Mikunga 24

Yave ke na kukota na Yinzo ya yandi

1Mukunga ya Davidi.

Ntoto kele ya Yave, nyonso yina kele na ntoto kele ya yandi.

Yinza mpe nyonso yina ke zingaka na yawu kele ya Yave.

2Ni Yave tulaka lufulu ya ntoto na zulu ya mubu,

ni Yave sikimisaka yawu na zulu ya banzadi.

3Nani ke yuluka na mongo ya Yave?

Nani ke telama na Yinzo ya yandi ya longo?

4Muntu yina me sala ve yimbi na maboko ya yandi,

yina ntima kele ya kuvedila,

yina ke kukipesaka ve na luvunu,

yina ke salaka ve bandefi ya luvunu,

5yandi ke kuzwa lusakumunu ya Yave,

Nzambi Muvuukisi ya yandi ke kumisa yandi ya kudedama.

6Ni mutindu yayi kele mbandu ya bayina ke sosaka Yave,

bayina ke kusosaka kizizi ya nge, nge Nzambi ya Yakobi. Kupema

7Myelo, beno funguka,

beno funguka myelo ya nene ya seko!

Bika ti ntinu ya nkembo kusala nkontolo na yandi!

8Nani kele ntinu yayi ya nkembo?

Ni Yave, ni yandi kele kinwani ya ngolo mpe ya kibakala,

Ni Yave, ni yandi kele kinwani ya ngolo yina ke nungaka bamvita.

9Myelo, beno funguka,

beno funguka myelo ya nene ya seko!

Bika ti ntinu ya nkembo kusala nkontolo na yandi!

10Nani kele ntinu yayi ya nkembo?

Ni Yave, Nzambi ya Binwani,

ni yandi kele ntinu ya nkembo! Kupema