Yô-hanx 1:5

1Quef coonz naih Gâyf, Gâyf cloon Zâu Tênb-Huungh yămz, Gâyf six Zâu Tênb-Huungh. 2Tăng quef coonz Nănh cloon Zâu Tênb-Huungh yămz. 3Muif huungđ păngc Nănh tuz zuyx taih, năngđ coong max păngc Nănh zuyx taih, six max naih laiv huungđ tuz setb taih. 4Nănh six săngh mengc, nzof săngh mengc six bamh munh nyăngz gwăngz. 5Gwăngz siux nzac nzămc, nzof nzămc yâuc max hayh hingh tuz gwăngz.

6Naih ah lanh munh tuz Zâu Tênb-Huungh paiđ taih, nănh nyăngz bux six hipđ ayx Yô-hanx. 7Nănh taih six nongc ayx zanyx manyf, nănh six ayx zanyx manyf phunz gwăngz, ayx phunz tăng nănh, muif lanh munh nzăngđ hayh zen. 8Nănh six max zâyf senz gwăngz, six nănh taih nongc ayx zanyx manyf phunz gwăngz. 9Nây gwăngz six senz nyăngz gwăngz, nzac bamh canz taih, nongc siux gwăngz phunz muif lanh munh. 10Nănh yămz nây bamh canz nzof, wâyc păngc Nănh bamh canz tuz zuyx taih, six bamh munh yâuc max saz tuz Nănh. 11Nănh taih tauv Nănh nyăngz tinc, six Nănh nyăngz munh yâuc max stipx Nănh. 12Six tinyh phanv laiv lanh stipx Nănh, yâuc zen Nănh nyăngz manyh wax đomc munh, Nănh six sađ lanyf phunz stiz tuz săngh Zâu Tênb-Huungh nyăngz toonz sab. 13Wax đomc munh tuz steengb max zâyf tăng samđ stâyz, lauf max zâyf tăng bamh munh nyăngz stinb a, max six tăng bamh munh nyăngz zux ix, six tăng Zâu Tênb-Huungh taih. 14Gâyf săngh ah tauh bamh munh, yâuc yămz pănh nyăngz mungh tongx, naih pôz cloon senz gâyf pong nzuf, pănh tuz phătc Nănh nyăngz gwăngz eeng, six senz Ah Lanh Đokc Toonz tăng Tênb-toongh Pha taih nyăngz gwăngz eeng. 15Yô-hanx ayx zanyx manyf phunz Nănh yâuc hamv lub coong: “Nây six yaz coong tauv wax Tauh gôh: ‘Taih đangz yaz wax Tauh six năngx lub têx yaz, wâyc Nănh yămz đangc yaz nzof.’” 16Wâyc Nănh naih dloih muif huungđ pôz, pănh muif lanh songđ tuz stipx, nâyx huungđ pôz tauv wax huungđ pôz. 17Gâyf njanh six tăng Mô-sê bix tuz njăpc taih. Năngx naih pôz cloon senz gâyf six tăng Zâu Yê-su Jix-Tuz taih. 18Max zeengx naih mănv phătc quaix Zâu Tênb-Huungh. Cungb Zâu Tênb-Huungh nyăngz Ah Lanh Đokc Toonz cuungv, six yămz Tênb-toongh Pha cah njaf wax Tauh, wax Tauh cănh phunz pănh pâyz tuz tauv Tênb-toongh Pha.

19Nây six Yô-hanx ayx zanyx manyf nyăngz wac, Yu-tai munh paiđ wax đomc stayb munh cloon Lê-wi munh tăng Yê-lu-sa-lem taih nongc naic nănh coong: “Mâyh six mănv heh?” 20Nănh toongx songx coong — max pyenv tiny yâuc nhlimb — coong: “Yaz six max zâyf Zâu Jix-Tuz.” 21Stiz naic nănh: “Ha six ayx laix? Mâyh six Ê-li-ya yah?” Nănh tauz: “Yaz max zâyf.” “Ha mâyh six Tâuc Wac Munh mah?” Nănh tauz: “Max.” 22Tăng wa, stiz coong ănz nănh: “Mâyh six mănv, bux buz, buz nzăngđ naih wac tauz phunz paiđ buz taih wax đomc munh? Ha mâyh cănh coong mâyh six mănv?” 23Nănh tauz:

“Yaz six hamv stingb lub yămz wa stâyz phangz blănf coong:

‘Oix zuc ayx Zâu nyăngz jau năngx zac,’

năngđ tâuc wac munh I-sa-ya coong nâyx.” 24Tuz paiđ taih nyăngz munh six Pha-li-si wax peob munh, 25Stiz naic nănh, yâuc coong ănz nănh: “Năngđ coong mâyh max zâyf Zâu Jix-Tuz, yâuc max zâyf Ê-li-ya, yâuc max zâyf Tâuc Wac Munh, ha săngh laix mâyh bix ayx quaix-gâyf heh?” 26Yô-hanx tauz stiz coong: “Yaz nongc womz ayx quaix-gâyf. Năngx naih ah Tauh yămz nyâuh nyăngz mungh tongx six nyâuh max pâyz, 27Nănh six taih đangz yaz wax Tauh, yaz lôx max payh tuz zay Nănh nyăngz stub langb.” 28Wax đomc dlayc setb taih six yămz Bê-ta-ni njăngv Njoh-đen wăngx toix nganc, Yô-hanx jinh đangh ayx quaix-gâyf nyăngz tinc. 29Tah nyâyc noib, Yô-hanx phătc Zâu Yê-su quaix nănh wa taih, songđ coong: “Wex, Zâu Tênb-Huungh nyăngz pax jiz yuungh jenz, zaub guungh đi munh nyăngz stoif wax Tauh! 30Nây six yaz coong tauv wax Tauh: ‘Nănh taih đangz yaz yâuc ayx năngx lub têx yaz wax Tauh, wâyc Nănh six yămz đangc yaz nzof.’ 31Yaz lôx max pâyz Nănh, six wâyc phunz I-sa-la-ên pâyz tuz Nănh, yaz taih nongc womz ayx quaix-gâyf six wâyc nâyx đomc.” 32Yô-hanx ayx zanyx manyf coong: “Yaz phătc Singx-Lingh tăng guungh nzac taih năngđ nooc coopz nâyx, bopb Nănh. 33Yaz lauf max saz Nănh, six paiđ yaz nongc womz ayx quaix-gâyf wax Tauh, Nănh coong bux yaz: ‘Mâyh phătc laiv lanh munh naih Singx-Lingh nzac taih bopb yămz nănh, wax Tauh Nănh six nongc Zâu Singx-Lingh ayx quaix-gâyf gôh.’ 34Yaz tuz mangc phătc songđ ayx zanyx manyf coong, nây six Zâu Tênb-Huungh nyăngz Toonz.”

35Naih ah hâyđ timb, nyâyc noib, Yô-hanx cloon nănh nyăngz iz lanh stâyb sây jinh đangh stâuđ yămz wa, 36mangc phătc Zâu Yê-su pitb wa, Yô-hanx coong: “Wex, Zâu Tênb-Huungh nyăngz Pax Jiz Yuungh Jenz!” 37Yô-hanx wa iz lanh stayb sây numđ coong năngđ nâyx stiz songđ ninyh lêpc Zâu Yê-su. 38Zâu Yê-su winb đangz songđ phătc stiz taih lêpc Nănh, Nănh naic stiz: “Nyâuh lov mănv heh?” Stiz tauz Nănh: “La-bi lex, (âyz gâyf six coong ‘Stayb pha’), Mâyh yămz laiv tix heh?” 39Zâu Yê-su tauz stiz coong: “Nyâuh phanv ninyh six phătc.” Tăng wa stiz songđ ninyh, phătc Nănh yămz wax nomz tinc, wax noib stiz poc wa cloon Nănh yămz. Wax zanyf six cox pyâyz săngx huđ. 40Wa iz lanh numđ Yô-hanx coong naih ah lanh ninyh lêpc Zâu Yê-su, six Si-môn Pi-tê nyăngz yâuf, An-đa-lu. 41Tah yetx, An-đa-lu ninyh pongh nănh nyăngz tah đangc six Si-môn, songđ lănv bux nănh, coong: “Buz pongh Mê-si-ya nzof” (âyz gâyf six coong Zâu Jix-Tuz). 42An-đa-lu ênz Si-môn ninyh Zâu Yê-su wa. Tauv Zâu Yê-su phătc nănh, songđ coong: “Mâyh six Si-môn, Yô-hanx nyăngz toonz. Mâyh six hipđ ayx Cê-phatx” (wax nomz bux âyz gâyf six hipđ ayx “Pi-tê”).

43Nyâyc noib, Zâu Yê-su oix gâyh wax nomz tinc ninyh wa Ga-li-lê, Nănh ninyh pongh Phi-lipx songđ bux nănh coong: “Taih lêpc Yaz gôh.” 44Phi-lipx six Bêtx-sai-đa munh, lauf cloon An-đa-lu căn Pi-tê yămz ah nomz dlanyh. 45Phi-lipx ninyh pongh Na-ta-na-ên yâuc coong ănz nănh: “Buz ah yac pongh Mô-sê ja yămz gâyf njanh stâub cloon wax đomc tâuc wac munh lauf coong tauv wax Tauh — Nănh six Yê-su, yămz Na-sa-leetx, Yô-sepx nyăngz toonz.” 46Six Na-ta-na-ên tauz nănh coong: “Lauf năngx naih tix huungđ gongx tăng Na-sa-leetx setb yah?” Phi-lipx coong ănz nănh: “Phanv ninyh mangc.” 47Zâu Yê-su phătc Na-ta-na-ên jinh đangh taih Nănh wa, Zâu Yê-su songđ coong tauv nănh: “Phanv mangc, nây six senz ah lanh I-sa-la-ên munh, yămz nâyx lanh munh senz max naih cux quaiz nyăngz jau!” 48Na-ta-na-ên naic Zâu Yê-su: “Ayx laix Mâyh bix pâyz yaz?” Zâu Yê-su tauz, ănz nănh coong: “Tăng Phi-lipx max zeengx êu mâyh, Yaz phătc mâyh, yămz wa bănx tauh đi nzof gôh” 49Na-ta-na-ên tauz Nănh coong: “La-bi lex, Mâyh six Zâu Tênb-Huungh nyăngz Toonz! Mâyh six I-sa-la-ên munh nyăngz Huungh!” 50Zâu Yê-su zef tauz nănh yâuc coong: “Mâyh zen six wâyc Yaz coong ănz mâyh coong: ‘Yaz phătc mâyh yămz wa bănx tauh đi zâyf max’? Mâyh six tuz phătc đuungx huungđ dlayc năngx lub têx nây timb.” 51Tăng wa Zâu Yê-su coong ănz nănh: “Yaz coong senz bux nyâuh, nyâuh six phătc guungh coib goib, yâuc phătc Zâu Tênb-Huungh nyăngz stinz munh staox nzac yămz Bamh Munh cah zâyc.”