Hipđ-lu 1

1Lôx noib, Zâu Tênb-Huungh nongc wax đomc tâuc wac munh coong ănz pănh wax đomc claof jex đuungx hâyđ, yămz đuungx huungđ zux ix, 2six tauv nâyx đomc stêtb mâyv nyăngz noib, Zâu Tênb-Huungh songđ nongc Nănh nyăngz Toonz coong ănz pănh, senz Nănh njăpc taih nongc cun muif huungđ wax Tauh, yâuc wâyc wax Tauh Toonz, Nănh bix zuyx bamh canz taih; 3nâyx tauh toonz six hinđ manyf Zâu Tênb-Huungh nyăngz gwăngz eeng cloon Nănh clăkx clunh nyăngz hanyh jangx, yâuc nongc Nănh naih lanyf nyăngz wac pâuh muif huungđ, nzof tauv ayx soongb stav stoif nyăngz cumh pâuz, wax Tauh Toonz songđ tuz stâyv yămz lub quaix wax Tauh nyăngz byaoh phanx yămz njăngb quaix nyăngz tinc; 4wâyc tuz zanyb saix blătc wax đomc stinz munh sax phănc, Nănh yâuc tuz naih manyh năngx lub têx wax đomc stinz munh sax phănc. 5Wâyc Zâu Tênb-Huungh naih laiv zanyf coong ănz wax đomc stinz munh laiv tauh coong:

“Mâyh six Yaz nyăngz Toonz.

Nâyx noib Yaz steengb Mâyh taih”?

Yâuc coong:

“Yaz six săngh Mâyh nyăngz Pha,

nzof Mâyh six săngh Yaz nyăngz Toonz”?

6Six, Nănh ênz Toonz Coonz nzac bamh canz taih wax zanyf, Nănh coong: “Yetx stong Zâu Tênb-Huungh nyăngz stinz munh six oix zuc canyx bongc wax tauh Toonz.” 7Năngx naih wax đomc stinz munh, Nănh six coong:

“Zâu Tênb-Huungh ayx phunz Nănh wax đomc stinz munh pênx nzaox,

nzof Nănh wax đomc pâuz six pênx tâuf byetc.”

8Six coong tauv wax tauh Toonz, yâuc coong:

“Zâu Tênb-Huungh lex, Mâyh nyăngz huungh tinc stâyv quâyx yămz tauv banc stâyv banc đaic,

Mâyh nyăngz côkz lanyf six peengh stimz nyăngz lanyf.

9Mâyh numđ nyađ peengh stimz nyăngz jau yâuc hănđ okx nyăngz jau.

Wâyc nây, Zâu Tênb-Huungh, six Mâyh nyăngz Zâu Tênb-Huungh, zoz yâuh numđ nyađ njămh

phunz mâyh, ayx phunz Mâyh năngx lub quaix Mâyh wax đomc lah pyeoz toic.”

10Yâuc naih coong “Zâu lex, ah yac quef coonz, Mâyh njăpc nib nyăngz coonz tay,

nzof wax đomc guungh lauf Mâyh nyăngz puf ayx taih nyăngz cumh pâuz.

11Guungh nib six quaiz nzuf, six Zâu stâyv quâyx yămz,

yetx stong guungh nib six lôx ninyh cayx năngđ ah byenđ guyz nâyx,

12Mâyh six glonc stiz, cayx năngđ ah byenđ guyz lub nâyx,

guungh nib six coi wănc năngđ ah byenđ guyz,

six Mâyh yâuc stâyv quâyx yămz,

nzof Mâyh nyăngz nyăngv tauh six max hayh zomc.”

13Zâu Tênb-Huungh naih laiv zanyf coong ănz laiv tauh stinz munh, coong:

“Oix zuc stâyv yaz nyăngz byaoh phanx

ayx tuz tauv laiv zanyf Yaz ayx phunz Mâyh nyăngz yônz zaz yămz Mâyh nyăngz staux đi”?

14Wax đomc stinz munh max zâyf yetx stong six bokc dlic Zâu Tênb-Huungh nyăngz stinz, tuz paiđ taih nongc stăngc wax đomc tuz njâuv nyăngz munh haz?