Minkunga 139

Pfumu, ngeyo zebi mambu mama moso

Nkunga Davidi kuidi Pfumu minyimbidi.

1A Yave ngeyo wuthomba ayi ngeyo wunzebi.

2Ngeyo zebi thangu ndidi wuvuanda

ayi thangu ndidi wutelama ;

ngeyo weti bakula bumboti mayindu mama bu makidi thama.

3Ngeyo zebi thangu ndieti totuka

ayi thangu ndieti lambalala ;

Ngeyo zebi bumboti zinzila ziama zioso.

4Tuamina mambu maba va ludimi luama,

ngeyo zebi mawu moso, a Yave.

5Ngeyo wunzungididi ku manima ayi ku ntuala

Ngeyo wutetika koko kuaku va minu.

6Nzayilu yi phila yoyi, yididi ngolo

yitsiminanga kuidi minu ;

yididi ngolo yinangama muingi ndiyibakidila.

7Kuevi ndilenda kuenda suamina phevi aku e ?

A kuevi ndilenda kuenda tinina meso maku e ?

8Enati khumini ku Diyilu, ngeyo widi kuna ;

enati minu thudidi mbukꞌama ku tsina ntoto,

ngeyo widi kuna.

9Enati khumini mu mavavi ma nkielo buisi ;

enati phuendi ku lubakala lu mbu,

10buna kuna diaka, koko kuaku kuela kundiatisa ;

koko kuaku ku lubakala kuela kutsimbidila ngolo.

11Enati khembi : “Bukiedika tombi kiela kutsueka”

vayi buna kiezila kikitukidi tombi va ndidi.

12Muaki tombi kilendi ba tombi kuidi ngeyo ko ;

builu buela kienzuka banga muini

bila tombi kidi banga kiezila kuidi ngeyo.

13Ngeyo wuvanga binama biama bi khati nitu ;

ngeyo wuthunga va kimosi mu vumu ki ngudi ama.

14Ndikuzitisa bila ndidi vangu ki tsisi ayi kitsiminanga ;

mavanga maku madi matsiminanga ayi nzebi buawu bumboti.

15Khubukulu ama yi mimvesi yisia suama va ntualꞌaku ko

mu thangu ndikubuku mu buangu kisuama ;

mu thangu ndivangu va kimosi ku tsina ntoto.

16Meso maku mamona nitu ama yikambu kubuku.

Bilumbu bioso biobi wukhubikila biba bisonama mu bukuꞌaku,

tuamina lumbu kimosi mu biawu kiba.

17A phila thalu mayindu maku kuidi minu, a Nzambi !

A phila woka madi !

18Enati thidi ku matanga ;

buna maviokidi nzielo mu thalu ;

Bu khotukidi, minu ndidi kaka yaku.

19Enati ngeyo wuzola kaka vonda mutu wumbimbi, a Nzambi !

Bika luthatukila beno luntengulanga menga !

20Beti kuyolukila mu zikhanu zimbimbi ;

bobo beti kulenda beti sadila dizina diaku mu kambu fuana.

21Buevi, ndilendi lenda ko bobo beti kulenda, a Yave ?

A buevi, ndilendi kakumukina ko bobo beti kufuemi e ?

22Ndisi kadi diambu ko vayi kikhenene kaka ndidi kuidi bawu ;

ndieti ba tanga bambeni ziama.

23Wumfiongunina, a Nzambi, ayi zaba ndimꞌama ;

wuthota ayi zaba mayindu mama.

24Tala kani nzila yimbimbi yidi mu minu

ayi wundiatisa mu nzila yi mvu ka mvu.