Minkunga 102

Lusambulu lu nkua mabienga

Lusambulu lu nkua mabienga weka vonga ayi wulembo kambi ziphasi ziandi kuidi Yave.

1Wa lusambulu luama, a Yave,

bika yamikina kuama mu diambu di lusadusu kutula kuidi ngeyo

2Kadi kutsuekila zizi kiaku thangu ndidi mu phasi,

tamba dikutu diaku kuidi minu ;

thangu ndikutela, sia nsualu ; wuphana mvutu !

3Bila bilumbu biama bilembo lalakana banga muisi,

mimvesi miama milembo yokana

banga makaba ma ku mbazu.

4Ntimꞌama wukosikini ayi wuyumini banga biti ;

ndizimbikini dia bidia biama.

5Mu diambu di kunga kuama

nkanda nitu kaka ayi mimvesi misiala.

6Ndidi banga kimfutu kidi mu dikanga ;

banga kimfutu va khatitsika

bibuangu bikambulu batu ;

7Ndilembo leki nkielo,

ndieka banga nuni

yidi yawu veka ku yilu nzo.

8Mu lumbu kimvimba,

bambeni ziama zilembo mfingi ;

bobo bamekumfuemina,

balembo sadila dizina diama banga tsingulu.

9Bila ndilembo dia dibombi banga bidia

ayi ndisobikisidi ndiunu ama ayi matsuela

10mu diambu di miangu miaku minneni

bila ngeyo wunzangula ngolo

ayi wundozidi va lutengo.

11Bilumbu biama bidi banga kitsusula ki masika

ndime yuma banga biti.

12Vayi ngeyo, a Yave, wuvuanda va kundu ki kitinu mu zithangu zioso ;

tsangu aku yilembo zingila mu tsungi ka tsungi.

13Ngeyo wela telama, wela monina Sioni kiadi.

Bila yawu yoyi thangu yimonisa nlemvo kuidi niandi ;

thangu yoyi wukubika yfueni.

14Bila bisadi biaku binzolanga matadi mandi,

ayi bieti mona kiadi

mbungi-mbungi andi yela kubanata mu tezo kimona kiadi.

15Makanda mela kinzika dizina di Yave ;

mintinu mioso mi ntoto

miela kinzika nkembo aku.

16Bila Yave wela buela tunga diaka Sioni

ayi wela monika mu nkembo andi.

17Wela vana mvutu mu lusambulu lu batu basukama,

kalendi lenza maniongo mawu ko.

18Bika mambu mama masonama mu diambu di tsungi yinkuiza

muingi batu bobo kabavangimini ko babaka buzitisila Yave.

19Yave wutala ku tsi tona ku buangu kiandi kinlongo kidi ku yilu

tona ku diyilu niandi wuntala ntoto,

20mu diambu di wa kunga ku batu badi mu nloko ;

ayi mu diambu di kula bobo bazengolo nkanu wu lufua ;

21buna dizina di Yave diela yolukulu mu Sioni

ayi minzitusu miandi mu Yelusalemi

22mu thangu batu bela kutangana va kimosi ayi bipfumu

mu diambu di buongimina Yave.

23Mu luzingu luama, wumanisa zingolo ziama ;

wukufika bilumbu biama.

24Buna ndituba :

“kadi kumbotula, a Nzambi ama, va khatitsika yi bilumbu biama ;

mimvu miaku miela zingilanga mu tsungi ka tsungi.

25Va thonono, ngeyo wutula zifondasio zi ntoto

ayi diyilu didi kisalu ki mioko miaku.

26Biela biva vayi ngeyo wela zinganga,

bibioso biela mana vembudila banga nledi,

ngeyo wela bibalula banga kikhutu ayi biawu biela vengumunu.

27Vayi ngeyo wubalukanga ko,

ayi mimvu miaku milendi suka ko.

28Bana ba bisadi biaku bela zingilanga va meso maku

minkuna miawu miela ba mitelama dio ngui va ntualꞌaku.”