Minkunga 138

Thidi yimbidila kikhuikizi kiaku

Nkunga Davidi.

1Ndiela kuzitisa, a Yave, mu ntimꞌama wumvimba ;

ndiela yimbila minzitusu miaku va ntuala zinzambi.

2Ndiela buongama ku ndambu nzo aku yinlongo ;

ayi ndiela zitisa dizina diaku mu diambu di luzolu luaku

ayi mu diambu di kikhuikizi kiaku

bila ngeyo wuyayisidi dizina diaku ayi mambu maku va yilu bima bioso.

3Thangu nditela, ngeyo wuphana mvutu.

Wukhitula nkua ngangu ayi nkua bukhafi bu ngolo.

4Bika mintinu mioso mintoto mizitisa, a Yave

bu miwilu mambu ma munu aku.

5Bika miyimbila zinzila zi Yave

bila nkembo wu Yave widi wunneni.

6Ka diambu ko Yave widi wuzangama,

niandi weti tala bobo beti kukikulula

ayi zebi bumboti batu badi luniemo bu badi ku thama.

7Ka diambu ko ndilembo diatila va khatitsika ziphasi,

ngeyo weti tanina luzingu luama ;

ngeyo weti nonuna koko kuaku

mu kakidila zinganzi zi bobo beti kundenda ;

mu koko kuaku ku lubakala weti kuphukisila.

8Yave wela dukisa mambu momo keti tomba mu minu.

Luzolo luaku, a Yave, lunzingilanga mu zithangu zioso.

Kadi yekula bisalu bi mioko miaku.