandi mu ndembama.
Biblica® Open Nkanda wu Moyo, Nguizani Yimona ayi Minkunga 2002. Copyright © 2002 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.