Skip to content
BibleKenya

Dao Ao Dai Literal Text

Ma-tai 13

Lauf wax noib, Zâu Yê-su setb pyau ninyh, Nănh ninyh stâyv wa coiđ sinh. Songx munh hongđ nzongf yămz quib Nănh nzêux nzuf. Ayx tuz Nănh japc nzac ah saz đangđ ninyh, Nănh stâyv wa, six songx munh tinyh đoih stâuđ wa coiđ sinh. Nănh nongc wac pây nzaox đuungx huungđ phunz stiz, coong: “Naih ah lanh munh setb ninyh hav nhlimb. Hav nhlimb wax zanyf, naih ah phanx nhlimb tuih zuc jau, nooc songđ taih nhlinc wax đomc nhlimb nzuf. Naih ah phanx tuih nzac njauz poz, wax đomc tinc max naih nib phănx đuungx, nhlimb songđ lênh dlih bêux, six wâyc max naih nib phănx đôz. Tauv bah noib setb taih, zuc njah toc phaib songđ njeengh caođ nzuf wâyc max naih đuungh đôz. Naih ah phanx tuih nzac nzim plungz ninyh, nzim lub taih songđ zuc plongz nzuf. Naih ah phanx tuih nzac nib gongx, songđ săngh blaz nyauh, lauh comđ tuz ah pez, lauh comđ tuz guc săpc, lauh comđ tuz stamx săpc. Mănv naih bah noomh, oix zuc mungv.”

Tăng wa, wax đomc stayb sây buz taih stătx, songđ naic Nănh, coong: “Wâyc săngh laix mâyh bix nongc wax đomc wac pây coong ănz songx munh heh?” Six Nănh songđ tauz, stayb sây buz coong: “Yămz Tênb-toongh côkz Wax đomc pinyx nyăngz six tuz sađ phunz nyâuh pâyz, six năngx naih wax đomc munh six max tuz sađ phunz. Wâyc laiv lanh naih, six tuz pâu phunz nănh nyăngz phănc, nănh six tuz naih yăngc. Six laiv lanh max naih, njinh nănh naih nyăngz six zuc zoz ninyh. Six wâyc năngđ nâyx, Yaz nzăngđ nongc wac pây coong ănz stiz; wâyc stiz hănđ mangc, yâuc mangc max phătc; hănđ nzaz bah noomh mungv, stiz yâuc max saz tuz. Wâyc stiz bix I-sa-ya tâuc taih nyăngz wac setb taih toix nzuf, coong:

‘Nyâuh mungv, six hănđ nzaz bah noomh mungv, yâuc mungv max saz;

nyâuh mangc, six hănđ mangc, yâuc mangc max phătc.

Wâyc nâyx đomc pec stingx nyăngz nyâuđ nhlengc nzongf;

stiz nyăngz bah noomh max oix mungv,

yâuc nzipx stiz nyăngz mâyc max mangc,

săngx đanyf stiz nyăngz mâyc hayh mangc tuz phătc,

bah noomh hayh mungv tuz numđ,

nyâuđ yâuc hayh manyh pec,

bix cănh coi nyâuđ lauf,

Yaz yâuc zany stiz tuz gongx.’

Six nyâuh senz naih oonz looc gôh, wâyc nyâuh nyăngz mâyc mangc tuz phătc, cloon nyâuh nyăngz bah noomh, yâuc mungv tuz numđ. Yaz coong senz bux nyâuh, naih đuungx lanh tâuc wac munh cloon peengh stimz nyăngz munh nyâyh mungc oix tuz phătc nyâuh phătc nâyx đomc, six stiz max tuz phătc, oix numđ nyâuh numđ nâyx đomc yâuc max tuz numđ. Năngđ nây, nyâuh mungv jađ munh hav nhlimb nyăngz wac pây six luungđ. Munh mungv Tênb-toongh côkz nyăngz Cuđ Jenx bix max saz, six manđ taih zoz yămz stiz nyăngz nyâuđ wax đomc Cuđ Jenx ninyh nzuf. Nây six nhlimb tuih zuc jau wax đomc. Wax đomc nhlimb hav nzac njauz poz, six wax đomc munh numđ Cuđ Jenx yâuc coonx numđ nyađ stipx Cuđ Jenx; six wax tauh munh max naih đuungh, songđ zen max lauh; tauv wâyc Cuđ Jenx pongh zuc zâuđ max six pongh zuc ayx huđ, wax tauh munh songđ setb taih. Hav tuih zuc nzim plungz wax đomc nhlimb, six wax đomc munh numđ Cuđ Jenx, yâuc cungb nyâyh nây stâyv sangc, nyâyh oix tuz puv quâyx songđ ayx phunz Cuđ Jenx max hayh săngh tuz pyâu. Six tuih nzac nib gongx wax đomc nhlimb, six munh numđ Cuđ Jenx yâuc saz, wax đomc munh songđ săngh pyâu, ayx tuz lauh nomz tuz ah pez, lauh nomz tuz guc săpc, lauh nomz tuz stamx săpc.”

Zâu Yê-su zef coong pitc tauh wac pây phunz stiz coong: “Tênb-toongh côkz six pây cayx năngđ ah lanh munh ninyh hav nhlimb gongx ănz nănh nyăngz njingh. Six tauv munh phâyx mâyc njoomh, nănh nyăngz yônz zaz taih hav mađ huđ zanb nzac wa blauh witx ninyh songđ tiuv. Tauv blauh lub taih setb blauh wax zanyf, songđ phătc mađ huđ lauf naih zanb wa. Wax zanyf, njingh zâu wax đomc pâuz songđ taih naic wax tau zâu coong: ‘Zâu lex, mâyh max zâyf hav nhlimb gongx ănz mâyh wa njingh haz? Ha, wax đomc mađ huđ six tăng laiv taih heh?’ Njăngx zâu coong ănz stiz: ‘Nâyx đomc six yônz zaz ayx lêc.’ Wax đomc pâuz munh zef naic njăngx zâu coong: ‘Ha, mâyh oix buz ninyh wa peengz mađ năngx nzuf max?’ Six njăngx zâu tauz coong: ‘Max nongc đêh, săngx đanyf nyâuh peengz mađ huđ, bix hayh peengz zuc căn blauh. Phanv dluyh stiz tinyh zanb lub taih, zu tauv sâub zunb nyăngz săngx huđ tauv, tauv beengc săngx huđ sâub, yaz cănh êu wax đomc cumh pâuz munh: Quănf wax đomc mađ huđ đangc stayb ayx săngh ploc nongc nzâyz ninyh pu, mănc sâub blauh nzâyz lauf ănz yaz nyăngz njămf.’”

Zâu Yê-su zef coong ah tauh wac pây phunz stiz, coong: “Tênb-toongh côkz six lauf pây cayx năngđ ah nomz njayz jaix nhlimb, naih ah lanh munh zoz ninyh songx ănz nănh nyăngz njingh; wax nomz nhlimb six năngx jenz têx muif huungđ nhlimb, six tauv bêux lub taih, nănh năngx lub têx muif huungđ njayz yămz wa lauđ winb cah njaf, yâuc pênx ah zâyz njăngx, ayx tuz nooc taih ayx nzauf ănz nănh nyăngz quah.” Zâu Yê-su coong pitc tauh wac pây phunz stiz timb coong: “Tênb-toongh côkz six cayx năngđ piny nâyx, naih ah lanh munh nzif zoz taih lou ănz pôz tongđ văn ayx tuz tauv wax đomc văn phutx nzuf.”

Zâu Yê-su nongc wac pây coong wax đomc ănz songx munh, Nănh max coong laiv huungđ ănz stiz bix max nongc wac pây, ayx phunz tâuc wac munh coong taih nyăngz wac toix nzuf, coong:

“Yaz six goib nzetx nongc wac pây coong.

Yaz six coong tăng njăpc guungh njăpc nib wax đomc pinyx nyăngz setb taih.”

Tăng wa, wax đomc songx munh muf blătc, Nănh songđ nzac pyau muf, Nănh wax đomc stayb sây songđ taih stătx Nănh, naic coong: “Joođ pob manyf phunz buz, mađ huđ yămz wa njingh nyăngz wac pây.” Wax zanyf, Zâu Yê-su tauz, coong: “Hav nhlimb gongx wax tauh six Bamh Munh, njingh tâyc six nây bamh canz, wax đomc nhlimb gongx — six Tênb-toongh côkz nyăngz pec stingx, six wax đomc mađ huđ six njangh okx wax tauh nyăngz pec stingx, yônz zaz, hav wax đomc mađ huđ wax tauh, six manđ. Sâub zunb nyăngz săngx huđ, six tauv stêtb mâyv nyăngz noib, quănf blauh wax đomc cumh pâuz munh, six wax đomc stinz munh. Năngđ nây, mađ huđ zuc quănf nzâyz taih pu ănz tâuf năngđ laix, six tauv stêtb mâyv nyăngz noib, six lauf năngđ wa nâyx. Bamh Munh six paiđ Nănh nyăngz stinz munh ninyh, sâub dlonf wax đomc ayx huđ nyăngz munh cloon wax đomc max zen nyăngz munh, zoz setb Nănh nyăngz côkz nzuf. Yâuc nzâyz wax đomc munh ninyh quanyf ănz wa tâuf coiđ, yămz wa naih pungx stingb haoh yâuc tăpc nyah tanyđ. Tauv wax zanyf, wax đomc peengh stimz nyăngz munh six gwăngz eeng cayx năngđ bah noib nâyx, yămz stiz nyăngz Tênb-toongh Pha nyăngz côkz. Laiv lanh naih bah noomh, oix zuc mungv.” “Tênb-toongh côkz six cayx năngđ ah cuyb poou zâuz plopx ănz wa njingh tâyc nâyx, naih ah lanh munh ninyh lov pongh nănh zef năngx pinyx ănz wa. Nănh numđ nyađ nzuf, nănh coonx phunb đangz muf, maic nzuf nănh naih nyăngz muif huungđ jax toongx songđ ninyh maif wax tootz njingh. Năngx naih timb, Tênb-toongh côkz six lauf cayx năngđ ah lanh, steengb âyx munh ninyh lov saix nyăngz poou zâuz nâyx. Tăng wa, tauv nănh lov tuz pongh ah nomz poou zâuz senz saix nzongf, songđ phunb đangz muf, nănh maic nzuf nănh naih nyăngz muif huungđ jax toongx bix ninyh maif wax nomz poou zâuz.

Zef, Tênb-toongh côkz six cayx năngđ ah phunb leđ nâyx pungx nzac coiđ ninyh sâub yâuc tuz muif huungđ byauf, tauv byauf pong leđ, ayx byauf munh songđ đănx staox wa wăngx sinh taih, stâyv wa, sên byauf gongx ănz nzac longx maoh ninyh, năngx naih wax đomc max săngh nongc, stiz zoz quanyf queengx. Tauv stêtb mâyv muif huungđ six lauf năngđ nâyx: Wax đomc stinz munh six ninyh, zoz wax đomc ayx huđ nyăngz munh cloon wax đomc peengh stimz nyăngz munh phunz goib, stinz munh songđ quanyf wax đomc munh huđ nzac wa tâuf coiđ ninyh, yămz wa naih pungx stingb haoh yâuc tăpc nyah tanyđ. Nyâuh saz nzuf nâyx đomc max?” Stiz tauz Nănh coong: “Saz lêc.”

Wax zanyf, Zâu Yê-su coong ănz stiz: “Six wâyc năngđ nâyx, muif lanh nzaox gâyf stênx steengb tuz hoođ pâyz tauv Tênb-toongh côkz six cayx năngđ ah lanh pyau zâu, nănh zoz lôx nyăngz tungh zăngc cloon săngb nyăngz tungh zăngc tăng nănh nyăngz zaub tungh zăngc tinc setb taih.” Wax zanyf, Zâu Yê-su coong wax đomc wac pây tuz, Nănh songđ ninyh gâyh wax cuyb tinc.

Muf tauv Nănh cănh nyăngz njăngv, Nănh yămz wa huyđ toongh nzaox songx munh, ayx tuz songx munh nyâyh ganc yâuc coong: “Đomc tongb manyh cloon nănh ayx đomc jix caox njingc six tăng laiv taih heh? Nănh max zâyf njăngx stangc nyăngz toonz haz? Nănh nyăngz nzif max zâyf hipđ ayx Ma-li-ya, cloon nănh wax đomc yâuf six Ya-coopc, Yô-sepx, Si-môn, cloon Yu-đa haz? Max zây nănh wax đomc muc cloon pănh poc nây hah? Ha, nănh tuz nâyx đomc six tăng laiv taih heh?” Stiz songđ wâyc Nănh bix zuc longđ. Six Zâu Yê-su coong ănz stiz: “Tâuc wac munh six max zuc munh phătc stanc, setb blătc nănh cănh nyăngz njăngv njaf munh cloon nănh nyăngz pyau njaf munh.” Yămz wa Nănh max ayx jix caox njingc đuungx wâyc stiz nyăngz nyâuđ max zen.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.