Dao Ao Dai Literal Text
Cumh Pâuz 28
Tauv tuz gongx nzuf nzof, wax zanyf buz nzăngc pâyz tuz coong nâyx nomz coiđ njeengh bux hipđ ayx moon-ta. Nzof, yămz wa nyăngz munh stipx buz gongx nzongf, wâyc naih ah tâuc bungc nzac taih yâuc song, stiz songđ cuyx tâuf stipx buz tinyh đoih. Six Phao-lô ston tuz ah ploc stangh songđ quanyf ănz nzac tâuf ninyh, yâuc naih ah tauh nangz meengz, tăng wa tinc joomz lunb setb taih, jeo nănh nyăngz puf sen đangz. Wax zanyf, yămz wa stâyz phangz nyăngz munh phătc wax tauh nangz jeo nănh nyăngz puf, stiz lanh coong ănz lanh: “Lâyc tauh munh six bâyf tayx munh nyăngz munh, nănh hănđ tuz njâuv tăng womz setb taih, six peengh stimz gâyf max phunz săngh.” Six, Phao-lô quanyf wax tauh nangz meengz nzac tâuf ninyh, nănh yâuc max naih săngh laix tiny. Nzof, wax đomc munh six nyâyh coong ah zanyf nănh six bâyf omx pauv têx max six toongx sangf glinyf tayc. Six stiz seetx mangc ah dlapc lauh yâuc max phătc nănh săngh laix, stiz zef plănc taih coong, nănh six ah tauh stinz.
Wax zanyf, yămz quib wa cah sinh wax đomc nib six ayx pyây cun wax nomz coiđ njeengh wax tauh munh nyăngz, bux hipđ ayx Bupc-li-atc, nănh yâuc nongc nyâuđ stipx buz gongx nzongf, tuz pôz noib. Wax zanyf, Bupc-li-atc nyăngz pha jinh đangh phâyx wa zâuv wâyc săngh bah song gumc cloon nyâuđ munz stib, Phao-lô songđ ninyh tex nănh yâuc cloo Zâu phunz, tăpx puf ănz nănh, yâuc zany gongx phunz nănh. Tăng wa, nâyx huungđ dlayc setb taih, yămz wa coiđ njeengh wax đomc săngh gumc nyăngz munh songđ taih lov Phao-lô yâuc tuz zany gongx nzuf, stiz yâuc nongc buz saix nzongf, nzof tauv buz nzac đangđ ninyh wax zanyf, stiz yâuc nzâyz buz sămv nongc nyăngz đuungx huungđ taih cungb stungx phunz buz.
Blătc pôz lav cah đangz, buz songđ nzac ah saz đangđ ninyh naih stuc Đi-ôt-cu-li nyăngz hanyh, tăng A-lêk-san-đê-li taih yămz wa coiđ njeengh quaix guungh song. Tauv tuz muf zapz wa Sai-la-ciu, buz songđ yămz wa pôz noib. Tăng wa nzac đangđ ninyh, buz ninyh tauv Lê-yi-um dlanyh, tah nyâyc noib naih nzaox tăng namh pôngz sâyb, cah đangz ah noib timb buz songđ ninyh tauv Bu-ti-ô-li dlanyh, yămz wa buz pongh ah đomc yâuf pez, stiz yac êu buz cloon stiz yămz wa nhlic noib, năngđ nâyx, buz songđ ninyh tauv Lô-ma. Tăng wa, wax đomc yâuf pez numđ coong tauv buz, songđ taih yămz wa Ap-bi-atc caiz, cloon pôz nomz quanx pongh buz, phătc stiz Phao-lô songđ numđ oonz nyâuđ, yâuc sâuf hâuđ Zâu Tênb-Huungh.
Tauv buz nzac Lô-ma dlanyh ninyh, Phao-lô songđ tuz cănh lanyc yămz cloon ah tauh peengz jămđ nănh.
Pôz noib cah đangz, nănh êu wax đomc Yu-tai munh wax đomc songx munh côx tinyh đoih taih. Tauv stiz taih, nănh songđ coong ănz stiz: “Songx yâuf pez lex, yaz hănđ max ayx luungđ nzeengz cloon pec stingx max six pănh claof jex nyăngz gâyf, yaz lôx năngx zuc zoz tăng wa Yê-lu-sa-lem ênz taih cayx năngđ stoif munh, yămz Lô-ma munh nyăngz puf đi, nzof stiz cănh zah naic yaz tuz, lôx cayx đa pungx yaz, wâyc yaz max naih laiv huungđ stoif hoopđ zuc tayc. Six wâyc Yu-tai munh max nyenc, yaz songđ zuc joođ taih tauv Sê-sa — nzof yaz yâuc max zâyf oix cooux cănh nyăngz pec stingx. Wâyc năngđ nây, yaz songđ êu nyâuh taih tinyh pongh nongc coong wac. Yâuc wâyc I-sa-la-ên munh nyăngz njih mungc, yaz bix zuc njab langb stayb nây.” Six stiz coong ănz nănh: “Buz max zeengx tuz stipx laiv zây jenx coong tauv mâyh tăng wa Yu-đê stâyz phangz, yâuc max naih laiv lanh yâuf pez taih bux max six coong tauv mâyh laiv huungđ huđ dlayc. Six buz numđ hoopđ zuc mungv tăng mâyh, jađ mâyh nyâyh ayx laix, wâyc coong tauv nâyx huungđ gâyf, buz six pâyz coong, zuc munh nzeengz pong muif đoif nzuf.”
Tăng wa, stiz songđ cănđ noib phunz nănh, yâuc naih munh đuungx nzongf taih pongh nănh yămz nănh nyăngz tinc, tăng guungh gwăngz tauv guungh nzămc, nănh coong bux stiz, yâuc ayx zanyx manyf coong tauv Zâu Tênb-Huungh nyăngz côkz, yâuc zoz Mô-sê nyăngz gâyf njanh cloon wax đomc tâuc wac munh nyăngz stâub taih quinb bux stiz coong tauv Zâu Yê-su. Naih ah phanx songđ zen nănh coong wax đomc, six naih ah phanx yâuc max zen. Stiz songđ max tinyh zuc, bix tiuv muf, Phao-lô songđ coong nâyx zâux wac, coong: “Zâu Singx-Lingh nongc tâuc wac munh I-sa-ya coong nyăngz wac ănz nyâuh nyăngz claof jex, senz toix nzongf, coong: ‘Oix zuc ninyh tauv nâyx đomc pec stingx yâuc coong:
“Nyâuh mungv, six hănđ mungv, nyâuh yâuc max saz,
nzof nyâuh mangc, six hănđ mangc, nyâuh yâuc max phătc.”
Wâyc nâyx đomc pec stingx nyăngz nyâuđ nhlengc,
stiz ayx bah noomh max numđ,
yâuc nzipx stiz nyăngz mâyc,
sangx tauv tix zanyf, stiz nyăngz mâyc hayh mangc tuz phătc,
bah noomh yâuc mungv tuz numđ, nyâuđ yâuc hayh manyh pec,
stiz bix phunb đangz lauf,
Yaz songđ zany gongx phunz stiz.’
Wâyc nây, nyâuh six oix zuc pâyz coong, nây Zâu Tênb-Huungh nyăngz njâuv pôz six tuz ninyh nzônh phunz pitc stingx munh, nzof wax đomc munh six mungv lêpc.” [Tauv nănh coong tuz wax đomc wac, wax đomc Yu-tai munh songđ muf yâuc naih tinyh zenđ lub nzongf yămz stiz.]
Wax zanyf, Phao-lô yămz nănh tingc yămz wax sênz pyau tuz iz nyăngv cah njaf, yâuc stipx taih lov nănh wax đomc munh, songđ lănv nzônh coong tauv Zâu Tênb-Huungh nyăngz côkz, yâuc tuz pungx stimz nzaox tauv Zâu Yê-su Jix-Tuz nyăngz jau, yâuc max naih mănv cangđ.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.