Dao Ao Dai Literal Text
2 Ti-mô-tai 4
Yaz yămz Zâu Tênb-Huungh cloon Zâu Yê-su Jix-Tuz nyăngz cah đangc, senz stămđ munh săngh cloon munh tayc wax Tauh, yămz Nănh hinđ setb taih nyăngz jau cloon Nănh nyăngz côkz, zăpx mâyh coong: Oix zuc nzônh Zâu nyăngz gâyf; oix zuc bênc săngh nzônh, max cun naih congv max six max naih congv; oix zuc coong nzaox, mađ nzaox, quinb bux, nongc nzuf nyâuđ nênf nyangc bix zăpx nzaox. Wâyc tauv six naih ah nzêuh munh max oix mungv gongx nyăngz gâyf. Nzof, stiz six lov wax đomc stênx steengb taih nzaox hoođ stiz cănh nyăngz stimz nyâuđ, yâuc hoođ bah noomh, stiz yâuc zetx bah noomh max mungv senz gâyf, songđ ninyh mungv wax đomc max naih luungđ stuyh nyăngz jau. Six yămz manf dlayc mâyh oix zuc sting điub taih. Oix zuc tanyđ zâuđ. Oix zuc ayx nzônh Cuđ Jenx munh nyăngz cumh pâuz. Oix zuc ayx mâyh nyăngz cumh pâuz năngx clăkx clunh nzuf.
Năngx naih yaz six jinh đangh zuc taox nzac cayx năngđ congx nyăngz tax huungđ nâyx, yaz quaix stâyv nyăngz săngx huđ yâuc tauv stătx gôh. Yaz bopc tuz soongb gongx nyăngz zax; yămz tinyh tâu tiuv nyăngz jau yaz yâuc tiuv tuz toongz tauh; yâuc nzauf tăngđ yaz nyăngz zen stimz. Nâyx zanyf, peengh stimz nyăngz tany tuz bênc săngh njâuh phunz yaz, wax nomz tany six Zâu, senz peengh stimz nyăngz Stămđ Stoif wax Tauh, tauv wax noib six sađ sâuđ nyâyc phunz yaz, yâuc max zâyf cungb njâuh phunz yaz cuungv, six lauf năngx phunz cloon yetx stong numđ nyađ tauv Nănh taih nyăngz jau wax đomc munh.
Oix zuc coonx taih pongh yaz năngx căn, wâyc Đê-mat stăngz nây bamh canz nyăngz jau, songđ quanyf yaz, bix ninyh wa Tê-sa-lô-ni-ca dlanyh. Nzof Cê-lê-sên yâuc ninyh Ga-la-ti stâyz phangz, Ti-tatc zef ninyh Đa-ma-ti stâyz phangz nzof. Cungb năngx naih Lu-ca cloon yaz yămz nây cuungv. Mâyh bix ênz cloon Ma-cô lêpc mâyh taih, wâyc nănh hayh stăngc tuz yaz ayx cumh pâuz. Yaz paiđ Ti-ci-gatc ninyh wa Ê-phê-sô nzof. Tauv taih, mâyh bix nzâyz cloon yaz nyăngz guyz gomf, six yaz ănz Can-batc nyăngz pyau wax byenđ guyz yămz wa Tô-atc dlanyh, yâuc nzâyz cloon wax đomc stâub, nongc sen quaix six wax đomc đupx stâub glonc.
Ayx tongh stangc wax tauh A-lek-san-đê ayx hoiđ yaz đuungx nzongf. Âyz nănh ayx nyăngz dlayc Zâu six cănh clao phunz nănh, mâyh lauf oix zuc năngx cayb bôngh wax tauh munh, wâyc nănh nzeengz cloon pănh nzaox nyăngz gâyf nzongf.
Yămz yaz cănh coong pyenv tah yetx hâyđ wax zanyf, max naih mănv cloon yaz yămz tiny, tinyh đoih quanyf yaz nzuf. Cloo phunz wax cuyb stoif max njămh zuc stiz. Six Zâu stâuđ yămz yaz cah sinh pâu jab phunz yaz, phunz yaz hayh nzônh Cuđ Jenx tuz clunh nzuf, nzof yetx stong pitc stingx munh yâuc hayh tuz numđ. Yaz yâuc tuz njâuv gâyh đutb njanh zongh nyăngz nzetx. Zâu six cănh njâuv yaz gâyh đutb nzuf muif huungđ okx nyăngz jau, yâuc ênz yaz nzac Nănh nyăngz Tênb-toongh côkz, cloo phunz Nănh tuz gwăngz eeng tauv banc stâyv banc đaic, A-meen.
Oix zuc đeh tauv Bitc-sin-la cloon A-qui-la, cloon Ô-nê-si-phô-lat nyăngz pyau munh. Ê-lat-tat năngx yămz wa Cô-lin-tô dlanyh, six wâyc Tô-phi-mat săngh gumc yaz songđ phunz nănh yămz wa Mi-lê-tat dlanyh. Oix zuc coonx taih năngx saic guungh song. Yu-bu-lat, cloon Bu-đen, Li-nat, Ca-lau-đia cloon yetx stong yâuf pez tinyh đoih đeh tauv mâyh.
Joođ Zâu cloon mâyh nyăngz stimz nyâuđ yămz. Cloo Zâu nyăngz pôz cloon nyâuh yămz.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.