Lô-ma 8

1Wâyc nây, nâyx zanyf laiv lanh yămz Zâu Yê-su Jix-Tuz cah njaf songđ max zuc tingc stoif gôh. 2Wâyc Singx-Lingh săngh mengc nyăngz gâyf yămz Zâu Yê-su Jix-Tuz cah njaf, pungx goib yaz gâyh đutb stoif nyăngz gâyf cloon tayc nyăngz jau. 3Wâyc laiv huungđ gâyf njanh ayx max tuz, wâyc tăng stinb a bix đoonh wax đomc jau, Zâu Tênb-Huungh songđ wâyc stoif, bix paiđ Nănh cănh nyăngz Toonz taih ayx cayx năngđ stoif nyăngz stinb a, Nănh songđ yămz stinb a bix tingc stoif, 4phunz gâyf njanh nyăngz wax đomc peengh stimz nyăngz cumh pâuz jau tuz ayx săngh nzuf yămz pănh cah njaf, senz âyz Singx-Lingh ayx nyăngz munh, max zâyf âyz stinb a. 5Wâyc laiv lanh săngh âyz stinb a six cungb nyâyh tauv stinb a nyăngz jau cuungv, nzof laiv lanh ayx âyz Singx-Lingh six cungb nyâyh tauv Singx-Lingh nyăngz jau. 6Wâyc nyâyh stinb a nyăngz jau six zuc tayc, nzof nyâyh Singx-Lingh nyăngz jau six tuz săngh, yâuc peengh oonz; 7Năngđ nây, nyâyh stinb a nyăngz jau six nzeengz cloon Zâu Tênb-Huungh, wâyc nănh max buc Zâu Tênb-Huungh nyăngz gâyf njanh, nănh yâuc max hayh buc tuz. 8Laiv lanh săngh âyz stinb a six max hayh ayx phunz Zâu Tênb-Huungh numđ nyađ. 9Six năngđ coong Zâu Tênb-Huungh nyăngz Singx-Lingh senz yămz nyâuh nyăngz cah njaf, nyâuh six max ayx âyz stinb a, six ayx âyz Singx-Lingh. Nzof năngđ coong laiv lanh max naih Zâu Jix-Tuz nyăngz Singx-Lingh, wax tauh six max zâyf Nănh nyăngz munh. 10Wâyc năngđ coong Zâu Jix-Tuz yămz nyâuh cah njaf, hănđ six stinb a wâyc stoif bix zuc tayc, six mengc hoonh yâuc tuz săngh wâyc peengh stimz nyăngz jau. 11Nzof năngđ coong ayx phunz Zâu Yê-su tăng tayc săngh taih wax Tauh nyăngz Singx-Lingh yămz nyâuh cah njaf, six ayx phunz Zâu Yê-su Jix-Tuz tăng tayc săngh taih wax Tauh, lauf nongc Nănh nyăngz Singx-Lingh yămz nyâuh cah njaf, ayx phunz nyâuh hayh tayc nyăngz stinb a tuz săngh taih.

12Wâyc nây, yâuf pez lex, pănh max zâyf munh sămv stinb a nyăngz zaix, bix nongc ninyh ayx âyz stinb a. 13Wâyc năngđ coong nyâuh ayx âyz stinb a, nyâuh six zuc tayc, six năngđ coong nyâuh păngc Singx-Lingh, ayx phunz wax đomc stinb a nyăngz cumh pâuz tayc, nyâuh six tuz săngh. 14Wâyc tinyh phanv laiv lanh tuz Zâu Tênb-Huungh nyăngz Singx-Lingh yenv, wax đomc munh six Zâu Tênb-Huungh nyăngz toonz gôh. 15Nzof nyâuh tuz stipx Singx-Lingh six max zâyf zuc ayx nâuh, bix năngx zuc cumh nzav, six nyâuh stipx Singx-Lingh wâyc phunz tuz săngh sây hoonb, păngc nây pănh nzăngđ êu coong: “A-ba, Pha!” 16Singx-Lingh cănh ayx zanyx manyf cloon pănh nyăngz stimz nyâuđ coong pănh six Zâu Tênb-Huungh nyăngz toonz sab. 17Nzof năngđ coong pănh six toonz sab, six lauf săngh tuz stipx phănc nyăngz munh: tah yetx six săngh tuz stipx Zâu Tênb-Huungh nyăngz phănc wax đomc munh, nzof yâuc săngh tuz cloon Zâu Jix-Tuz stipx phănc nyăngz munh — năngđ coong pănh senz tuz cloon Nănh songc tanyđ zâuđ, pănh lauf tuz cloon Nănh songc gwăngz eeng.

18Wâyc yaz nyâyh taih nâyx zanyf zuc pongh nyăngz zâuđ nanc, lôx max payh tuz cloon cayx tuz hinđ setb taih phunz pănh nyăngz gwăngz eeng. 19Wâyc zuc, zuyx taih nyăngz muif huungđ, jinh đangh numđ nyađ sâub sâuđ zu, Zâu Tênb-Huungh nyăngz toonz sab hinđ setb taih nyăngz jau. 20Wâyc muif huungđ zuc buc yămz max săngh luungđ nyăngz jau, max zâyf cănh oix, six wâyc ayx phunz stiz zuc buc wax Tauh, yâuc nyâyh mungc 21coong, zuyx taih nyăngz muif huungđ six lauf tuz pungx goib, gâyh đutb zuc ayx nâuh phunz max săngh luungđ nyăngz jau, nongc tuz cloon Zâu Tênb-Huungh nyăngz toonz sab tuz pungx goib yămz gwăngz eeng cah njaf. 22Wâyc pănh pâyz tuz coong yetx stong zuyx taih nyăngz muif huungđ, six cungb yônx mengc yămz yâuc tanyđ dlauc wâyb munz zâuđ ayx tuz tauv nâyx yenh. 23Yâuc, max zâyf cungb nâyx cuungv, hănđ pănh lauf năngđ nâyx, max cun tuz stipx Singx-Lingh nyăngz zetx toongv stâuđ nyâyc — pănh lauf cănh cungb yônx mengc yămz, jinh đangh sâub sâuđ zu tuz pênx săngh sây hoonb, senz njâuv pănh nyăngz stinb a nyăngz jau. 24Pănh tuz njâuv six yămz njih mungc nyăngz jau. Six năngđ coong njih mungc bix tuz mangc phătc six max zâyf njih mungc nzof. Wâyc naih mănv năngx nyâyh mungc tauv nănh phătc nyăngz jau heh? 25Six năngđ coong pănh njih mungc yămz pănh max zeengx phătc nyăngz jau, pănh six jinh đangh numđ nyađ yâuc pungx stimz zu.

26Lauf tinyh năngđ, Singx-Lingh yâuc stăngc phunz pănh đoonh nyăngz jau. Wâyc zuc pănh max pâyz tuz pănh cayx cloo Zâu ayx laix tuz hoopđ, six Singx-Lingh yâuc cănh nongc wax đomc yônx mengc nyăngz stingb, max hayh coong tuz săngh wac stăngc pănh cloo Zâu. 27Senz zah munh nyăngz stimz nyâuđ wax Tauh yâuc pâyz tuz Singx-Lingh nyăngz zux ix six năngđ laix, wâyc Singx-Lingh âyz Zâu Tênb-Huungh nyăngz zux ix cloo tayv phunz wax đomc đăngb zeengh munh. 28Nzof, pănh pâyz tuz coong Zâu Tênb-Huungh cloopb dlonf muif huungđ taih six nongc phunz stăngz Nănh wax đomc munh tuz gongx, senz phunz wax đomc munh âyz Nănh nyăngz zux ix tuz sên taih wax đomc. 29Wâyc zuc Nănh pâyz quaix đangc wax đomc munh, Nănh yâuc tingc săngh phunz tuz cayx năngđ Nănh nyăngz Toonz nyăngz hanyh jangx nâyx, phunz wax tauh Toonz tuz ayx tah coonz yămz wax đomc muif lanh yâuf pez. 30Senz, Nănh tingc săngh quaix đangc wax đomc munh, Nănh yâuc sên wax đomc munh taih. Nzof laiv lanh munh tuz Nănh sên taih, Nănh yâuc stunx wax đomc munh six peengh stimz. Nzof Nănh stunx ayx peengh stimz wax đomc munh, Nănh yâuc ayx phunz wax đomc munh tuz gwăngz eeng.

31Năngđ nâyx, nâyx đomc jau pănh cayx coong laix? Năngđ coong Zâu Tênb-Huungh limb pănh, bix năngx naih mănv nzeengz pănh heh? 32Nănh senz max numđ stâyb Nănh nyăngz Toonz, yâuc jaoz wax tauh Toonz tayv phunz pănh muif lanh, nâyx bix năngx naih luungđ coong Nănh bix max sađ muif huungđ lêpc cloon wax tauh Toonz phunz pănh heh? 33Naih mănv hayh cooux tuz Zâu Tênb-Huungh sên taih nyăngz munh heh? Zâu Tênb-Huungh six stunx stiz ayx peengh stimz wax Tauh. 34Mănv six tingc nyăngz munh heh? Zâu Yê-su Jix-Tuz senz zuc tayc wax Tauh — yâuc max zâyf cungb nâyx cuungv, zef tuz ayx phunz tăng tayc săngh taih, Nănh yâuc năngx muf yămz Zâu Tênb-Huungh nyăngz byaoh phanx — yâuc jinh đangh yămz wa cloo tayv phunz pănh. 35Naih mănv hayh zeb tuz pănh gâyh Zâu Jix-Tuz nyăngz stăngz heh? Zâyf staiz nanc, zâuđ nanc, zuc ayx huđ, nyâuđ sab, max naih zuz, hayh hoiđ mengc, max six nzuc đao, max? 36Năngđ naih wac ja, coong:

“Wâyc Zâu, buz zuc tayx quaix noib.

Buz zuc munh mangc cayx năngđ cayx pax jiz yuungh nongc ênz ninyh ayx a.”

37Six, yămz wax đomc jau, pănh yâuc tuz hingh nzuf, păngc stăngz pănh wax Tauh. 38Wâyc yaz pâyz tuz coong, max naih laiv huungđ tayc nyăngz jau, max six săngh nyăngz jau, max six wax đomc stinz munh, max six naih lanyf cun nyăngz munh, max six nâyx zanyf nyăngz dlayc, max six đangz noib nyăngz dlayc, max six naih lanyf, 39max six staox njăngb, max six nzac đôz, max six zuyx taih nyăngz laiv huungđ, yâuc max naih luungđ hayh zeb tuz pănh ninyh gâyh Zâu Tênb-Huungh nyăngz stăngz, senz yămz Pănh nyăngz Zâu, six Zâu Yê-su Jix-Tuz cah njaf wax huungđ.