Skip to content
BibleKenya

Dao Ao Dai Literal Text

Ma-tai 19

Zâu Yê-su coong wax đomc wac soongb, Nănh ninyh gâyh Ga-li-lê yâuc ninyh tauv Yu-đê stâyz phangz yămz wax nganđ leepb Njoh-đen wăngx. Wax đomc songx munh đuungx lêpc Nănh Nănh yâuc yămz wa zany gumc phunz stiz.

Naih ah đomc Pha-li-si munh taih stătx Zâu Yê-su, yâuc zangđ naic Nănh coong: “Max cun wâyc laiv huungđ phunz ah lanh munh pha queengx nănh nyăngz au hoopđ max hoopđ heh?” Six Zâu Yê-su tauz, coong: “Nyâuh max zeengx toc quaix, Zâu Tênb-Huungh tăng quef coonz zuyx guungh zuyx nib yâuc zuyx tah yetx toix munh, ah lanh munh toonz cloon ah lanh munh sab, yâuc coong: ‘Wâyc năngđ nây, munh toonz six zuc gâyh nzif pha bix cloon nănh nyăngz au songc tinc yămz, stiz iz lanh six săngh ah nomz stinb’ nâyx haz? Năngđ nâyx, stiz six max năngx zâyf iz, six cungb ah nomz stinb cuungv. Wâyc nây, laiv huungđ Zâu Tênb-Huungh căpx taih, bamh munh six max tuz zeb gâyh.” Stiz coong ănz Nănh: “Ha, săngh laix Mô-sê bix coong zuc ja ah zây gâyh stayb sâub mănc queengx au heh?” Nănh tauz stiz coong: “Six wâyc nyâuh nyăngz nyâuđ nhlengc Mô-sê nzăngđ phunz nyâuh queengx au, six tăng quef coonz, nâyx đomc jau six max zâyf năngđ nâyx. Six yaz coong bux ănz nyâuh coong blătc pongz lauh nyăngz stoif, laiv lanh munh queengx nănh nyăngz au bix ninyh zoz pitc lanh six longđ văngf munh nyăngz stoif; laiv lanh zoz zuc queengx wax lanh au six lauf longđ văngf munh nyăngz stoif.” Wax đomc stayb sây coong ănz Zâu Yê-su: “Năngđ coong munh pha zoz au bix ayx năngđ nâyx, bâyf nođ max zoongz pyau lêc.” Six Nănh tauz ănz stiz: “Max zâyf muif lanh hayh âyz tuz nâyx đomc wac, six cungb wax đomc munh tuz sađ phunz nzăngđ âyz tuz. Wâyc naih ah phanx munh max zoongz pyau, six wax đomc munh tăng yămz nzif nyăngz nyâuđ njaf steengb taih bix cănh nâyx; naih ah phanx munh max zoongz pyau wâyc zuc munh imz; yâuc naih ah phanx munh wâyc Tênb-toongh côkz bix cănh max zoongz pyau. Laiv lanh hayh âyz tuz nâyx đomc wac wax lanh oix zuc âyz gôh.”

Tăng wa, munh ênz wax đomc munh sây jenz taih phunz Nănh oix Nănh tăpx puf ănz stiz cloo zâu, six stayb sây buz coong mađ stiz. Six, Zâu Yê-su coong: “Oix zuc phunz munh sây jenz taih lov yaz, yâuc năngx gâyf cangđ stiz, wâyc Tênb-toongh côkz six săngh wax đomc munh năngđ nâyx đomc munh sây nâyx nyăngz.” Tăng wa Nănh tăpx puf ănz stiz tuz, songđ setb jau ninyh.

Six phanv mangc, naih ah lanh munh taih stătx Nănh, yâuc coong: “Stênx steengb lex, yaz zuc ayx laiv huungđ cumh pâuz gongx nzăngđ tuz stâyv quâyx nyăngz meengc heh?” Nănh songđ tauz wax lanh munh: “Săngh laix mâyh bix naic yaz tauv cumh pâuz gongx? Cungb naih ah Tauh gongx cuungv, Năngđ coong mâyh oix tuz stâyv quâyx nyăngz meengc, six zuc âyz wax đomc gâyf njanh ayx.” Wax lanh munh naic Zâu Yê-su coong: “Laiv đomc gâyf njanh heh?” Zâu Yê-su coong: “Năngx gâyf tayx munh, năngx gâyf longđ pongz lauh stoif, năngx gâyf ayx stac, năngx gâyf ayx za zanyx manyf, Oix zuc hâuđ lênh nzif pha, yâuc stăngz mâyh nyăngz cah sinh munh năngđ cănh nyăngz stinb nâyx.” Wax lanh munh gunx tauz Nănh coong: “Yaz âyz nzuf wax đomc nzof gôh. Yaz năngx sămv luungđ timb heh?” Six Zâu Yê-su coong ănz nănh: “Năngđ coong mâyh oix tuz clăkx clunh, oix zuc muf maic mâyh naih nyăngz jax toongx bix ninyh stăngc phunz munh zâuđ munh, mâyh six naih jax dlaih yămz wa Tênb-toongh; bix taih lêpc yaz gôh!” Six numđ wax đomc wac blătc, wax lanh munh gunx munh songđ numđ stauh bix muf, wâyc nănh naih jax toongx đuungx nzongf.

Wax zanyf, Zâu Yê-su coong ănz Nănh wax đomc stayb sây: “Yaz coong senz, bux nyâuh: Puv quâyx munh nzac Tênb-toongh côkz six zâuđ nzongf. Yaz yâuc oix coong bux nyâuh, phunz maf loh plunx quaix stimb bluyc six năngx hâyđ têx pây puv quâyx munh nzac Zâu Tênb-Huungh nyăngz côkz.” Wax zanyf, numđ nâyx đomc wac, wax đomc stayb sây numđ nyâyh ganc, songđ coong: “Ha nâyx bix naih mănv hayh tuz njâuv heh?” Mangc stiz, Zâu Yê-su songđ coong ănz stiz: “Bamh munh six max hayh ayx tuz nâyx đomc, six muif huungđ Zâu Tênb-Huungh hayh ayx tuz.” Wax zanyf, Pi-tê tauz Zâu Yê-su naic coong: “Stayb pha, mangc jađ, buz quanyf nzuf muif huungđ bix lêpc stayb pha. Năngđ nâyx buz six tuz luungđ heh?” Tăng wa Zâu Yê-su coong ănz stiz: “Yaz coong senz, bux nyâuh coong, nyâuh lêpc yaz nyăngz munh, tauv wănc săngb nzêuh, six Bamh Munh taih stâyv yămz Nănh nyăngz gwăngz eeng tinc wax zanyf, nyâuh lauf tuz stâyv yămz săpc nyâyc nomz tinc nongc stămđ săpc nyâyc stingx I-sa-la-ên munh. Muif lanh munh, tinyh phanv laiv lanh quanyf pyau, quanyf Yâuf pez, ô stayx, nzif, pha, au, sây max six njăngx njingh wâyc yaz nyăngz manyh, six tuz stipx clăpb ah pez phănc yâuc tuz stâyv quâyx nyăngz meengc. Six naih đuungx lanh ayx lub six zuc ayx jenz, zef wax đomc ayx jenz six tuz ayx lub.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.