Lô-ma 1

1Yaz, Phao-lô, ayx Zâu Yê-su Jix-Tuz nyăngz pâuz, tuz sên taih ayx ah tauh cumh pâuz munh, tuz lanyc nongc nzônh Zâu Tênb-Huungh nyăngz Cuđ Jenx, 2nây Cuđ Jenx six tăng Zâu Tênb-Huungh nongc Nănh wax đomc tâuc wac munh nyunc taih quaix đangc yămz wa Canyx Stâub, 3coong tauv Nănh nyăngz Toonz — six tuz tăng Đa-witx huungh, wax stuungh munh steengb stâyv taih, săngh bamh munh wax Tauh, 4Nănh six tuz hipđ ayx Zâu Tênb-Huungh nyăngz Toonz, naih tômx jab tuz tăng tayc săngh taih, âyz đăngb zeengh nyăngz stimz stingx — wax tauh six Zâu Yê-su Jix-Tuz, pănh nyăngz Zâu, 5yâuc păngc Nănh, buz nzăngđ tuz stipx nâyx huungđ pôz, yâuc tuz ayx cumh pâuz munh, wâyc nongc ênz manf stingx munh lauf zen păngc Nănh nyăngz manyh, yâuc mungv Nănh nyăngz wac, 6yămz nâyx đomc nyâuh six lauf tuz Nănh sên taih săngh Zâu Yê-su Jix-Tuz nyăngz munh. 7Yaz pungx ninyh tauv muif lanh yămz wa Lô-ma dlanyh nyăngz munh, senz Zâu Tênb-Huungh stăngz nyăngz munh, six tuz sên taih nongc ayx đăngb zeengh munh wax đomc: Cloo pănh nyăngz Tênb-toongh Pha, six Zâu Tênb-Huungh cloon Zâu Yê-su Jix-Tuz sađ pôz sađ peengh oonz phunz nyâuh.

8Tah yetx, yaz păngc Zâu Yê-su Jix-Tuz, wâyc nyâuh muif lanh, sâuf hâuđ yaz nyăngz Zâu Tênb-Huungh, wâyc nyâuh nyăngz zen stimz tuz nzônh nzêux pong nây guungh đi. 9Wâyc Zâu Tênb-Huungh, senz yaz nongc nzuf stimz nyâuđ ayx cumh pâuz, nzônh Nănh nyăngz Toonz nyăngz Cuđ Jenx wax Tauh, cănh ayx zanyx manyf phunz yaz, coong yaz six đamv tauv nyâuh max setc tiny, 10Laiv zanyf yaz cloo Zâu, yaz yâuc joođ coong, năngđ coong hayh tuz, nâyx zanyf max six tauv tix zanyf, phunz yaz hayh tuz ninyh tauv nyâuh wa, âyz Zâu Tênb-Huungh nyăngz zux ix. 11Wâyc yaz senz numđ oix tuz pongh nyâuh nzongf, phunz yaz hayh lănv bux nyâuh tauv njâuv pôz nyăngz jau, phunz nyâuh hayh tuz zen tăngđ, 12nây six yaz oix cloon nyâuh yămz, phunz pănh tuz lanh oonz lanh nyăngz nyâuđ, pănh nzăngđ hayh tinyh đoih naih zen stimz tăngđ, njinh yaz cloon nyâuh. 13Yâuf pez lex, yaz max oix nongc nyâuh max pâyz tuz coong, naih đuungx hâyđ yaz đa ninyh nyâuh wa, phunz yaz lauf hayh stâub tuz tix huungđ yămz nyâuh, lauf cayx năngđ yămz wax đomc pitc stingx munh nâyx, (six yaz zuc njanh tuz tauv nâyx zanyf). 14Yaz sămv nzuf njinh Hi-lapc munh cloon munh huđ munh, njinh munh lemđ cloon munh oongx. 15Wâyc nây, yaz senz numđ joomz nyâuđ nongc nzônh Cuđ Jenx phunz cloon nyâuh, yămz Lô-ma dlanyh nyăngz munh.

16Yaz senz max numđ nyayz Cuđ Jenx, wâyc zuc nây Cuđ Jenx six Zâu Tênb-Huungh nyăngz tômx jab, nongc njâuv muif lanh zen nyăngz munh, tah yetx six nongc njâuv Yu-tai munh, zef phunz Hi-lapc munh. 17Wâyc Zâu Tênb-Huungh nyăngz peengh stimz six tuz hinđ manyf yămz nây Cuđ Jenx, tăng zen stimz tauv zen stimz, cayx năngđ naih ja coong: “Peengh stimz nyăngz munh six săngh wâyc zen stimz.”

18Wâyc Zâu Tênb-Huungh tingc stoif nyăngz jau tăng guungh hinđ manyf setb taih, nzeengz cloon munh ayx huđ nyăngz jau, cloon max peengh stimz nyăngz jau, six ayx huđ nhlengc cloon senz gâyf wax đomc munh, 19Wâyc zuc laiv huungđ hayh pâyz tauv Zâu Tênb-Huungh yâuc tuz hinđ setb taih phunz stiz nzuf nzof, Zâu Tênb-Huungh bâyf ayx phunz stiz pâyz wax huungđ nzof. 20Wâyc tăng zuyx guungh zuyx nib wax zanyf, Nănh nyăngz laiv huungđ mangc max phătc wax đomc, six Nănh stâyv quâyx nyăngz stimz stingx cloon tômx jab, yâuc tuz hinđ manyf setb taih, wâyc tuz mâyc phătc nzuf Nănh nyăngz muif huungđ jau, stiz songđ max hayh naih jau pyenv. 21Wâyc hănđ pâyz Zâu Tênb-Huungh, stiz lauf max canyx bongc Nănh six Zâu Tênb-Huungh, yâuc max hâuđ Nănh. Wâyc nây, yămz stiz cănh nyâyh nyăngz jau songđ max săngh nongc, nzof stiz nyăngz nyâuđ yâuc oongx zuc nzămc nyăngz jab tăng nzuf. 22Stiz cănh tanv stiz naih tongb manyh, six stiz oongx nzongf, 23stiz yâuc coi wănc Zâu Tênb-Huungh max hayh jac nyăngz gwăngz eeng, taih payh cloon bamh munh hayh yootz nyăngz hanyh jangx, năngđ nooc nyăngz, steengb hauđ, cloon nyoongz nib minc nyăngz tax huungđ.

24Wâyc nây Zâu Tênb-Huungh songđ dluyh phunz stiz cănh âyz stiz nyăngz nyâuđ nyâyh ayx max đăngb zeengh nyăngz jau, phunz stiz lanh cănh ayx wâyx lanh nyăngz stinb, 25stiz six wax đomc munh coi wănc Zâu Tênb-Huungh nyăngz senz gâyf taih ayx za gâyf, yâuc bokc dlic canyx bongc zuyx taih nyăngz tax huungđ, tayv Zuyx Guungh Zuyx Nib Wax Tauh, six hoopđ zuc tanv tauv banc stâyv banc đaic wax Tauh. A-meen.

26Six wâyc nâyx, Zâu Tênb-Huungh songđ dluyh phunz stiz cănh ninyh ayx nyayz nyăngz dlayc, stiz wax đomc munh nzif cănh queengx max nongc munh pha, munh nzif zef cănh nongc munh nzif, 27hănđ, munh pha lauf tinyh năngđ, queengx max nongc munh nzif, yâuc cănh joomz nyâuđ lanh nongc lanh, munh pha yâuc cănh căn munh pha ayx nyayz nyăngz dlayc, nzof stiz songđ cănh zuc tingc stoif niđ, âyz stiz ayx longđ wax đomc stoif.

28Wâyc zuc stiz max năngx cayb zah lov oix pâyz tuz Zâu Tênb-Huungh, Zâu Tênb-Huungh songđ dluyh phunz stiz cănh nyâyh huđ nyăngz jau, yâuc ayx max săngh nyăngz jau, 29stiz naih pong nzuf muif huungđ max peengh stimz nyăngz jau, ayx okx, mauh tax huungđ, nyâuđ tôc; naih pong nzuf tinyh hănđ nyăngz jau, tayx munh, tinyh nzeengz, puv maoh jaf munh, nyâyh oix hoiđ munh; coong wac zokb, 30zăpc munh, hănđ Zâu Tênb-Huungh, siv totc, ayx lub, nzetx lub, cungb nyâyh oix ayx huđ nyăngz jau, max mungv nzif pha, 31nyâuđ njaf găpc, max âyz nyunc nyăngz wac ayx, max nyâyh tauv mănv, max naih nyâuđ hâuđ lênh munh. 32Stiz hănđ pâyz tuz Zâu Tênb-Huungh nyăngz gâyf njanh coong, laiv lanh ayx nâyx đomc stoif six zuc tayc, năngđ nâyx stiz yâuc max zâyf cungb cănh ayx wax đomc stoif cuungv, phătc munh ayx stiz zef năngx numđ nyađ.