Biblica® Open Nkanda wu Moyo, Nguizani Yimona ayi Minkunga 2002
Minkunga 28
Yave, vana mvutu
Nkunga Davidi.
Ngeyo ndintela ;
A Yave, ditadi diama di ngolo,
kadi kunzibikila dikutu diaku
Bila ngeyo ba dio sui ;
buna ndiela dedakana bobo bankulukanga mu dibulu dimula.
Wa yamikina kuami mu diambu di kiadi
banga bu ndikutela mu tomba lusadusu
banga bu ndieti vumuna mioko miama
ku ndambu buangu kiaku kilutidi kinlongo.
Kadi kuphitumuna va kimosi ayi batu bambimbi
ayi batu beti vanga mambimbi ;
bobo banyolukilanga mambu ma ndembama va kimosi ayi badiawu
vayi banyindulanga mambimbi mu mintima miawu.
Wuba vutudila boso buididi mavanga mawu,
ayi boso buididi mavanga mawu mambimbi.
Wuba vutudila boso buididi mavanga ma mioko miawu,
wuba vutudila boso buididi mambu momo bavanga.
Sumbu batalanga ko mavanga ma Yave,
ayi mavanga ma mioko miandi,
wela ku babunga ayi kalendi ku batunga diaka ko.
Nzitusu wuba kuidi Yave !
Bila wuwilu yamikina kuama mu diambu di kiadi.
Yave niandi zingolo ziama ayi nkakuꞌama.
Ntimꞌama wuntulanga diana mu niandi
ayi ndisadusu.
Ntimꞌama weti mona khini yi ngolo
ayi ndiela kumvutudila matondo mu nkungꞌama.
Yave niandi ngolo mu diambu di batu bandi.
Niandi buangu kingolo ki khudulu
yi mutu andi wowo kadukudila mafuta.
Vukisa batu baku ayi sakumuna kiuka kiaku.
Bika wuba nsungi awu ayi wuba nata mu zithangu zioso.
Biblica® Open Nkanda wu Moyo, Nguizani Yimona ayi Minkunga 2002. Copyright © 2002 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.