Skip to content
BibleKenya

Dao Ao Dai Literal Text

Yô-hanx 16:33

Verse 33 is marked below, with the whole chapter around it. Read from the start

“Yaz coong nâyx đomc jau bux nyâuh, phunz nyâuh nzăngđ max zuc tuih nyâuđ. Stiz six luiđ nyâuh setb huyđ toongh ninyh. Six tauv wax zanyf muif lanh tayx nyâuh nyăngz munh six laic nyâyh coong, stiz ayx nongc stungx phunz Zâu Tênb-Huungh. Stiz ayx wax đomc cumh pâuz six wâyc stiz max pâyz Tênb-toongh Pha, yâuc max pâyz yaz. Six, yaz coong nâyx đomc jau bux phunz nyâuh nzof, phunz laiv zanyf beengc stiz nyăngz săngx huđ, nyâuh six săngx tauv yaz nzaox phunz nyâuh nâyx đomc wac. Six, tăng ah yac yaz max zeengx coong nâyx đomc jau phunz nyâuh, wâyc yaz năngx jinh cloon nyâuh yămz. Six nâyx zanyf yaz muf paiđ yaz taih wax Tauh wa, nyâuh yâuc max naih mănv naic yaz coong: ‘Mâyh ninyh laiv tix heh?’ Six wâyc yaz coong nâyx đomc jau bux nyâuh, nyâuh nyăngz nyâuđ songđ numđ stauh nzuf. Six, yaz coong senz bux nyâuh, yaz muf six wâyc phunz nyâuh tuz gongx. Năngđ coong yaz max muf, Oonz Nyâuđ Wax Tauh six max taih cloon nyâuh yămz. Six yaz năngđ coong muf, yaz six paiđ wax Tauh taih cloon nyâuh yămz. Tauv wax Tauh taih Nănh six pob manyf phunz bamh munh pâyz tauv stoif, pâyz tauv ayx peengh stimz nyăngz jau, yâuc pâyz tauv tingc stoif nyăngz jau — pâyz tauv stoif nyăngz jau, wâyc stiz max zen yaz; pâyz tauv ayx hoopđ nyăngz jau, six wâyc yaz muf yaz nyăngz Pha wa, nyâuh songđ max phătc yaz gôh; pâyz tauv stămđ stoif nyăngz jau, six wâyc cun nây bamh canz wax tauh zuc tingc stoif nzof. Yaz naih đuungx huungđ dlayc timb bux nyâuh, six nâyx zanyf nyâuh max zeengx hayh saz tuz. Six tauv wax Tauh senz gâyf nyăngz Singx-Lingh taih, Nănh six yenv nyâuh pâyz tuz muif huungđ senz gâyf, wâyc Nănh six max cănh coong, Nănh six cungb coong Nănh tuz numđ quaix nyăngz wac, Nănh yâuc bux phunz nyâuh pâyz tauv cayx zuc setb taih nyăngz jau. Wax Tauh six zanyf yaz, wâyc Nănh stipx laiv huungđ tăng yaz taih Nănh yâuc bux phunz nyâuh pâyz. Tênb-toongh Pha naih nyăngz muif huungđ, six săngh yaz nyăngz. Wâyc nâyx, yaz songđ coong, wax Tauh six stipx săngh yaz nyăngz wax đomc bux phunz nyâuh pâyz. Max naih lauh, nyâuh six max tuz phătc yaz gôh, nzof blătc wa max lauh, nyâuh six zef tuz phătc yaz.” Wax zanyf, Nănh wax đomc stayb sây naih ah phanx poc wa lanh naic lanh coong: “Stayb pha coong ănz pănh coong: ‘Max naih lauh, nyâuh six max phătc yaz gôh, nzof blătc wa max lauh, nyâuh six zef tuz phătc yaz’ yâuc coong: ‘Wâyc yaz muf Tênb-toongh Pha wa’ Nâyx đomc dlayc six ayx laix?” Tăng wa, stiz coong: “‘Max lauh’ âyz gâyf six ayx laix loz? Pănh max pâyz stayb pha jinh đangh coong luungđ.” Zâu Yê-su pâyz coong stiz oix naic Nănh, Nănh songđ coong ănz stiz: “Nyâuh cănh poc lâyc nyâyh tauv yaz coong wax đomc wac coong: ‘Max naih lauh, nyâuh max phătc yaz gôh, nzof blătc wa max lauh, nyâuh six zef tuz phătc yaz’? Yaz coong senz bux nyâuh, nyâuh six yônx meengc, haoh, năngx naih bamh munh six numđ nyađ. Nyâuh yâuc numđ stauh, six nyâuh stauh nyăngz yâuc tuz coi pênx numđ nyađ. Munh nzif beengc săngx huđ steengb sây wax zanyf six naih gumc munz njitc, six tauv steengb tuz ah lanh sây, nănh max săngx tauv nănh wax đomc munz, wâyc nănh numđ nyađ steengb tuz ah lanh sây yămz nây bamh canz. Lauf tinyh năngđ, nâyx zanyf nyâuh six naih stauh nyăngz jau, six tauv yaz năngx pongh nyâuh timb, nzof nyâuh nyăngz nyâuđ six tuz numđ nyađ, yâuc max naih mănv hayh zoz tuz nyâuh nyăngz numđ nyađ gâyh nyâuh. Tauv wax noib nyâuh six max naic yaz laiv huungđ. Yaz coong senz bux nyâuh, nyâuh tim yaz nyăngz manyh joođ Tênb-toongh Pha toix laiv huungđ, Nănh six sađ phunz nyâuh. Tauv nâyx zanyf nyâuh lauf max zeengx tim yaz nyăngz manyh joođ laiv huungđ. Phanv joođ geh, nyâuh six stipx tuz, phunz nyâuh nyăngz numđ nyađ tuz clăkx clunh nzuf.

Yaz nongc wac pây coong nâyx đomc jau ănz nyâuh; săngx huđ tauv, yaz six max nongc wac pây coong ănz nyâuh nzof, plănc taih, yaz six coong năngx yox phunz nyâuh pâyz tauv Tênb-toongh Pha. Tauv wax noib, nyâuh six tim yaz nyăngz manyh joođ, yaz yâuc max coong ănz nyâuh coong yaz six joođ Tênb-toongh Pha tayv phunz nyâuh, wâyc Tênb-toongh Pha cănh stăngz nyâuh, wâyc nyâuh stăngz yaz yâuc zen coong yaz six tăng Tênb-toongh Pha taih. Yaz six tăng Tênb-toongh Pha wa nzac bamh canz taih. Nzof yaz zef gâyh bamh canz muf Tênb-toongh Pha wa.” Nănh wax đomc stayb sây coong: “Phanv mangc, stayb pha nâyx zanyf coong yox nzuf, yâuc max nongc wac pây coong. Nâyx zanyf, buz pâyz coong stayb pha pâyz muif huungđ nzuf, yâuc max sămv zuc mănv naic mâyh. Năngđ nâyx, buz zen coong mâyh six tăng Zâu Tênb-Huungh taih.” Zâu Yê-su tauz stiz coong: “Nâyx zanyf nyâuh zen max? Phanv mangc, săngx huđ tauv — yâuc tauv nzof — nyâuh six zuc lunc nzuf, mănv ninyh mănv nyăngz jau, nyâuh quanyf yaz ah lanh yămz. Six, yaz max zâyf ah lanh yămz, wâyc Tênb-toongh Pha cloon yaz yămz. Yaz coong nâyx đomc dlayc bux nyâuh phunz nyâuh naih gwanb looc yămz yaz. Nyâuh pongh zâuđ nanc yămz nây bamh canz, six oix zuc pungx nyâuđ, Yaz hingh quaix bamh canz nzof gôh.”

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.