Yô-hanx 21

1Blătc wax đomc dlayc, Zâu Yê-su zef hinđ setb taih phunz stayb sây buz yămz wa Ti-bê-lêtx coiđ sinh. Nănh hinđ setb taih ayx năngđ nâyx: 2wax đomc stayb sây tinyh đoih căpx dlonf yămz wa naih — Si-môn Pi-tê, Tô-matx, yâuc hipđ ayx Sây Toix, Na-ta-na-ên, nănh six yămz Ca-na dlanyh Ga-li-lê stâyz phangz, cloon Sê-bê-đi wax đomc toonz, cloon Nănh iz lanh stayb sây timb. 3Si-môn Pi-tê bux stiz coong: “Yaz cayx ninyh ayx byauf.” Stiz coong ănz nănh: “buz lauf căn mâyh ninyh.” Stiz setb ninyh nzac ah saz đangđ, six wax munf stiz ayx max tuz luungđ tiny. 4Tauv guungh gwăngz, Zâu Yê-su stâuđ wa coiđ sinh, six, stayb sây buz max pâyz coong wa six Zâu Yê-su. 5Wax zanyf Zâu Yê-su coong ănz stiz: “Sây lex, nyâuh max naih luungđ byauf nongc nhlinc haz?” Stiz tauz Nănh coong: “Max.” 6Six Nănh bux stiz: “Phanv pungx leđ quaix byaoh wax phanx đangc sinh ninyh, nyâuh six tuz byauf.” Tăng wa, stiz pungx lec nzac songđ tuz byauf đuungx nzongf ayx tuz stiz max naih jab tăkc tuz leđ staox taih. 7Tăng wa, naih ah lanh stayb sây, six Zâu Yê-su stăngz wax tauh, coong ănz Pi-tê: “Lâyc six Zâu.” Năngđ nâyx, tauv Si-môn Pi-tê numđ coong wa six Zâu, songđ zoz guyz đao taih sênh ănz stinb (wâyc nănh jinh đangh căng căng), songđ đanyz nzac womz ninyh. 8Năngx naih wax đomc stayb sây six yămz wa đangc (wâyc stiz gâyh coiđ sinh max côz, cungb gâyh cox zu săpc meetx nâyx), tăkc lêpc ah phunb leđ byauf pong. 9Tăng wa, stiz setb đangđ staox coiđ sinh taih wax zanyf, stiz phătc naih ah đauc tâuf tanv năngx jinh naih tâuf, naih byauf cloon nzu siz ănz wa cah zâyc. 10Zâu Yê-su bux stiz: “Nzâyz tix cay nyâuh nzăngđ ah yac ayx tuz wax đomc byauf taih nây.” 11Si-môn Pi-tê songđ nzac đangc ninyh tăkc leđ quaix wa coiđ sinh taih, byauf lub pong leđ nzuf naih ah pez ngâuf săpc stamz tauh. Six hănđ tuz byauf đuungx nzongf, leđ lauf max byaif. 12Zâu Yê-su coong ănz stiz: “Taih nây nhlinc bah đoomz gôh.” Six, wax đomc stayb sây buz yâuc max naih mănv nzađ naic Nănh: “Mâyh six mănv heh?” Wâyc stiz tinyh đoih pâyz coong lâyc six Zâu. 13Zâu Yê-su njăpc staox taih, zoz nzu yăngf phunz stiz, hănđ byauf lauf ha. 14Nây six Zâu Yê-su tăng tayc săngh taih, Nănh hinđ setb taih phunz stayb sây buz phătc, tah stamz hâyđ.

15Tauv stiz nhlinc bah đoomz tuz, Zâu Yê-su coong bux Si-môn Pi-tê: “Yô-hanx nyăngz toonz, Si-môn lex, mâyh stăngz yaz năngx đuungx têx nâyx đomc munh max?” Nănh tauz Zâu Yê-su coong: “Zâu lex, stăngz lêc, mâyh pâyz coong yaz stăngz mâyh.” Zâu Yê-su coong bux nănh: “Oix zuc jămđ yaz nyăngz pax jiz yuungh jenz bex.” 16Zâu Yê-su zef coong ănz nănh tah nyâyc hâyđ: “Yô-hanx nyăngz toonz, Si-môn lex, mâyh senz stăngz yaz max?” Nănh tauz Zâu Yê-su: “Zâu lex, stăngz lêc, mâyh pâyz coong yaz stăngz mâyh.” Zâu Yê-su coong bux nănh: “Oix zuc jămđ yaz nyăngz pax jiz yuungh bex.”

17Zâu Yê-su zef naic nănh tah stamz hâyđ: “Yô-hanx nyăngz toonz, Si-môn lex, mâyh stăngz yaz max?” Pi-tê songđ numđ munz stimz wâyc Zâu Yê-su naic nănh tuz tah stamz hâyđ coong: “Mâyh stăngz yaz max?” Nănh tauz Zâu Yê-su: “Zâu lex, mâyh pâyz muif huungđ nzuf; mâyh pâyz coong yaz stăngz mâyh.” Zâu Yê-su coong ănz Nănh: “Oix zuc jămđ yaz nyăngz pax jiz yuungh bex. 18Yaz coong senz bux mâyh, mâyh năngx gunx wax zanyf, mâyh cănh stayb quav langb oix ninyh laiv tix lauf ninyh, six tauv mâyh côx, mâyh six stuungb cănh nyăngz puf, phunz munh stayb quav langb phunz mâyh yâuc ênz mâyh ninyh, mâyh max oix ninyh nyăngz tinc.” 19Zâu Yê-su coong ayx nâyx, nongc nuz tauv nănh zuc tayc ayx laix phunz Zâu Tênb-Huungh tuz gwăngz eeng. Coong wac tuz, Zâu Yê-su bux nănh: “Oix zuc lêpc yaz bex.” 20Pi-tê winb đangz, phătc Zâu Yê-su stăngz wax tauh stayb sây lêpc nănh đangz, wax tauh munh six nhlinc bah nzămc năngv wax munf bix pongc Zâu Yê-su nyăngz cah lapc, yâuc naic coong: “Zâu lex, maic mâyh wax tauh six mănv heh?” 21Wâyc nây, mangc phătc wax lanh munh, Pi-tê songđ coong ănz Zâu Yê-su: “Zâu lex, ha nâyx lanh munh six ayx laix heh?” 22Zâu Yê-su coong ănz Nănh: “Năngđ coong yaz oix wax lanh munh yămz tuz tauv yaz taih, bix naih luungđ quenđ tauv mâyh heh? Mâyh phanv lêpc yaz gôh.” 23Wâyc nây, nâyx zâux wac lănv nzêux yămz wax đomc yâuf pez coong wax tauh stayb sây six max tayc. Six Zâu Yê-su max coong ănz nănh coong wax lanh munh six max tayc, six cungb coong: “Năngđ coong yaz oix wax lanh munh yămz tuz tauv yaz taih, bix naih luungđ quenđ tauv mâyh heh.”

24Nâyx six wax tauh stayb sây ayx zanyx manyf tauv nâyx đomc jau, nănh yâuc ja nâyx đomc jau nyăngz munh, nzof pănh pâyz tuz coong nănh nyăngz zanyx manyf wac six senz nyăngz. 25Zâu Yê-su ayx nyăngz cumh pâuz, năngx naih đuungx huungđ timb, năngđ coong stuy nzuf muif huungđ cumh pâuz ja têx, yaz nyâyh taih, yămz nây guungh đi, six max naih tinc ănz tuz tongf munh ja taih wax đomc stâub.