Dao Ao Dai Literal Text
Ma-tai 12
Wax zany, six toix tingc congz noib, Zâu Yê-su pitb quaix wa njingh blauh ninyh, Nănh nyăngz stayb sây buz nyâuđ sab stiz songđ mătx wax đomc blauh taih nhlinc. Six phătc nâyx đomc dlayc Pha-li-si munh coong ănz Nănh: “Mangc geh, Mâyh nyăngz stayb sây ayx nâyx đomc six max cuib ayx yămz tingc congz noib.” Năngđ naz, Zâu Yê-su tauz stiz coong: “nyâuh max zeengx toc quaix Đa-witx huungh cloon lêpc nănh wax đomc munh nyâuđ sab wax zanyf bix ayx nyăngz haz? Ayx laix Đa-witx bix nzac bongc Zâu Tênb-Huungh nyăngz pyau yâuc zoz congx quaix wax đomc nzu nhlinc, wax đomc nzu Đa-witx cloon lêpc nănh wax đomc munh six max cuib nhlinc, cungb phunz wax đomc stayb munh cuungv? Nyâuh max toc quaix yămz gâyf njanh sâub coong yămz Tingc Congz noib, wax đomc stayb munh yămz bongc Zâu Tênb-Huungh nyăngz pyau, hănđ ayx longđ tingc congz noib stiz lauf max naih stoif haz? Six yaz coong bux nyâuh yămz nây naih ah Lanh năngx lub têx bongc Zâu Tênb-Huungh nyăngz pyau. Năngđ coong nyâuh pâyz nâyx zâux wac six coong ayx laix têx: ‘Yaz oix munh naih nyâuđ hâuđ lênh munh, max zâyf oix munh nzâyz stanyb lanyh taih congx,’ nyâuh six max tingc max ayx longđ nyăngz munh. Wâyc Bamh Munh six ayx tingc congz noib nyăngz Zâu.”
Nănh ninyh gâyh wax cuyb tinc, Nănh nzac stiz wa huyđ toongh pyau ninyh. Phanv mangc, yămz wa naih ah lanh munh ah saz puf quac, stiz naic Zâu Yê-su coong: “Tingc congz noib cuyb zany gumc max?” phunz stiz nzăngđ hayh naih jau cooux Nănh. Six Zâu Yê-su coong ănz stiz: “Naih tix lanh munh yămz nyâuh cah njaf, năngđ coong nănh naih ah tauh bah jiz yuungh, bix năngđ coong wax tauh bah jiz yuungh tuih nzac cotb toix tingc congz noib, nyâuh max zâyf zoz tăkc setb taih haz? Năngđ nây munh six năngx saix têx bah jiz yuungh pâyz sax phănc! Wâyc nây, naih ja coong oix zuc ayx gongx yămz tingc congz noib.” Tăng wa, Nănh êu wax tauh munh quac coong: “stuungb mâyh nyăngz puf staox taih gôh.” Nănh stuungb puf staox taih yâuc tuz gongx, cayx năngđ wax saz gongx nâyx. Six tauv setb taih Pha-li-si munh songđ ta zux ix nzeengz Zâu Yê-su lov jau ayx laix stiz nzăngđ hayh tayx tuz Nănh.
Six Zâu Yê-su pâyz năngđ nâyx, Nănh songđ tiuv gâyh wax cuyb tinc. Naih munh đuungx lêpc Nănh ninyh, Nănh yâuc zany gongx phunz stiz nzuf. Nănh yâuc bux stiz êu năngx gâyf phunz Nănh setb nzăngc, ayx phunz toix nzuf tâuc wac munh I-sa-ya tâuc taih nyăngz wac, coong:
“Mangc geh, Yaz nyăngz pâuz, Yaz sên taih wax Tauh;
Yaz senz stăngz wax Tauh, Nănh senz hoopđ Yaz nyăngz stimz nyâuđ nzuf.
Yaz six phunz Yaz nyăngz Singx-Lingh yămz Nănh,
Nănh six oix coong tauv peengh stimz nyăngz jau phunz cungh ngwaic côkz wax đomc pec stingx.
Nănh six max taux munh, yâuc max hamv mađ;
yâuc max naih mănv numđ Nănh nyăngz stingb yămz wa caiz sangc.
Phătc njăngx cayx setc Nănh six max au nau,
phătc toongz tâuf cayx tayc Nănh yâuc max tayx tayc,
tuz tauv laiv zanyf Nănh ayx peengh stimz nyăngz jau năngx clăkx clunh nzuf,
cungh ngwaic côkz nyăngz pec stingx, yâuc naih njic mungc yămz Nănh nyăngz manyh.”
Tăng wa, naih munh ênz ah lanh munh, mâyc buđ, yâuc zuc manđ yămz stinb wax hayh coong wac taih phunz Nănh, Nănh songđ zany gongx phunz wax lanh munh, ayx tuz wax lanh munh hayh coong wac yâuc tuz phătc jau. Songx munh nyâyh ganc songđ coong: “Tauh munh six Đa-witx nyăngz Sây Stunz max six loz?” Six wax đomc Pha-li-si munh, numđ nâyx đomc dlayc, songđ coong: “Nănh six max hayh luiđ manđ năngđ coong Nănh max nongc Bê-ên-sê-bun, manđ huungh nyăngz lanyf.” Six wâyc pâyz stiz nyăngz nyâuđ nyâyh, Nănh songđ coong ănz stiz: “Ah nomz côkz bix cănh phunz goib taih tinyh nzeengz six lunc paic nzuf, ah nomz dlanyh max six pyau năngđ phunz goib taih cănh tinyh nzeengz, six max hayh yămz tuz wăn. Năngđ coong Sax-tanx cănh luiđ Sax-tanx, cănh phunz goib taih tinyh nzeengz, năngđ nâyx, nănh nyăngz côkz laiv hayh yămz tuz wăn heh? Năngđ coong yaz nongc Bê-ên-sê-bun nyăngz lanyf luiđ manđ, nyâuh nyăngz sây nongc luungđ lanyf luiđ manđ heh? Wâyc nâyx đomc dlayc, stiz six cănh plănc lauf cooux nyâuh gôh. Six năngđ coong yaz nongc Zâu Tênb-Huungh nyăngz Singx-Lingh luiđ manđ, six Zâu Tênb-Huungh nyăngz côkz taih tauz nyâuh gôh. Ayx laix naih mănv hayh nzac munh njoongh munh nyăngz pyau ninyh, nimc zoz nănh nyăngz tungh zăngc, năngđ coong max stayb wax tauh munh njoongh đangc heh? Oix zuc stayb nănh đangc, nzof mănc nimc zoz nănh nyăngz tungh zăngc. Mănv max cloon yaz yămz six tămx yaz, laiv lanh max cloon yaz căpx dlonf, six đanv ninyh. Wâyc nâyx đomc dlayc, yaz coong ănz nyâuh, muif huungđ stoif cloon coong pamf Zâu six tuz quanyf phunz munh, six coong pamf tauv Singx-Lingh six max tuz quanyf. Năngđ coong laiv lanh coong wac peo Bamh Munh, wax tauh six tuz quanyf stoif. Six laiv lanh coong peo tauv Zâu Singx-Lingh wax tauh six max tuz quanyf stoif, yămz nâyx stâyv max six cah đangz stâyv lauf max tuz quanyf. Wax zâyz njăngx gongx six pyâu lauf gongx, wax zâyz njăngx huđ six pyâu lauf huđ, wâyc mangc wax đomc pyâu six pâyz tuz wax zâyz njăngx. Nangz meengz nyăngz sây stunz lex, tăng wa phăn huđ, nyâuh laiv hayh coong tuz wac gongx heh? Wâyc nyâuđ naih pong laiv huungđ, nzetx nzăngđ coong setb taih. Munh gongx, six tăng nănh nyăngz nyâuđ njaf naih gongx pong nzuf, coong setb taih yâuc gongx, munh huđ, six tăng nyâuđ njaf naih huđ pong nzuf, coong setb taih yâuc huđ. Six yaz coong bux nyâuh, muif lanh munh coong nyăngz muif zâux max săngh nyăngz wac, tauv tingc stoif wax noib six zuc zoz setb taih stămđ nzuf. Wâyc tăng nyâuh coong nyăngz wac, nyâuh bix tuz stunx ayx peengh stimz munh, yâuc tăng nyâuh coong nyăngz wac, nyâuh bix zuc tingc stoif.”
Wax zanyf, naih ah đomc nzaox gâyf stênx steengb cloon Pha-li-si munh naic Nănh coong: “Stênx steengb lex, buz oix mangc Mâyh ayx ah cuyb njic hoouđ.” Six Nănh tauz stiz, coong: “Nâyx stâyv nyâuđ huđ cuyx quaiz nyăngz munh oix mangc ah cuyb njic hoouđ, six max naih laiv cuyb njic hoouđ ayx phunz nănh stiz, blătc nzuf tâuc wac munh Yô-na nyăngz njic hoouđ. Wâyc Yô-na yămz byauf lub nyăngz nyâuđ njaf pôz noib cloon pôz munf ayx laix, six Bamh Munh lauf yămz nib đi pôz noib cloon pôz munf năngđ wa nâyx. Tauv tingc stoif wax noib, Ni-na-we munh six stâuđ quef taih cooux nâyx nzêuh munh. Wâyc Yô-na ninyh quinb wax zanyf stiz coi nyâuđ nhlimc stoif, six phanv mangc, yămz nây naih ah Lanh năngx lub têx Yô-na. Tauv tingc stoif wax noib, namh pôngz wax tauh huungh nzif six stâuđ quef taih cooux nâyx nzêuh munh, wâyc nănh tăng guungh coonz wax đomc tinc taih mungv Sa-lô-môn nyăngz tongb manyh, six mangc geh, yămz nây naih ah Lanh năngx lub têx Sa-lô-môn. Manđ yootz setb gâyh ah lanh munh wax zanyf, nănh quaix stâyz phangz gâu ninyh, lov tinc sec six lov max tuz. Wax zanyf, nănh coong: ‘Yaz six phunb đangz muf pyau, yaz tăng wa setb taih nyăngz pyau.’ Muf tauv wa, nănh phătc pyau njaf max naih luungđ tiny, nzâux tuz dlăngc wayh yâuc dlauf gongx gongx ănz wa. Tăng wa nănh zef ninyh ênz nhlic tauh manđ zef năngx huđ têx nănh, taih nzac wax sênz pyau ninyh tinyh đoih yămz wa, tăng wa wax lanh munh six zef năngx huđ têx cah đangc. Nâyx nzêuh munh huđ munh six lauf năngđ nây nâyx.”
Wax zanyf Zâu Yê-su năngx jinh coong ănz songx munh, phanv mangc, Nănh nyăngz nzif cloon Nănh wax đomc yâuf stâuđ wa cungh ngwaic, lov jau oix cloon Nănh coong wac. Wax zanyf, naih ah lanh munh bux Nănh coong: “Phanv mangc Mâyh nyăngz nzif cloon Mâyh wax đomc yâuf taih stâuđ wa cungh ngwaic, lov jau oix cloon Mâyh coong wac.” Six Nănh tauz, wax tauh munh coong: “Mănv six yaz nyăngz nzif mănv six yaz nyăngz yâuf heh?” Tăng wa Nănh stuungb puf nuz Nănh wax đomc stayb sây, Nănh coong: “Phanv mangc, yaz nyăngz nzif cloon yaz nyăngz yâuf nhlex! Wâyc laiv lanh munh ayx âyz yaz nyăngz cah zâyc Tênb-toongh Pha nyăngz zux ix, wax lanh six yaz nyăngz yâuf, cloon yaz nyăngz muc, cloon yaz nyăngz nzif.”
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.