Lô-ma 9

1Yaz six coong senz yămz Zâu Jix-Tuz. Yaz max coong jaf — yaz nyăngz stimz nyâuđ cănh ayx zanyf manyf phunz yaz yămz Zâu Singx-Lingh — 2coong, yaz naih stauh lub nzongf, yaz nyăngz nyâuđ yâuc munz mayv quaix. 3Wâyc yaz cănh nođ phunz yaz zuc quanyf, gâyh goib Zâu Jix-Tuz wâyc yaz nyăngz yâuf pez, senz yaz pâyz quaix yămz nây stinb a nyăngz munh; 4stiz six I-sa-la-ên munh, stiz six tuz stipx săngh sây hoonb nyăngz phănc, gwăngz eeng, cloon wax đomc nyunc nyăngz wac, yâuc tuz sađ gâyf njanh phunz, cloon canyx bongc nyăngz jau, cloon nyunc nyăngz wac; 5stiz six tăng wax đomc claof jex setb taih, nzof Zâu Jix-Tuz six tăng stiz setb taih — (nây six âyz stinb a) — Nănh six năngx lub quaix muif huungđ wax Tauh, senz Zâu Tênb-Huungh hoopđ zuc tuz tanv tauv banc stâyv banc đaic. A-meen.

6Nây six max zâyf coong Zâu Tênb-Huungh nyăngz wac max săngh nongc. Wâyc zuc max zâyf coong tinyh phanv laiv lanh tăng I-sa-la-ên steengb taih, bix senz zâyf I-sa-la-ên munh nzuf. 7Yâuc max zâyf coong muif lanh sây stunz bix săngh Apx-la-ham nyăngz sây stunz nzuf. Six naih coong, “Tăng I-sakx, mâyh nyăngz sây stunz nzăngđ tuz êu bux.” 8Âyz gâyf six max zâyf nây stinb a nyăngz sây stunz, wax đomc munh six Zâu Tênb-Huungh nyăngz sây. Nzof yâuc, săngh nyunc wac nyăngz sây stunz, nzăngđ tuz stunx ayx Apx-la-ham nyăngz sây stunz. 9Nzof nây six nyunc nyăngz wac, coong: “Toix nâyx nomz săngx huđ, Yaz six taih, Sa-la six naih ah lanh toonz.” 10Yâuc max zâyf cungb nâyx cuungv, hănđ Lê-bê-ca lauf nâyx, naih sây toix tăng ah lanh munh, six I-sakx, pănh nyăngz claof jex — 11wâyc tăng sây max zeengx steengb stâyv nyăngz săngx huđ, yâuc max zeengx ayx laiv huungđ gongx max six laiv huungđ huđ, wâyc phunz Zâu Tênb-Huungh âyz Nănh tingc săngh sên taih nyăngz zux ix, six max coi wănc, 12max zâyf păngc cumh pâuz ayx, six păngc sên taih wax Tauh — nzof wax Tauh nzif yâuc tuz bux phunz pâyz, coong: “Wax tauh tah six zuc ayx pâuz phunz wax tauh yâuf.” 13Cayx năngđ naih ja coong: “Yaz stăngz Ya-côpx, six Yaz hănđ Ê-sau.”

14Năngđ nây, pănh six cayx coong ayx laix? Ha Zâu Tênb-Huungh bix max peengh stimz mah? Max zâyf năngđ nâyx. 15Wâyc Nănh coong ănz Mô-sê, coong: “Yaz oix ayx gongx phunz laiv lanh yaz songđ ayx phunz, nzof Yaz oix hâuđ lênh laiv lanh Yaz yâuc hâuđ lênh.” 16Năngđ nây, six max zâyf tăng laiv lanh oix, yâuc max zâyf tăng laiv lanh ayx nyăngz bix tuz, nây six tăng Zâu Tênb-Huungh, cănh naih nyâuđ hâuđ lênh. 17Wâyc Canyx Stâub coong tauv Pha-la-ôn coong: “Six wâyc nâyx huungđ zux ix Yaz nzăngđ njăpc mâyh taih, phunz tăng mâyh Yaz bix tuz hinđ manyf Yaz nyăngz tômx jab setb taih, yâuc phunz Yaz nyăngz manyh hayh tuz nzônh ninyh pong guungh đi.” 18Năngđ nây, Zâu Tênb-Huungh oix hâuđ lênh laiv lanh Nănh yâuc cănh hâuđ lênh, nzof Nănh oix ayx phunz laiv lanh nyâuđ nhlengc Nănh yâuc ayx.

19Năngđ nâyx nyâuh six cayx naic yaz coong: “Ha nâyx, săngh laix Nănh bix zef năngx coong mađ heh? Wâyc naih mănv hayh nzeengz tuz Nănh nyăngz zux ix heh?” 20Six munh lex, mâyh six mănv bix năngx nzađ caix Zâu Tênb-Huungh heh? Ha tuz nen ayx taih nyăngz tungh zăngc, lauf hayh coong ănz nen nănh taih wax tauh munh coong: “Săngx laix mâyh bix ayx yaz taih năngđ nâyx heh” naz yah? 21Max six nen nib stangc nyăngz munh bix max naih gâyf zoz nib nhlâuh taih, nongc ayx săngh ah huungđ tungh zăngc, tăng wa ah pany nib heh, max cun nâyx huungđ nongc ayx saix, wax huungđ nongc ayx stanc? 22Nzof năngđ coong Zâu Tênb-Huungh, oix hinđ manyf Nănh tingc stoif nyăngz jau cloon hinđ manyf Nănh nyăngz tômx jab setb taih, bix stanyb nênf nyangc wax đomc hoopđ zuc tingc stoif nyăngz tungh zăngc, yâuc tuz tingc săngh nongc phunz zuc mêtc wax đomc; 23yâuc phunz Nănh hayh hinđ manyf Nănh puv quâyx nyăngz gwăngz eeng phunz wax đomc tungh zăngc, senz tingc săngh tuz Nănh hâuđ lênh yâuc nongc njâuh phunz gwăngz eeng wax đomc — 24njinh pănh six lauf Nănh sên taih nyăngz munh, max zâyf cungb tăng Yu-tai munh cuungv, six lauf tăng pitc stingx munh timb, ha bix săngh laix heh? 25Năngđ Nănh lauf coong yămz wa Hô-sê-ya stâub, coong:

“Yaz six êu max zâyf Yaz nyăngz pec stingx wax đomc munh, ayx ‘Yaz nyăngz pec stingx’,

nzof max tuz stăngz nyăngz munh, yâuc ‘tuz stăngz’.

26Yâuc naih setb taih yămz stiz numđ coong wac ănz stiz wax nomz tinc, coong: ‘Nyâuh max zâyf Yaz nyăngz pec stingx’,

nzof lauf tăng wax nomz tinc, stiz bix tuz hipđ ayx ‘stâyv quâyx săngh wax Tauh Zâu Tênb-Huungh nyăngz toonz sab.’”

27Six I-sa-ya coong tauv I-sa-la-ên munh songđ hamv stingb lub, coong:

“I-sa-la-ên munh nyăngz toonz sab hănđ six đuungx cayx năngđ coiđ sinh nyăngz njăuz staiz,

six lauf cungb năngx yăngc ah phănc tuz njâuv cuungv,

28wâyc Zâu six coonx ayx phunz Nănh nyăngz wac,

săngh nzuf yămz nây nib minc.”

29Cayx năngđ I-sa-ya coong quaix đangc, coong:

“Năngđ coong tinb panc peengz nyăngz Zâu bix max njâuh pănh nyăngz ah đomc sây stunz nongc ayx phăn têx,

pănh six lauf zuc cayx năngđ Sô-đôm dlanyh,

nzof yâuc zuc ayx cayx năngđ Gô-mô-la dlanyh nâyx.”

30Năngđ nây, pănh six cayx coong ayx laix heh? Wax đomc pitc stingx munh, stiz max lov peengh stimz nyăngz jau, yâuc tuz peengh stimz nyăngz jau, nzof wax đomc peengh stimz nyăngz jau six păngc yămz zen stimz. 31Năngx naih I-sa-la-ên munh, six lov gâyf njanh nyăngz peengh stimz, yâuc max âyz tuz wax đomc gâyf njanh. 32Wâyc săngh laix? Nây six wâyc stiz max păngc yămz zen stimz, bix păngc yămz cumh pâuz ayx. Stiz staux yâuc tib zuc njanh jau wax nomz njăuz pyây, 33cayx năngđ naih ja coong:

“Phanv mangc, Yaz oonz ah nomz njanh jau nyăngz njăuz pyây ănz wa Si-ôn, wax nomz njăuz six ayx phunz munh tib zuc zoomf,

laiv lanh zen păngc wax nomz njăuz six max zuc nyayz.”