Skip to content
BibleKenya

Dao Ao Dai Literal Text

Ma-cô 5

Stiz songđ ninyh tauv wax leepz coiđ sinh, tauv Yê-la-sa nib tâyc. Zâu Yê-su setb đangđ taih wax zanyf, songđ, naih ah lanh munh zuc manđ nzac yămz stinb tăng wa stâu đungc nzac taih pongh Nănh, nâyx lanh munh nyăngz tinc six yămz wax đomc stâu đungc, max naih mănv hayh nzauf nănh tuz blaz, hănđ nongc njab langb stayb lauf max tuz, wâyc đuungx hâyđ munh nongc ja cloon njab langb stayb nănh, six njab langb nănh yâuc tăkc setc, năngx naih ja nănh bopc huđ nzuf, max naih mănv naih jab nzauf tuz nănh blaz. Quaix noib quaix munf yămz wax đomc stâu đungc cloon wax đomc zoongz zâyc, nănh hamv nhlitb nhlitb têx, cănh zoz njăuz njayc catz nănh nyăngz stinb. Tăng năngx jinh yămz côz côz nănh mangc phătc Zâu Yê-su, songđ tiuv nzac taih quâyc nzac Zâu Yê-su nyăngz cah đangc ninyh. Nănh nzac jab hamv lub coong: “Yămz njăngb quaix Zâu Tênb-Huungh nyăngz Toonz, Yê-su lex, yaz quenđ mâyh laiv huungđ? Yaz tim Zâu Tênb-Huungh nyăngz manyh joođ mâyh, năngx gâyf wâyb yaz.” Wâyc Zâu Yê-su êu nănh, coong: “Manđ yootz lex, oix zuc setb nâyx tauh munh ninyh.” Zâu Yê-su naic nănh: “Mâyh nyăngz bux hipđ ayx luungđ?” Nănh tauz Zâu Yê-su: “Yaz nyăngz bux hipđ ayx peengz peob, wâyc buz hongđ nzongf.” Nănh songđ nzac jab joođ Zâu Yê-su coong êu Nănh năngx gâyf luiđ nănh stiz setb wax nomz stâyz phangz. Wax zanyf, naih ah peof tungf hongđ nzongf jinh đangh yămz wax zâyđ zoongz lov nhlinc, wax đomc manđ songđ joođ Zâu Yê-su, coong: “Joođ phunz buz nzac wax peof tungf ninyh, buz nzăngđ hayh nzac wax peob tungf.” Zâu Yê-su songđ nyenc phunz nănh stiz setb ninyh, wax zanyf wax đomc manđ songđ nzac wax peob tungf ninyh, wax peob tungf — cox naih iz tinb tauh nâyx — tăng wa zoongz nzaz tiuv nzac coiđ ninyh sêmh coiđ tayc nzuf. Wax đomc jămđ tungf munh songđ tiuv muf lănv nâyx đomc dlayc bux wa dlanyh cah njaf cloon wax đomc njăngv sangc nyăngz munh, munh đuungx songđ setb ninyh mangc jađ naih laiv huungđ dlayc setb. Stiz ninyh tauv Zâu Yê-su wa songđ phătc zuc manđ ayx wax tauh — six cah đangc zuc peengz peob manđ nzac yămz stinb wax tauh munh — stâyv yămz wa, zuz guyz quav sting plongx munh, stiz songđ numđ cumh nzav nzongf. Wax đomc munh phătc songđ lănv bux stiz tauv cah đangc zuc manđ yămz stinb wax tauh munh cloon wax peob tungf nyăngz jau six ayx năngđ laix. Stiz goib nzetx nzac jab joođ Zâu Yê-su, êu ninyh gâyh stiz nyăngz stâyz phangz. Zâu Yê-su nzac đangđ wax zanyf, cah đangc zuc manđ yămz stinb wax lanh munh, joođ Zâu Yê-su phunz nănh cloon Zâu Yê-su yămz. Six Zâu Yê-su max phunz, songđ bux nănh coong: “Phanv muf mâyh nyăngz pyau, ninyh pongh mâyh nyăngz pyau munh, bix lănv bux stiz Zâu ayx nyăngz dlayc lub phunz mâyh, Nănh yâuc hâuđ lênh mâyh ayx năngđ laix.” Wax lanh munh songđ ninyh, yămz Tôt-bu-li stâyz phangz quef coonz lănv Zâu Yê-su ayx nyăngz dlayc lub năngđ laix phunz nănh, munh tinyh đoih songđ numđ nyâyc ganc nzongf.

Tăng wa Zâu Yê-su nzac đangđ ninyh clăngv quaix wax nganđ leepb coiđ sinh muf timb, Naih ah peof songx munh hongđ nzongf taih căpx dlonf wâyh nzêux Nănh, Nănh yâuc năngx jinh yămz wa coiđ sinh. Phanv mangc, naih ah lanh six cun huyđ toongh nyăngz munh, bux hipđ ayx Yai-latx, taih tauv, phătc Zâu Yê-su, nănh songđ quâyc nzac Zâu Yê-su nyăngz staux ninyh. Nănh nzac jab joođ Zâu Yê-su coong: “Yaz nyăngz sab jenz cayx tayc gôh. Joođ mâyh ninyh tăpx puf ănz nănh phunz nănh nzăngđ tuz zany gongx, yâuc tuz săngh.” Tăng wa Zâu Yê-su songđ lêpc nănh muf, naih ah peof songx munh hongđ nzongf lauf lêpc Nănh ninyh yâuc quib nzêux Nănh.

Naih ah lanh munh nzif săngh đuv guyz max gaib nyăngz gumc tuz săpc nyâyc nyăngv, zuc tanyđ bah laiv săngb munz lov mađ stangc munh đuungx zany, nongc nănh nyăngz muif huungđ jax toongx gaib nzuf, gumc yâuc max gongx tiny, six blătc quaiz đangz, gumc zef năngx niđ têx, numđ munh lănv tauv Zâu Yê-su, nănh songđ beengx nzac wax peob songx munh hongđ ninyh tauv Zâu Yê-su nyăngz cah đangz, nănh songđ lumz Zâu Yê-su nyăngz guyz. Wâyc wax tauh munh nzif nyâyh coong: “Yaz năngđ coong phanv lumz tauv Nănh nyăngz guyz cuungv yaz nyăngz gumc six tuz gongx.” Toongx wax zanyf, nănh nyăngz đuv guyz samđ songđ gaib, nănh songđ numđ nănh nyăngz stinb, tuz zany gumc gongx. Zâu Yê-su lênh dlih pâyz, tăng Nănh nyăngz stinb naih jab setb ninyh, Nănh songđ yămz songx munh mungh tongx winb đangz naic coong; “Mănv lumz yaz nyăngz guyz heh?” Zâu Yê-su wax đomc stayb sây tauz Nănh: “Stayb pha phătc munh hongđ jinh đangh nzêmv mâyh, mâyh zef năngx naic coong: ‘Mănv lumz yaz’ naz?” Zâu Yê-su lauf jinh đangh winb mangc winb mangc jađ mănv ayx nâyx. Wax zanyf, wax tauh munh nzif, pâyz tuz nănh nyăngz jau setb taih, songđ cumh nzav, stinb sinx nzuf, taih, quâyc nzac Zâu Yê-su nyăngz cah đangc ninyh, lănv nzuf nănh nyăngz dlayc bux Zâu Yê-su. Six Zâu Yê-su coong ănz wax tauh munh nzif: “Sây sab lex, mâyh nyăngz zen stimz cănh zany mâyh nyăngz gumc gongx. Phanv peengh oonz muf bex, mâyh nyăngz gumc gâyh nzuf nzof gôh.”

Zâu Yê-su năngx jinh coong wac wax zanyf, naih ah đomc munh tăng cun huyđ toongh wax tauh munh nyăngz pyau taih bux coong: “Mâyh nyăngz sab tayc nzof gôh. Săngh laix năngx wâyb stênx steengb heh?” Six mungv numđ stiz coong nyăngz wac, Zâu Yê-su bux cun huyđ toongh wax tauh munh coong: “Năngx gâyf cumh nzav bex. Cungb phanv zen lêc.” Nănh max phunz laiv lanh lêpc Nănh ninyh, cungb ênz Pi-tê, Ya-coopc cloon Ya-coopc nyăngz yâuf Yô-hanx ninyh cuungv. Ninyh tauv cun huyđ toongh wax tauh munh nyăngz pyau, Zâu Yê-su phătc munh lunc nzuf yâuc hamv haoh nhlitb nhlitb têx. Japc nzac ninyh wax zanyf, Zâu Yê-su coong ănz stiz: “Săngh laix nyâuh bix numđ stauh haoh heh? Tauh sây max tayc nef, nănh cungb mâyc njoomh lêc.” Tăng wa stiz songđ pib jetx Zâu Yê-su, Nănh songđ luiđ wax đomc munh setb cungh ngwaic ninyh nzuf, Nănh cungb ênz wax tauh munh sây nyăngz nzif, pha cloon lêpc Nănh wax đomc munh, Nănh songđ ninyh tauv munh sây phâyx wax cuib tinc. Zâu Yê-su songđ nzauf wax tauh sây nyăngz puf, yâuc coong bux nănh: “Ta-li-ta-cu-mi!” âyz gâyf six coong: “Sab jenz lex, yaz bux mâyh điub nyoongz quef gôh.” Toongx sangf, wax tauh sây songđ nyoongz quef yăngh (wâyc nănh six săpc nyâyc nyăngv), wax đomc munh yămz wa senz numđ nyâyh ganc nzongf. Zâu Yê-su zăpx êu stiz coong năngx gâyf lănv nâyx đomc dlayc bux laiv tauh, Nănh songđ êu stiz phunz wax tauh sây nhlinc.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.