Minkunga 11

Suamunu ki kiedika

Nkunga Davidi kuidi pfumu minyimbidi.

1Kuidi Yave ndintombilanga suamunu.

Buevi lulenda ku khambila :

“Tinina ku miongo miaku banga bu ntininanga nuni.”

2Bila tala, batu bambimbi balembo leki mimbasa ;

ayi balembo ludika zitsoto va nsinga

mi mimbasa muingi babasula, bu badi mu tombi,

batu bobo badi mintima mi lulama.

3Enati zifundasio zitiolumunu,

buna mutu wusonga, mbi kalenda vanga e ?

4Yave widi mu nzoꞌandi yinlongo !

Yave, kundu kiandi ki luyalu kidi ku diyilu,

meso mandi malembo tadi ayi zindabu ziandi

zimfionguninanga bana ba batu.

5Yave wumfionguninanga mutu wusonga

vayi muelꞌandi weti lenda mutu wumbimbi

ayi mutu wowo wunzolanga matsita.

6Wunokisanga makala ayi sofolo yi mbazu.

Kuidi batu bambimbi,

Phemo yi mbazu yawu kopo yi ziphasi bela kabana.

7Bila Yave widi wusonga, wunzolanga masonga.

Batu badi mintima mi lulama

bela talanga zizi kiandi.