Yô-hanx 3

1Wax zanyf, naih ah lanh Pha-li-si munh wax đomc munh, bux hipđ ayx Ni-cô-đê-matx, nănh six cun Yu-tai munh nyăngz, ah lanh ayx côx munh. 2Bah nzămc nâyx lanh munh ninyh pongh Zâu Yê-su, yâuc coong ănz Nănh: “Stênx steengb lex, buz pâyz coong Mâyh six ah lanh stênx steengb tăng Zâu Tênb-Huungh taih, năngđ coong Zâu Tênb-Huungh max cloon yămz, six max naih mănv hayh ayx tuz nâyx đomc jix caox njingc nyăngz dlayc, năngđ Mâyh ayx nyăngz nâyx.” 3Zâu Yê-su tauz nănh coong: “Yaz coong senz bux mâyh, Năngđ coong laiv lanh max tuz steengb timb, wax tauh six max hayh tuz phătc Zâu Tênb-Huungh nyăngz côkz.” 4Ni-cô-đê-matx coong ănz Nănh: “Ah lanh munh côx nzof, laiv hayh ayx laix steengb timb heh? Wax tauh munh zef năngx hayh nzac nzif nyăngz nyâuđ njaf ninyh, bix zef steengb nyâyc hâyđ naz?” 5Zâu Yê-su tauz: “Yaz coong senz bux mâyh, năngđ coong laiv lanh max tăng womz cloon Singx-Lingh steengb taih, wax lanh munh six max hayh tuz nzac Zâu Tênb-Huungh nyăngz côkz. 6Laiv huungđ tăng stinb a steengb six stinb a, laiv huungđ tăng Singx-Lingh steengb six mengc hoonh. 7Yaz coong bux mâyh nyăngz dlayc năngx gâyf numđ nyâyh ganc: ‘Mâyh six năngx sămv zuc tuz stengb timb.’ 8Nzaox oix sâyb laiv bix sâyb, mâyh numđ nzaox nyăngz stingb, six mâyh max pâyz nzaox tăng laiv taih, yâuc max pâyz nzaox cayx ninyh tauv laiv. Tinyh phanv laiv lanh tăng Singx-Lingh steengb taih six lauf năngđ nâyx.” 9Ni-cô-đê-matx zef naic Nănh coong: “Laiv ayx laix tuz wax đomc dlayc setb taih heh?” 10Zâu Yê-su tauz nănh coong: “Mâyh six I-sa-la-ên munh nyăngz stênx steengb, mâyh bix lauf max pâyz wax đomc jau naz? 11Yaz coong senz bux mâyh, buz coong buz pâyz quaix nyăngz jau, buz phătc quaix nyăngz buz yâuc ayx zanyx manyf, six nyâuh max stipx buz nyăngz zanyx manyf wac. 12Năngđ coong yaz coong nây bamh canz nyăngz jau bux nyâuh, bix nyâuh lôx max zen, năngđ nâyx yaz coong cah zâyc guungh nyăngz jau bux nyâuh, nyâuh bix laiv ayx laix hayh zen heh? 13Max zeengx naih mănv tuz staox guungh ninyh setb nzuf tăng guungh taih wax Tauh — six Bamh munh. 14Mô-sê yămz wa stâyz phangz blănf njăpc nangz staox njăngb ayx năngđ laix, six Bamh Munh lauf zuc zoz njăpc staox njăngb năngđ wa nâyx, 15nongc phunz laiv lanh munh zen tauv Nănh six tuz naih stâyv quâyx nyăngz mengc.

16Wâyc Zâu Tênb-Huungh senz stăngz guungh đi munh, ayx tuz sađ Nănh nyăngz ah tauh Đokc Toonz, phunz laiv lanh zen wax tauh Toonz six max zuc mêtc, yâuc tuz stâyv quâyx nyăngz mengc. 17Nzof Zâu Tênb-Huungh paiđ Nănh nyăngz Toonz nzac bamh canz taih, max zâyf nongc tingc bamh munh nyăngz stoif, six phunz bamh munh păngc wax tauh Toonz bix tuz njâuv. 18Laiv lanh zen wax tauh Toonz songđ max zuc tingc stoif, six laiv lanh max zen yâuc zuc tingc stoif nzof gôh, wâyc nănh max zen Zâu Tênb-Huungh nyăngz ah tauh đokc Toonz nyăngz manyh. 19Nây six zuc tingc stoif nyăngz jau, wâyc: gwăngz nzac nây bamh canz taih, six munh oix nongc nzămc năngx nzongf têx gwăngz wâyc stiz ayx nyăngz jau six huđ nzongf. 20Wâyc ayx huđ nyăngz munh six hănđ gwăngz, yâuc max oix taih lov gwăngz, phunz nănh ayx nyăngz jau max zuc setb yangh taih. 21Six, laiv lanh âyz senz gâyf ayx yâuc taih lov gwăngz, phunz nănh ayx nyăngz cumh pâuz tuz setb nzăngc taih, phunz stunx coong, wax đomc cumh pâuz six păngc Zâu Tênb-Huungh ayx.”

22Blătc wax đomc dlayc, Zâu Yê-su cloon Nănh wax đomc stayb sây nzac wa Yu-đê stâyz phangz ninyh. Nănh cloon stayb sây buz yămz wa yâuc ayx quaix-gâyf. 23Six, Yô-hanx lauf năngx jinh yămz wa Atc-nôn ayx quaix-gâyf gâyh Sa-lim max côz, wâyc yămz wa naih womz đuungx, songx munh songđ tinyh ênz taih wa ayx quaix-gâyf — 24wax zanyf Yô-hanx six max zeengx zuc zoz ănz nzauh. 25Tăng wa, Yô-hanx nyăngz stayb sây căn ah lanh Yu-tai munh naih tinyh zenđ setb taih, coong tauv stav wâyx nyăngz jau. 26Stiz songđ ninyh Yô-hanx wa yâuc coong ănz nănh: “La-bi lex, cah đangc cloon mâyh yămz wa Njoh-đen wăngx wax tauh munh, mâyh bix ayx zanyx manyf phunz wax tauh munh, phanv mangc geh, Nănh jinh đangh yămz wa ayx quaix-gâyf, songx munh muif lanh yâuc tinyh đoih ninyh Nănh wa.” 27Yô-hanx tauz yâuc coong: “Năngđ coong wax đomc max zâyf tăng guungh sađ phunz wax lanh munh, six max naih mănv hayh stipx tuz luungđ, hănđ ah huungđ lauf max tuz. 28Nyâuh cănh ayx zanyx manyf phunz yaz, yaz coong: ‘Yaz six max zâyf Zâu Jix-Tuz,’ six ‘yaz tuz paiđ taih đangc Nănh.’ 29Laiv lanh nzăngđ zoz au six săngb langh. Nzof săngb langh nyăngz lah pyeoz toic, six stâuđ yămz wa mungv săngb langh, yâuc numđ nyađ mungv săngb langh nyăngz stingb. Lauf tinyh năngđ, nây six senz yaz nyăngz numđ nyađ gôh. 30Nănh six tuz pâuh staox njăngb, yaz six zuc sămc nzac hav.

31Tăng guungh taih wax Tauh six năngx lub quaix. Laiv lanh tăng bamh canz setb taih six săngh nây bamh canz nyăngz, yâuc cungb coong bamh canz nyăngz jau cuungv. Six tăng guungh taih wax Tauh six năngx lub quaix muif lanh. 32Nănh ayx zanyx manyf coong tauv Nănh tuz phătc căn tuz numđ nyăngz, six max naih mănv stipx Nănh nyăngz zanyx manyf wac. 33Laiv lanh stipx Nănh nyăngz zanyx manyf wac, yâuc ayx zanyx manyf coong Zâu Tênb-Huungh six senz nyăngz. 34Wâyc Zâu Tênb-Huungh paiđ taih wax Tauh six coong Zâu Tênb-Huungh nyăngz wac. Wâyc Zâu Tênb-Huungh sađ Singx-Lingh phunz Nănh six max hayh pong stâuv. 35Tênb-toongh Pha stăngz Nănh nyăngz Toonz songđ jaoz muif huungđ yămz Nănh nyăngz puf đi. 36Laiv lanh zen Nănh nyăngz Toonz six tuz stâyv quâyx nyăngz mengc, six laiv lanh max zen mungc Nănh nyăngz Toonz six max hayh tuz stâyv quâyx nyăngz mengc, six Zâu Tênb-Huungh tingc stoif nyăngz jau, yâuc năngx jinh yămz nănh gôh.”