Zaburi 27

Sala ya kusifu

Zaburi ya Daudi.

1Mwenyezi Mungu ni nuru yangu na wokovu wangu,

nimwogope nani?

Mwenyezi Mungu ni ngome ya uzima wangu,

nimhofu nani?

2Waovu watakaposogea dhidi yangu

ili wale nyama yangu,

adui zangu na watesi wangu watakaponishambulia,

watajikwaa na kuanguka.

3Hata jeshi linizingire pande zote,

moyo wangu hautaogopa;

hata vita vitokee dhidi yangu,

hata hapo nitakuwa na ujasiri.

4Jambo moja ninamwomba Mwenyezi Mungu,

hili ndilo ninalolitafuta:

niweze kukaa nyumbani mwa Mwenyezi Mungu

siku zote za maisha yangu,

niutazame uzuri wa Mwenyezi Mungu

na kumtafuta hekaluni mwake.

5Kwa kuwa siku ya shida,

atanihifadhi salama katika maskani yake,

atanificha uvulini mwa hema lake,

na kuniweka juu kwenye mwamba.

6Kisha kichwa changu kitainuliwa

juu ya adui zangu wanaonizunguka.

Katika maskani yake nitatoa dhabihu kwa kelele za shangwe;

nitamwimbia Mwenyezi Mungu na kumsifu.

7Isikie sauti yangu nikuitapo, Ee Mwenyezi Mungu,

unihurumie na unijibu.

8Moyo wangu unasema kuhusu wewe,

“Utafute uso wake!”

Uso wako, Mwenyezi Mungu “Nitautafuta.”

9Usinifiche uso wako,

usimkatae mtumishi wako kwa hasira;

wewe umekuwa msaada wangu.

Usinikatae wala usiniache,

Ee Mungu Mwokozi wangu.

10Hata baba yangu na mama yangu wakiniacha,

Mwenyezi Mungu atanipokea.

11Nifundishe njia yako, Ee Mwenyezi Mungu,

niongoze katika njia iliyo nyoofu,

kwa sababu ya watesi wangu.

12Usiniachilie kwa nia za adui zangu,

kwa maana mashahidi wa uongo

wameinuka dhidi yangu,

wakipumua ujeuri.

13Nami bado nina tumaini hili:

nitauona wema wa Mwenyezi Mungu

katika nchi ya walio hai.

14Mngojee Mwenyezi Mungu;

uwe hodari na mwenye moyo mkuu,

na umngojee Mwenyezi Mungu.