Dao Ao Dai Literal Text
Ma-tai 22
Zef ah hâyđ timb, Zâu Yê-su nongc wac pây tauz ănz stiz, coong: “Tênb-toongh côkz six lauf pây năngđ ah tauh huungh, six huungh bênc ah phangz coonx hinh phunz nănh nyăngz toonz. Huungh êu nănh wax đomc pâuz ninyh bux tuz êu nyăngz zeb munh taih nzac coonx hinh, six stiz max oix taih. Huungh zef êu pitc đomc pâuz ninyh, coong: ‘Oix zuc coong bux ănz zeb munh tuz êu wax đomc: “Mangc jađ, yaz bênc săngh yaz nyăngz hinh. Wax đomc ngoongh wăngh cloon yaz nyăngz stanyb hauđ cunc ayx a soongb nzuf, muif huungđ bênc săngh gôh. Oix zuc taih nzac hinh.”’ Six stiz ayx max pâyz zâyx tiny, nâyx lanh ninyh nănh nyăngz njingh wax lanh yâuc ninyh ayx nănh nyăngz steengb âyx. Yăngc nzac wax đomc, yâuc zoz huungh wax đomc pâuz nzâyz taih mađ yâuc tayx tayc. Tăng wa, huungh songđ siv nhlenx, songđ paiđ nănh nyăngz peengz ninyh, nănh mêtc wax đomc tayx munh nyăngz munh yâuc pu stiz nyăngz dlanyh. Blătc wa huungh coong ănz nănh nyăngz pâuz: ‘Coonx hinh manyf tuz bênc săngh, six tuz êu taih wax đomc yâuc max payh taih. Năngđ nây, nyâuh bix ninyh yămz wax đomc jau zav, năngđ coong nyâuh phătc sax lanh munh, bix êu stiz taih nzac coonx hinh.’ Wax đomc pâuz, ninyh yămz wax đomc jau zav, stiz phătc sax lanh munh stiz êu taih nzuf, njinh huđ lauf naih gongx lauf naih, tăng wa hinh songđ naih zeb munh pong nzuf. Six tauv nzac ninyh mangc zeb munh stâyv hinh nhlinc wax zanyf, huungh phătc ah lanh munh max zuz ninyh coonx hinh nyăngz guyz quav. Huungh coong wax lanh munh: ‘Lah pyeoz lex, săngh laix mâyh taih nây bix max zuz ninyh coonx hinh nyăngz guyz quav heh?’ Six wax lanh munh mayv tauz. Tăng wa, huungh êu wax đomc pâuz coong: ‘Oix zuc stayb nâyx lanh munh nyăngz puf staux bix quanyf nănh ănz wa cungh ngwaic nzămc nyăngz tinc, yămz wa naih pungx stingb haoh cloon tăpc nyah tanyđ.’ Wâyc munh đuungx tuz êu, six munh stoc tuz sên.”
Wax zanyf, wax đomc Pha-li-si munh songđ setb ninyh tinyh sangv stuv jau ayx laix stiv phunz Zâu Yê-su coong longđ. Stiz paiđ stiz wax đomc stayb sây, cloon Hê-lôtx nyăngz wax peob munh ninyh, pongh Zâu Yê-su, naic coong: “Stênx steengb lex, buz pâyz coong mâyh six nyâuđ zac nyăngz munh yâuc nzaox Zâu Tênb-Huungh nyăngz jau toix senz gâyf nzuf, yămz mâyh yâuc max nyangc toix laiv lanh, wâyc mâyh max cungb mangc yămz munh nyăngz cungh ngwaic. Năngđ nây, joođ bux buz mâyh nyâyh năngđ laix heh? Tuz setb sôiv nyanh phunz Sê-sa max?” Six wâyc pâyz tuz stiz nyăngz nyâuđ huđ, Zâu Yê-su coong: “Pâyc zac nyâuđ yootz nyăngz munh lex săngh laix nyâuh bix zangđ yaz? Phunz yaz mangc ah nomz setb sôiv nyanh geh.” Stiz nzâyz ah nomz nyanh taih phunz Nănh. Nănh coong ănz stiz: “Nây hanyh cloon manyh six mănv nyăngz heh?” Stiz tauz: “Sê-sa nyăngz.” Wax zanyf, Zâu Yê-su songđ coong ănz stiz: “Năngđ nây, laiv huungđ Sê-sa nyăngz oix zuc toiv phunz Sê-sa zef laiv huungđ Zâu Tênb-Huungh nyăngz yâuc phunz Zâu Tênb-Huungh.” Mungv numđ nâyx đomc wac, stiz numđ nyâyh ganc, stiz songđ tiuv, queengx Nănh ănz wa.
Lauf wax noib, naih ah đomc Sa-đu-si munh taih stătx Zâu Yê-su, wâyc stiz njinh leox coong munh tayc max hayh săngh taih, stiz songđ taih naic Nănh, coong: “Stênx steengb lex, Mô-sê coong: ‘Năngđ coong naih tix lanh munh tayc bix max zeengx naih sây, nănh nyăngz yâuf six zuc zoz tah nyăngz au nongc yâuc steengb sây phunz nănh nyăngz tah.’ Six yămz buz nây naih nhlic lanh yâuf pez, zetx lanh zoongz pyau blătc, yâuc tayc. Queengx nănh nyăngz au phunz nănh nyăngz yâuf, max zeengx naih sây. Tah nyâyc lanh zef tauv tah stamz lanh, zef ninyh tauv tah jetb lanh, lauf tinyh năngđ. Tăng wa blătc quaix đangz, tauh munh nzif zef tayc. Năngđ nâyx, tauv săngh taih, tauh munh nzif six mănv nyăngz au heh yămz stiz wa nhlic lanh yâuf pez? Wâyc stiz muif lanh tuz zoz nănh quaix nzuf.” Six Zâu Yê-su tauz ănz stiz coong: “Nyâuh longđ nzuf nzof gôh, wâyc max pâyz Canyx Stâub cloon Zâu Tênb-Huungh nyăngz jab. Wâyc tauv săngh taih, munh six max zoz au max zoz langh, stiz six cayx năngđ wax đomc stinz munh yămz wa cah zâyc guungh nâyx. Coong tauv munh tayc săngh taih, nyâuh max zeengx toc quaix Zâu Tênb-Huungh nyăngz wac coong: ‘Yaz six Apx-la-ham nyăngz Zâu Tênb-Huungh, I-sakx nyăngz Zâu Tênb-Huungh cloon Ya-côpx nyăngz Zâu Tênb-Huungh’? Zâu Tênb-Huungh six max zâyf munh tayc nyăngz, six munh săngh nyăngz.” Numđ nâyx đomc wac, songx munh songđ numđ nyâyh ganc tauv Nănh nzaox nyăngz jau.
Năngx naih wax đomc Pha-li-si munh numđ coong Zâu Yê-su ayx phunz Sa-đu-si munh mayv tauz, songđ tinyh ênz taih căpx dlonf. Yămz stiz wax peob naih ah lanh, nzaox gâyf munh, taih zangđ naic Zâu Yê-su — “Stênx steengb lex, yămz gâyf njanh six laiv tiuh năngx lub têx heh?” Nănh songđ tauz wax lanh munh coong: “‘Oix zuc nongc nzuf mâyh nyăngz nyâuđ, nongc nzuf mâyh nyăngz stimz, nongc nzuf mâyh nyăngz zux ix, stăngz Zâu, mâyh nyăngz Zâu Tênb-Huungh.’ Nâyx tiuh six năngx lub têx, yâuc năngx nongc sen têx. Zef tah nyâyc tiuh lauf năngđ nâyx — ‘Oix zuc stăngz mâyh nyăngz cah sinh munh năngđ mâyh cănh nyăngz stinb.’ Muif tiuh gâyf njanh cloon wax đomc tâuc taih nyăngz wac six cloopb yămz nây iz tiuh nzuf.”
Wax zanyf, wax đomc Pha-li-si munh tinyh đoih căpx dlonf, Zâu Yê-su naic stiz, coong: “Nyâuh nyâyh Zâu Jix-Tuz six năngđ laix heh? Nănh six mănv nyăngz sây stunz?” Stiz tauz Nănh: “Đa-witx huungh nyăngz.” Nănh coong ănz stiz: “Ha ayx laix bix Đa-witx, yămz Singx-Lingh, yâuc hipđ Nănh ayx Zâu, coong:
‘Zâu coong bux yaz nyăngz Zâu:
“Taih stâyv yămz Yaz nyăngz byaoh phanx,
zu tauv laiv zanyf Yaz phunz mâyh nyăngz yônz zaz yămz mâyh nyăngz staux đi”’?
Ha năngđ coong Đa-witx hipđ Nănh ayx ‘Zâu,’ ayx laix Nănh zef năngx ayx Đa-witx nyăngz sây stunz?” Max naih mănv hayh tauz Nănh zâux tiny, tăng wax noib staox ninyh, yâuc max naih mănv năngx nzađ naic Nănh.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.