Mikunga 11

Kana kivuvu ke dyaka ve

1Mukunga ya mfumu ya miyimbidi.

Mukunga ya Davidi.

Ni Yave kele kiswamunu ya munu.

Wapi mutindu beno lenda tuba na munu ti:

«Kwenda bumbama na mongo mutindu ndeke?»

2Ya tsyelika, bantu ya yimbi me kubika minani ya bawu,

bawu me tula madyonga ya bawu na basinga ya minani,

samu na kukubula na mpimpa, bantu yina kele na bantima ya kusungama.

3Kana balufulu me mwangana yimeni,

yinki muntu ya kudedama lenda sala dyaka?

4Yave kele na kati ya Yinzo ya yandi ya longo,

Yave kele na kiti ya yandi ya kintinu na mazulu.

Meso ya yandi ke na kutala,

meso ya yandi ke fyongonina bantu.

5Yave ke fyongonina muntu ya kudedama mpe muntu ya yimbi.

Yandi ke yinaka muntu yina ke zolaka kusala yimbi.

6Na bantu ya yimbi yandi ke nokisaka mvula ya makala ya tiya,

mvula ya tiya mpe mvula ya sufe,

mupepe ya tiya, ni yawu kele kikunku ya bawu.

7Ya tsyelika, Yave kele ya kudedama,

yandi ke zolaka mambu yina ba ke salaka na ludedomo nyonso.

Ni bantu ya kusungama lenda tala kizizi ya yandi.