Lu-ca 3

1Sê-sa Ti-bê-li-atc ayx huungh tuz săpc ngâuf nyăngv wax nyăngv — toix Boon-ti-atc Phi-latx jinh đangh ayx quanz cun Yu-đê stâyz phangz, Hê-lôtx ayx huungh cun Ga-li-lê stâyz phangz, năngx naih nănh nyăngz yâuf Phi-lipx ayx huungh cun I-tu-lê stâyz phangz cloon Ta-cô-ni-titc, nzof Li-sa-ni-a ayx huungh cun A-bi-lên stâyz phangz. 2Wax zanyf toix An-na cloon Ca-ya-phatx ayx stayb munh pyây — naih Zâu Tênb-Huungh nyăngz wac bux ănz Yô-hanx Sê-ca-li-ya nyăngz toonz, yămz wa stâyz phangz blănf. 3Tăng wa nănh songđ ninyh nzêux yămz quib Njoh-đen wăngx wax đomc tinc, nzônh gâyf coong tauv zuc nhlimc stoif ayx quaix-gâyf nzăngđ tuz quanyf stoif. 4Cayx năngđ ja yămz tâuc wac munh I-sa-ya sâub nyăngz wac coong:

“Naih stingb hamv lub yămz wa stâyz phangz blănf:

‘oix zuc zany Zâu nyăngz jau,

Nănh nyăngz jau oix zuc ayx năngx zac.

5Muif nomz đoomf oix zuc tinh năngx pong,

muif nomz zoongz zâyc njăngb oix zuc witz năngx hav,

jau ngau ngokx oix zuc coi năngx zac,

jau plupc tuyz oix zuc ayx năngx yenh,

6Nzof muif lanh munh six tuz phătc Zâu Tênb-Huungh nyăngz njâuv pôz.’”

7Six, Yô-hanx coong ănz taih êu nănh ayx quaix-gâyf wax đomc munh, coong: “Nangz meengz nyăngz phăn lex, mănv bux nyâuh tiuv đutb cayx zuc tingc stoif nyăngz jau heh? 8Wâyc nây oix zuc ayx năngx payh nyâuh nhlimc stoif nyăngz jau, yâuc năngx gâyf jinh luh cănh coong: ‘Buz naih claof jex Apx-la-ham’ wâyc yaz oix coong ănz nyâuh coong Zâu Tênb-Huungh lauf hayh ayx tăng nâyx đomc njăuz phutx săngh Apx-la-ham nyăngz sây stunz. 9Nâyx zanyf, pâu bâyf pob wa njăngx coonz nzof. Wâyc nây, laiv zâyz njăngx max săngh pyâu gongx six zuc coix bix quanyf ănz tâuf.” 10Songx munh naic nănh coong: “Ha, buz six zuc ayx luungđ heh?” 11Nănh tauz ănz stiz coong: “Laiv lanh naih iz byenđ guyz six zuc tanb phunz wax max naih, zef laiv lanh naih nhlinc nănh lauf oix zuc ayx năngđ nâyx.” 12Wax đomc sâub sôiv munh lauf taih nongc ayx quaix-gâyf, stiz yâuc naic nănh coong: “Stênx steengb lex, buz six zuc ayx laix heh?” 13Nănh tauz ănz stiz, coong: “Năngx gâyf zoz đuungx blătc paiđ phunz nyâuh nyăngz jax.” 14Naih ah đomc peengz lauf naic nănh, coong: “Ha năngx naih buz, buz six zuc ayx laix?” Nănh coong ănz stiz: “Năngx gâyf zab laiv huungđ, yâuc năngx gâyf zăpc munh, oix zuc pong nyâuđ nyâuh nyăngz nyanh lav.”

15Six wâyc, songx munh jinh đangh sâuđ zu yâuc tinyh đoih nyâyh Yô-hanx ănz stiz nyăngz nyâuđ, coong max pâyz nănh six zâyf Zâu Jix-Tuz max zâyf, 16Yô-hanx coong ănz tinyh đoih coong: “Yaz nongc womz ayx quaix-gâyf phunz nyâuh, six naih ah Lanh cayx taih năngx naih jab naih lanyf têx yaz, wax Tauh yaz six lôx max payh tuz zay Nănh nyăngz stub langb. Nănh six nongc Zâu Singx-Lingh cloon tâuf ayx quaix-gâyf phunz nyâuh, 17Wax Tau Nănh six nzauf săngb ănz wa puf yâuc nyumv dlăngc Nănh nyăngz blauh, songđ sâub blauh witx ănz Nănh nyăngz njămf, six wax đomc buib cloon bah gao Nănh six nongc stâyv quâyx max hayh tayc nyăngz tâuf pu.”

18Wax zanyf Yô-hanx nzaox đuungx huungđ jau yâuc nzônh Cuđ Jenx phunz songx munh. 19Six Hê-lôtx huungh tăng zuc Yô-hanx coong nănh căn Hê-lô-đêtc nyăngz jau, nănh nyăngz yâuf au, cloon nănh ayx wax đomc muif huungđ huđ blătc, 20nănh zef năngx ayx nâyx huungđ pâu nănh wax đomc huđ timb: nănh zoz Yô-hanx muf clăngđ ănz nzauh.

21Six munh tinyh đoih jinh đangh ayx quaix-gâyf wax zanyf, Zâu Yê-su lauf taih ayx quaix-gâyf, Nănh cloo Zâu wax zanyf, muif tab guungh coib goib, 22tăng wa Zâu Singx-Lingh taih nzac Nănh naih hanyh cayx năngđ nooc coopz nâyx, yâuc naih wac coong yămz wa guungh, coong: “Mâyh six Yaz stăngz nyăngz Toonz. Yaz numđ nyađ Mâyh nzongf.”

23Zâu Yê-su quef coonz ayx cumh pâuz Nănh six cox tuz stamx săpc nyăngv, (six âyz munh mangc) Nănh six Yô-sepx nyăngz toonz, nzof Yô-sepx six Hê-li nyăngz toonz, 24Hê-li six Mat-tat nyăngz toonz, Mat-tat six Lê-wi nyăngz toonz, Lê-wi six Mên-ci nyăngz toonz, Mên-ci six Ya-nê nyăngz toonz, Ya-nê six Yô-sepx nyăngz toonz, 25Yô-sepx six Mat-ta-ti-atc nyăngz toonz, Mat-ta-ti-atc six A-môt nyăngz toonz, A-môt six Na-hum nyăngz toonz, Na-hum six Êtc-li nyăngz toonz, Êtc-li six Na-gê nyăngz toonz, 26Na-gê six Ma-atc nyăngz toonz, Ma-atc six Mat-ta-ti-atc nyăngz toonz, Mat-ta-ti-atc six Sê-mê-in nyăngz toonz, Sê-mê-in six Yô-sêkc nyăngz toonz, Yô-sêkc six Yô-đa nyăngz toonz, 27Yô-đa six Yô-a-nan nyăngz toonz, Yô-a-nan six Lê-sa nyăngz toonz, Lê-sa six Sê-lup-ba-bên nyăngz toonz, Sê-lup-ba-bên six Sê-an-ti-ên nyăngz toonz, Sê-an-ti-ên six Nê-li nyăngz toonz, 28Nê-li six Mên-ci nyăngz toonz, Mên-ci six Atc-đi nyăngz toonz, Atc-đi six Cô-samx nyăngz toonz, Cô-samx six Ên-ma-đam nyăngz toonz, Ên-ma-đam six Ê-a nyăngz toonz, 29Ê-a six Yô-su-wa nyăngz toonz, Yô-su-wa six Ê-li-yê-sê nyăngz toonz, Ê-li-yê-sê six Yô-lim nyăngz toonz, Yô-lim six Mat-tat nyăngz toonz, Mat-tat six Lê-wi nyăngz toonz, 30Lê-wi six Si-mê-ôn nyăngz toonz, Si-mê-ôn six Yu-đa nyăngz toonz, Yu-đa six Yô-sepx nyăngz toonz, Yô-sepx six Yô-nam nyăngz toonz, Yô-nam six Ê-li-ya-cim nyăngz toonz, 31Ê-li-ya-cim six Mê-lê-a nyăngz toonz, Mê-lê-a six Mên-na nyăngz toonz, Mên-na six Mat-ta-ta nyăngz toonz, Mat-ta-ta six Na-tan nyăngz toonz, Na-tan six Đa-witx nyăngz toonz, 32Đa-witx six Jêtc-si nyăngz toonz, Jêtc-si six Ô-bêtc nyăngz toonz, Ô-bêtc six Bô-atc nyăngz toonz, Bô-atc six Sanx-môn nyăngz toonz, Sanx-môn six Na-soon nyăngz toonz, 33Na-soon six A-mi-na-đapx nyăngz toonz, A-mi-na-đapx six Atc-min nyăngz toonz, Atc-min six An-ni nyăngz toonz, An-ni six Hêtx-lôn nyăngz toonz, Hêtx-lôn six Bê-lêtx nyăngz toonz, Bê-lêtx six Yu-đa nyăngz toonz, 34Yu-đa six Ya-côpx nyăngz toonz, Ya-côpx six I-sakx nyăngz toonz, I-sakx six Apx-la-ham nyăngz toonz, Apx-la-ham six Tê-la nyăngz toonz, Tê-la six Na-hô nyăngz toonz, 35Na-hô six Sê-luk nyăngz toonz, Sê-luk six Lê-u nyăngz toonz, Lê-u six Bê-lek nyăngz toonz, Bê-lek six Ê-bê nyăngz toonz, Ê-bê six Sa-la nyăngz toonz, 36Sa-la six Cai-nan nyăngz toonz, Cai-nan six An-ba-sat nyăngz toonz, An-ba-sat six Sem nyăngz toonz, Sem six Nô-ya nyăngz toonz, Nô-ya six La-mek nyăngz toonz, 37La-mek six Mê-tu-sê-la nyăngz toonz, Mê-tu-sê-la six Ê-nokx nyăngz toonz, Ê-nokx six Ya-lêt nyăngz toonz, Ya-lêt six Ma-ha-la-ên nyăngz toonz, Ma-ha-la-ên six Cê-nan nyăngz toonz, 38Cê-nan six Ê-nôt nyăngz toonz, Ê-nôt six Sêt nyăngz toonz, Sêt six A-đam nyăngz toonz, A-đam six Zâu Tênb-Huungh nyăngz toonz.