Skip to content
BibleKenya

Dao Ao Dai Literal Text

Lu-ca 15

Wax zanyf, wax đomc muif lanh sâub sôiv munh cloon stoif nyăngz munh tinyh đoih taih lêpc Zâu Yê-su yâuc mungv Nănh. Tăng wa, wax đomc Pha-li-si munh cloon nzaox gâyf steengb songđ yônx coong: “Lâyc tauh munh stipx stoif nyăngz munh yâuc, cloon stiz songc nhlinc.”

Zâu Yê-su songđ coong nâyx cuyb wac pây ănz stiz, coong: “Yămz nyâuh naih tix lanh munh naih ah pez tau pax jiz yuungh, nzof wax peob yuungh naih ah tauh ninyh gaih jêmh, nănh bix max zâyf ănz zu săpc zu tauh ănz wa đungc, bix ninyh lov wax tauh pax jiz yuungh gaih ayx tuz tauv pongh nănh haz? Tauv lov tuz pongh, nănh songđ numđ nyađ đamz ănz nănh wa bah tauh ênz lauf. Lauf tauv pyau, wax tauh munh êu njăngv njaf yâuf pez jenb taih, yâuc coong ănz stiz: ‘Oix zuc căn yaz numđ nyađ, wâyc yaz lov tuz pongh yaz nyăngz pax jiz yuungh ninyh gaih jêmh wax tauh.’ Yaz coong bux ănz nyâuh, năngđ naih ah lanh stoif munh coi nyâuđ nhlimc stoif, yămz wa cah zâyc guungh six lauf numđ nyađ năngđ nâyx, lôx năngx nyađ têx wa zu săpc zu lanh munh gongx max sămv zuc nhlimc stoif.

Max six naih tix lanh munh nzif naih săpc leepz nyanh pec, six năngđ coong nănh ayx ah leepz gaih, bix max zâyf pu toongz, nzâux pyau nzac jab lov ayx tuz tauv pongh haz? Tauv lov tuz pongh, nănh êu njăngv njaf munh taih, yâuc coong: ‘Oix zuc căn yaz numđ nyađ, wâyc yaz lov tuz pongh yaz wax leepz nyanh pec gaih.’ Lauf tinyh năngđ, yaz coong bux nyâuh, năngđ coong ah lanh stoif munh coi nyâuđ nhlimc stoif, Zâu Tênb-Huungh nyăngz stinz munh lauf numđ nyađ.”

Tăng wa, nănh zef lănv coong: “naih ah lanh munh, naih iz lanh toonz, wax tauh yâuf coong ănz pha: ‘Pha lex, joođ phunz yaz nyăngz phănc jax toongx phunz yaz.’ Wax tauh pha songđ zoz nănh nyăngz jax toongx taih tinyh tanb phunz stiz. Blătc quaix đangz, max sax noib, wax lanh toonz đany nănh dlonf nzuf muif huungđ, songđ setb ninyh stâyz phangz côz, yămz wa nănh songđ dluyh stimz tinyh phanv nongc nzuf nănh nyăngz nyanh. Tauv nănh nongc nzuf muif huungđ, yâuc toix wax nomz stâyz phangz pongh zuc nyâuđ sab lub, nănh songđ zâuđ zomc nzuf. Tăng wa nănh songđ ninyh ayx congz phunz wax nomz stâyz phangz nyăngz ah lanh munh, wax lanh munh êu nănh ninyh wa jêmh đungc jămđ tungf. Phătc tungf nhlinc wax đomc topc cub, nănh oix nhlinc, yâuc max naih mănv phunz nănh. Nănh songđ cănh poc wa nyâyh tauv nănh, yâuc coong: ‘Pâyz sax lanh munh ayx congz phunz yaz nyăngz pha naih nhlinc max tongf, yaz bix cayx zuc yămz nây tanyđ nyâuđ sab tayc! Yaz cayx nyoongz quef phunb đangz muf yaz nyăngz pha wa, yâuc coong ănz yaz nyăngz pha: “Pha lex, yaz longđ stoif cloon guungh yâuc longđ stoif cloon pha. Yaz max payh tuz hipđ ayx pha nyăngz sây nzof. Joođ nongc yaz cayx năngđ pha nyăngz ah lanh congz munh nâyx.”’ Nănh songđ nyoongz quef phunb đangz muf lov nănh nyăngz pha. Six tauv nănh năngx jinh yămz côz, nănh nyăngz pha mangc phătc nănh songđ numđ hâuđ lênh, songđ tiuv ninyh jom nănh clangz yâuc tomz nănh. Wax zanyf wax lanh sây coong ănz pha coong: ‘Pha lex yaz longđ stoif cloon guungh yâuc longđ stoif cloon pha. Yaz max payh tuz hipđ ayx pha nyăngz sây nzof.’ Six wax tauh pha coong ănz nănh wax đomc pâuz: ‘Coonx ninyh zoz wax đomc guyz năngx saix têx nzâyz taih zuz phunz nănh, yâuc zoz bah đoz quinb tăngh ănz nănh nyăngz puf, yâuc zoz stub taih tapc ănz staux. Zoz ah tauh ngoongh wăngh cunc, taih ayx a, pănh bênc ah tonx năngv nhlinc nongc nyađ nănh. Wâyc yaz nâyx tauh toonz tayc zef năngx săngh taih, gaih zef năngx lov tuz pongh.’ Tăng wa stiz songđ bênc hinh nhlinc nyađ. Six nănh wax tauh toonz coonz tăng wa cungh ngwaic jêmh lauf wax zanyf, nănh lauf tauv stătx pyau, numđ tungh njămh nzungz stingb, tiuh loongc nyađ. Nănh êu ah lanh pâuz taih, naic jađ ayx luungđ. Wax lanh pâuz coong ănz nănh: ‘Mâyh nyăngz yâuf phunb đangz lauf nyâuh pha bix êu tayx ah tauh ngoongh wăngh cunc ayx a, phunz nănh nongc nyađ stipx wâyc mâyh nyăngz yâuf tuz peengh oonz phunb đangz lauf.’ Tăng wa wax tauh tah songđ numđ nhlenx, nănh max oix nzac pyau muf, stiz pha songđ taih quinb nănh. Six nănh coong ănz stiz pha: ‘Pha mangc jađ, yaz ayx cumh pâuz phunz pha tuz pâyz sax nyăngv, yaz yâuc max naih zanyf aox pha laiv huungđ, pha lôx max naih zanyf phunz yaz tauv ah tauh yuungh gunx, phunz yaz nongc cloon yaz nyăngz lah pyeoz toic nhlinc nyađ, six tauv pha lâyc tauh sây lauf, nănh nzâyz pha nyăngz jax toongx ninyh ayx paic nzuf yâuc tac maic phăngh munh sab, năngđ nâyx pha bix năngx tayx ngoongh wăngh cunc wâyc nănh.’ Tăng wa stiz pha coong ănz nănh: ‘Sây lex, sây six njinh leox cloon pha yămz, pha naih nyăngz muif huungđ six săngh sây nyăngz nzuf. Six pănh hoopđ zuc bênc ah tonx năngv nhlinc nyađ, wâyc mâyh nyăngz yâuf, tayc nzof zef năngx tuz săngh taih, gaih nzof zef năngx lov tuz pongh.’”

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.