Dao Ao Dai Literal Text
Ma-tai 5
Wax zanyf, phătc naih songx munh hongđ, Zâu Yê-su songđ staox wax zâyđ zoongz ninyh, Nănh stâyv nzac, Nănh wax đomc stayb sây buz lauf taih cloon Nănh yămz wa. Nănh songđ goib nzetx nzaox nănh stiz coong:
“Munh stimz nyâuđ numđ sămv Zâu wax đomc, naih oonz looc gôh,
wâyc Tênb-toongh côkz six săngh stiz nyăngz.
Munh munz stimz haoh wax đomc naih oonz looc gôh,
wâyc stiz six tuz oonz nyâuđ.
Wax đomc munh nyâuđ dlênc, naih oonz looc gôh,
wâyc stiz six tuz stipx nib.
Ngooc oix lov peengh stimz nyăngz jau wax đomc munh, naih oonz looc gôh,
wâyc nănh stiz oix tuz pong stimz pong âyx.
Hayh hâuđ lênh munh wax đomc, naih oonz looc gôh,
wâyc stiz lauf tuz hâuđ lênh.
Naih đăngb zeengh stimz wax đomc munh, naih oonz looc gôh,
wâyc stiz oix tuz phătc Zâu Tênb-Huungh.
Quinb iz phangz hoopđ taih wax đomc munh, naih oonz looc gôh,
wâyc stiz oix tuz hipđ ayx Zâu Tênb-Huungh nyăngz toonz sab.
Wâyc ayx peengh stimz bix zuc ayx huđ wax đomc munh, naih oonz looc gôh,
wâyc Tênb-toongh côkz six stiz nyăngz.
Nyâuh wâyc yaz bix zuc munh phătc stanc, zuc ayx huđ ayx đokc, cloon zuc munh coong muif huungđ huđ toopz ănz nyâuh, nyâuh songđ naih oonz looc gôh.
Oix zuc gwanb looc yâuc numđ nyađ, wâyc nyâuh naih stâuđ nyâyc lub nzongf yămz wa Tênb-toongh, wâyc cah đangc wax đomc tâuc wac munh, lauf zuc munh ayx huđ cayx năngđ nyâuh nâyx.
Nyâuh six ayx nib nyăngz đau, năngđ coong đau zuc stam ninyh bix zoz luungđ ayx phunz nănh đaih taih heh? Cungb hayh ninyh lokx quanyf queengx phunz munh zaiđ cuungv, wâyc max hayh nongc ayx luungđ nzof. Nyâuh six ayx gwăngz yămz nây bamh canz. Ah nomz steengv yămz wa zoongz đany six max hayh pinyx tuz vâyv. Yâuc max naih mănv pu toongz sac bix tăpx ănz wa tongđ njaf, six cungb tăpx wa toongz jax nongc siux gwăngz pyau njaf munh. Lauf tinyh năngđ, nyâuh oix zuc ayx gwăngz siux phunz munh tinyh đoih, ayx laix tuz phunz munh phătc nyâuh ayx gongx nyăngz jau, bix tanv nyâuh nyăngz Tênb-toongh Pha.
Nyâuh năngx gâyf nyâyh coong, yaz taih quanyf gâyf njanh cloon tâuc wac munh nyăngz wac. Yaz taih six max zâyf quanyf, six wâyc ayx phunz clăkx clunh nzuf. Yaz coong senz bux nyâuh, nâyx nomz guungh nib max zeengx quaix ninyh, six gâyf njanh nyăngz ah nokx ah wec đăngc lauf max quaix ninyh, zu tauv muif huungđ clăkx clunh nzuf. Wâyc nây, năngđ coong laiv lanh quanyf wax đomc ah tiuh jenz quaix nyăngz gâyf, bix zef nzaox munh ayx max âyz yămz wa Tênb-toongh côkz nănh six ayx năngx jenz têx. Six laiv lanh ayx âyz bix zef nzaox êu munh ayx âyz, yămz Tênb-toongh côkz nănh six tuz ayx năngx lub têx. Yaz coong bux nyâuh năngđ coong nyâuh ayx gongx nyăngz jau, bix max blătc wax đomc nzaox gâyf stênx steengb cloon Pha-li-si munh, nyâuh six max hayh tuz nzac Tênb-toongh côkz.
Nyâuh tuz numđ ayx nâyx, lôx noib munh nzaox coong: ‘Max tuz tayx munh,’ năngđ coong ‘Laiv lanh tayx munh six zuc tingc stoif.’ Six yaz bux nyâuh tinyh phanv laiv lanh nhlenx nănh nyăngz yâuf pez six zuc tingc stoif. Laiv lanh mađ nănh nyăngz yâuf pez coong: ‘Munh oongx!’ Six zuc ênz ninyh stămđ stoif. Laiv lanh mađ munh coong: ‘Tauh munh vutx!’ six zuc quanyf ănz wa tâuf coiđ. Wâyc nây, năngđ coong nyâuh jinh đangh nzâyz nyâuh nyăngz tax huungđ ninyh congx phunz Zâu Tênb-Huungh, yămz wa bix săngx tauv mâyh nyăngz yâuf pez naih ayx laiv huungđ max hoođ mâyh, oix zuc tăpx mâyh nyăngz tax huungđ ănz wa coongx tinc cah đangc, bix phunb đangz muf cloon mâyh nyăngz nyăngz yâuf pez ayx gongx đangc, nzof mănc zoz mâyh nyăngz tax huungđ taih congx. Munh ênz nyâuh ninyh wa dlayc tinc cooux nyâuh, ninyh tauv bah đamx jau oix zuc coonx căn wax tauh munh ayx gongx, năngđ max têx nănh six jaoz mâyh phunz stămđ stoif quanz, stămđ stoif quanz jaoz phunz huungh peengz, mâyh songđ zuc yămz nzauh gôh. Yaz coong senz bux nyâuh, nyâuh six max tuz setb wa nzauh, zu tauv laiv zanyf nyâuh clao soongb nzuf byăng wax nomz tongh stinh zaix.
Nyâuh tuz numđ, munh nzaox nâyx đomc wac coong: ‘Max tuz ninyh văngf munh.’ Six yaz coong bux nyâuh, tinyh phanv laiv lanh mangc munh nzif bix yămz nyâuđ numđ oix wax tauh munh nzif, wax tauh bâyf yămz nyâuđ cloon nănh longđ stoif nzof gôh. Năngđ coong nyâuh nyăngz byaoh nomz mâyc ayx phunz nyâuh longđ stoif, oix zuc ngwâyz nănh quanyf năngx gâyh nyâuh, nyâuh nyăngz ah phănc stinb sangc huđ ninyh six năngx gongx têx, wâyc phunz nyâuh max zuc njinh stinb quanyf ănz wa tâuf coiđ. Năngđ coong nyâuh nyăngz byaoh saz puf ayx phunz nyâuh longđ stoif, oix zuc zăm quanyf năngx gâyh nyâuh, nyâuh nyăngz ah phănc stinb sangc huđ ninyh six năngx gongx têx, wâyc phunz nyâuh max zuc njinh stinb ninyh nzac tâuf coiđ. Nyâuh numđ munh nzaox coong: ‘Laiv lanh munh queengx nănh nyăngz au, nănh six zuc ayx ah zây stâub queengx phunz au.’ Six yaz coong bux nyâuh tinyh phanv laiv lanh queengx nănh nyăngz au, bix max zâyf wâyc nănh nyăngz au ninyh văngf munh, nănh six ayx phunz wax tauh au pênx pongz lauh nyăngz munh, laiv lanh zoz zuc queengx wax tauh au nongc, six ayx pongz lauh nyăngz stoif.
Nyâuh numđ lôx noib munh nzaox nâyx đomc wac coong: ‘Năngx gâyf puv maoh nyunc wac, mâyh yămz Zâu cah đangc nyunc nyăngz wac oix zuc ayx âyz.’ Six yaz coong bux nyâuh năngx gâyf nyunc laiv huungđ wac tiny, năngx gâyf nuz guungh nyunc wac, wâyc guungh six Zâu Tênb-Huungh nyăngz tinc; yâuc năngx gâyf nuz nib nyunc wac, wâyc nib six Nănh zaiđ nyăngz tinc; yâuc năngx gâyf nuz Yê-lu-sa-lem dlanyh nyunc wac, wâyc wa six huungh stix lub nyăngz dlanyh. Năngx gâyf nuz nyâuh nyăngz pyây nyunc wac, wâyc nyâuh max hayh cănh ayx phunz, nyâuh nyăngz ah stinz pyây đongz jaz max six pec. Nyâuh six oix zuc coong ayx nâyx ‘Naih, six coong naih,’ ‘Max naih, six coong max naih.’ Năngx staix coong đuungx nây, six tăng manđ huungh taih.
Nyâuh tuz numđ munh, nzaox coong ayx nâyx: ‘Mâyc clao mâyc, nyah clao nyah.’ Six, yaz coong bux nyâuh, năngx gâyf, tămx munh huđ munh. Năngđ coong, laiv lanh beb nyâuh byaoh phanx minb, bix winb cloon staix wax phanx minb phunz nănh. Năngđ naih munh ninyh dlayc tinc oix cooux nyâuh nongc nyâuh cah njaf wax byenđ guyz, bix phunz nănh zoz cloon cungh ngwaic wax byenđ guyz. Năngđ coong naih munh phađ nyâuh ninyh ah gâyf jau, nyâuh bix cloon nănh ninyh iz gâyf. Munh joođ nyâuh nyăngz luungđ, oix zuc phunz, munh taih ca nyâuh nyăngz luungđ six năngx gâyf winb minb ănz.
Nyâuh tuz numđ munh nzaox coong, ayx nâyx: ‘Oix zuc stăngz pănh nyăngz yâuf pez, bix hănđ pănh nyăngz yônz zaz.’ Six yaz coong bux nyâuh, oix zuc stăngz nyâuh nyăngz yônz zaz, yâuc cloo Zâu phunz ayx đokc ănz nyâuh wax đomc, phunz nyâuh tuz săngh Zâu Tênb-Huungh nyăngz toonz sab yămz wa Tênb-toongh. Wâyc Nănh ayx phunz Nănh nyăngz bah noib setb taih siux munh gongx cloon munh huđ, Nănh lauf ayx bungc phunz munh peengh cloon munh max peengh. Năngđ coong nyâuh cungb stăngz, wax đomc munh stăngz nyâuh, nyâuh hayh tuz luungđ stâuđ nyâyc heh? Hănđ wax đomc sâub sôiv munh six lauf ayx năngđ nâyx lec max zâyf haz? Năngđ coong nyâuh cungb stipx nyâuh nyăngz yâuf pez cuungv, nyâuh ayx tuz luungđ blătc munh heh? Wax đomc max zen nyăngz munh, six lauf ayx nâyx lec max zâyf haz? Năngđ nây, nyâuh oix zuc ayx năngx clăkx clunh nzuf, cayx năngđ nyâuh nyăngz Tênb-toongh Pha nâyx six clăkx clunh.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.