Skip to content
BibleKenya

Dao Ao Dai Literal Text

Lu-ca 16

Zâu Yê-su coong ănz wax đomc stayb sây: “Naih ah lanh puv quâyx munh naih ah tauh cun pâuz munh, nănh zuc cooux ănz zâu wâyc nănh tinyh phanv nongc zâu nyăngz jax toongx. Zâu êu nănh taih, yâuc coong ănz nănh: ‘Yaz numđ munh lănv mâyh six ayx laix heh? Mâyh oix zuc cănh coong mungv mâyh ayx nyăngz cumh pâuz, wâyc tăng nây mâyh max tuz ayx cun pâuz munh nzof.’ Tăng wa wax tauh cun pâuz munh songđ cănh nyâyh coong: ‘Yaz cayx ayx laix heh, wâyc yaz nyăngz zâu cayx tutb max phunz yaz ayx cun pâuz munh? Witz nib yaz yâuc max ayx tuz, joođ nhlinc gôh yâuc numđ nyayz. Yaz cayx ayx laix phunz tauv yaz zuc luiđ max tuz ayx cun pâuz munh, bix zef naih munh stipx yaz nzac stiz nyăngz pyau’ Tăng wa nănh êu sămv zâu nyăngz zaix wax đomc munh săngh lanh săngh lanh têx taih, nănh naic zetx lanh coong: ‘Mâyh sămv yaz nyăngz zâu buc laiv heh?’ Wax tauh munh tauz: ‘Ah pez tongđ Ca-lan yâuh.’ Six nănh coong ănz wax lanh munh: ‘Stâyv nzac, bix zoz mâyh nyăngz zaix tanz taih, coonx ja coong ngâuf săpc!’ Tăng wa nănh zef êu pitc lanh taih naic: ‘Năngx naih mâyh six sămv buc laiv heh?’ Wax tauh munh tauz: ‘Ah pez tic blauh witx.’ Nănh zef coong ănz wax tauh munh: ‘Zoz mâyh nyăngz zaix tanz taih, bix ja coong pêtz săpc.’ Zâu songđ tanv wax tauh nyâuđ max zanyx nyăngz pâuz wâyc nănh ta zux ix lemđ nzongf. Wâyc yămz nây stâyv sangc nyăngz munh ayx luungđ lôx năngx lemđ têx, yămz gwăngz cah njaf wax đomc nyăngz munh. Yaz coong bux ănz nyâuh, oix zuc nongc max zanyx nyăngz nyanh, ayx phunz nyâuh naih lah pyeoz toic, phunz tauv laiv zanyf nyanh gaib, nyâuh naih munh stipx nyâuh nzac stâyv quâyx yămz nyăngz tinc. Laiv lanh munh ayx tuz zanyx yămz cumh pâuz jenz, six lauf hayh ayx tuz zanyx yămz cumh pâuz lub, nzof laiv lanh ayx max zanyx yămz cumh pâuz jenz, six lauf ayx max zanyx yămz cumh pâuz lub. Wâyc nây, năngđ coong nyâuh max ayx tuz zanyx yămz nây stâyv sangc nyăngz tungh zăngc, naih mănv nzađ phunz senz nyăngz tungh zăngc phunz nyâuh heh? Năngđ coong nyâuh jămđ săngh munh nyăngz tax huungđ bix max zanyx nzof, naih mănv hayh phunz senz nyâuh cănh nyăngz tax huungđ phunz nyâuh heh? Max naih mănv hayh ayx iz tauh zâu nyăngz pâuz, wâyc nănh six hayh hănđ nâyx tauh bix stăngz wax tauh, yâuc hayh phătc nâyx tauh saix bix mangc stam wax tauh. Nyâuh max hayh ayx Zâu Tênb-Huungh nyăngz pâuz bix zef ayx nyanh nyăngz pâu.”

Wax zanyf, wax đomc Pha-li-si munh, wâyc stiz stăngz nyanh, mungv nâyx đomc wac, stiz songđ jetx Nănh. Zâu Yê-su coong ănz stiz: “Nyâuh six cănh yămz munh nyăngz cah đangc coong nyâuh six ayx peengh stimz munh, six Zâu Tênb-Huungh pâyz nyâuh nyăngz nyâuđ. Wâyc bamh munh phătc laiv huungđ saix Zâu Tênb-Huungh mangc yâuc numđ hănđ nzuf. Gâyf njanh cloon tâuc wac munh nyăngz wac six taih tauv Yô-hanx. Tăng wa staox ninyh, Zâu Tênb-Huungh nyăngz côkz six tuz lănv nzônh, munh tinyh đoih nzac jab japc nzac wa ninyh. Six guungh nib quaix ninyh lôx năngx hâyđ têx, gâyf njanh nyăngz ah nokx ah wec đăngc quaix ninyh.

Tinyh phanv laiv lanh queengx nănh nyăngz au bix ninyh zoz pitc lanh six longđ văngf munh nyăngz stoif, laiv lanh zoz zuc queengx langh nyăngz munh nzif nongc lauf longđ văngf munh nyăngz stoif.

Naih ah lanh puv quâyx munh, nănh zuz nhlêuf nyăngz guyz quav, muif noib, nhlinc hopb blanf nyađ, max stauh luungđ. Six naih ah lanh munh zâuđ bux hipđ ayx La-sa-latx, săngh claix pong stinb nzuf, munh ênz nănh ninyh ănz wa puv quâyx munh nyăngz pyau jeengh cah đangc, Wâyc nyâyh mungc oix tuz nhlinc tăng puv quâyx munh nyăngz đah mâyf tuih nzac wax đomc. Six, lauf naih clô taih clêmf nănh nyăngz claix. Tăng wa munh zâuđ tayc, nănh tuz stinz munh ênz ninyh cloon Apx-la-ham yămz. Blătc wa puv quâyx munh zef tayc munh songđ ênz ninyh plopx. Puv quâyx munh zuc muf wa yămz pâu, jinh đangh zuc munz zâuđ wax zanyf, nănh zaub minb mangc, phătc Apx-la-ham yămz côz, cloon La-sa-latx yămz wa. Nănh songđ hamv coong: ‘Claof jex Apx-la-ham lex, joođ hâuđ lênh yaz yâuc paiđ La-sa-latx phunz nănh nongc bah đoz zob womz taih ayx phunz yaz nyăngz byetc stingx tix cay, wâyc yaz yămz nây zuc tâuf pu zâuđ nzongf.’ Six Apx-la-ham tauz coong: ‘Sây lex, oix zuc săngx tauv mâyh yămz wa stâyv sangc, mâyh tuz stipx muif huungđ gongx nzuf nzof, six La-sa-latx yâuc cungb tuz zâuđ cuungv. Nâyx zanyf nănh tuz gongx yămz nây, six mâyh oix zuc tanyđ zâu. Yămz buz nây cloon mâyh wa yâuc naih ah nomz jangđ lub tuungh đôz nzongf, ayx tuz laiv lanh oix tăng nây ninyh mâyh wa lauf max hayh, yâuc max hayh tăng nyâyh wa quaix buz nây lauf.’ Tăng wa puv quâyx munh songđ coong: ‘Yaz nyăngz claof jex lex, ha nâyx yaz joođ mâyh paiđ La-sa-latx êu nănh muf yaz pha nyăngz pyau — wâyc yaz naih pyaz lanh yâuf pez — phunz nănh muf bux stiz, phunz stiz nzăngđ max zuc taih yămz nâyx cuyb munz zâuđ nyăngz tinc.’ Six Apx-la-ham tauz coong: ‘Stiz naih Mô-sê cloon wax đomc tâuc wac munh; stiz oix zuc mungv wax đomc munh!’ Six puv quâyx munh coong: ‘Max tuz đêh claof jex Apx-la-ham lex, six, năngđ coong naih tix lanh tăng tayc săngh taih muf pongh stiz, stiz six coi nyâuđ nhlimc stoif.’ Six Apx-la-ham coong ănz nănh: ‘Năngđ coong stiz max mungv Mô-sê cloon wax đomc tâuc wac munh, hănđ six naih munh tăng tayc săngh taih stiz lauf max zen.’”

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.