Dao Ao Dai Literal Text
2 Pi-tê 2
Hănđ nâyx, cayx năngđ yămz songx munh mungh tongx naih wax đomc za tâuc wac munh nâyx, yămz nyâuh cah njaf six lauf naih wax đomc nzaox za gâyf nyăngz stênx steengb, stiz nimx nzâyz wax đomc za gâyf taih nzaox phunz munh zuc mêtc, yâuc max nhlimc suc stiz taih Wax Tauh Zâu, năngđ nâyx stiz songđ cănh ayx phunz stiz lênh dlih zuc mêtc. Naih munh đuungx yâuc âyz stiz ayx wax đomc max săngh nyăngz jau, yâuc wâyc wax đomc munh senz gâyf bix zuc munh hib jetx. Wâyc naih nyâuđ mauh, stiz nongc puv maoh nyăngz wac taih jaf nyâuh, six tăng cah đangc tuz bênc săngh nongc tingc stiz nyăngz stoif lauh nzof gôh, nzof stiz zuc mêtc nyăngz jau yâuc max mâyc njoomh. Wâyc năngđ coong Zâu Tênb-Huungh max quanyf stoif phunz ayx longđ wax đomc stinz munh, bix nongc njab langb stayb ănz wa cotb nzămc, nongc zu tauv stămđ stoif wax noib; Nzof Nănh lauf max njâuh lôx noib wax nzêuh guungh đi, Nănh yâuc ayx womz yămx nây guungh đi mêtc nzuf wax đomc ayx huđ nyăngz munh, cungb njâuh Nô-ya, six nzaox peengh stimz nyăngz gâyf wax tauh, cloon nănh nyăngz pyau munh stong nzuf bix yetc lanh cuungv; Zâu Tênb-Huungh yâuc tingc mêtc Sô-đôm cloon Gô-mô-la dlanyh, pu ayx pênx laiđ taih, nongc ayx ah huungđ gao toon phunz max lêpc gongx Zâu wax đomc munh; nzof Zâu Tênb-Huungh yâuc njâuv Lootx six peengh stimz munh, phătc wax đomc munh huđ ayx pongz lauh nyăngz jau nănh senz numđ stauh nzongf, (wâyc nâyx lanh peengh stimz munh yămz nănh stiz mungh tongx muif noib phătc yâuc numđ stiz ayx wax đomc stoif nyăngz jau, songđ numđ munz tauv nănh nyăngz stimz nyâuđ); zâu yâuc pâyz njâuv lêpc gongx Zâu nyăngz munh gâyh đutb stâyv nyâuđ nyăngz jau, yâuc tingc ayx huđ nyăngz munh, clăngđ zu tauv stămđ stoif wax noib, nzof năngx nongc sen quaix six wax đomc mangc stam Zâu nyăngz tômx jab yâuc âyz cănh nyăngz stimz nyâuđ oix ayx huđ wax đomc. Nâyx đomc clangz stung nhlengc nyăngz munh, stiz max numđ cumh nzav yâuc coong đokc ănz naih gwăngz eeng wax đomc; max cun wax đomc stinz munh naih lanyf, naih jab năngx nzongf têx, lôx max nzađ yămz Zâu nyăngz cah đangc nongc wac đokc nzeengz cloon wax đomc munh. Nâyx đomc munh, six cayx năngđ stanyb hauđ max pâyz luungđ, tăng phăn steengb taih six cungb nongc zoz taih tayx ayx a, tinyh phanv stiz max manyh pec wax đomc stiz songđ coong đokc ănz, stiz six lauf zuc mêtc cayx năngđ wax đomc stanyb hauđ nâyx, tauv six âyz stiz ayx wax đomc huđ nyăngz jau bix clao phunz stiz, wâyc stiz nyađ pongz lauh nyăngz jau ayx cayx năngđ bah noib zax ninyh blanf nâyx; stiz six cah lôh yâuc naih wâyx, stiz yâuc numđ nyađ coong puv maoh yămz stiz cloon nyâuh songc hinh nyăngz săngx huđ; stiz nyăngz mâyc naih pongz lauh nyăngz jau pong nzuf yâuc cungb si ninyh ayx stoif nyăngz jau, yâuc hox wax đomc nyâuđ đah mâyc nyăngz munh ayx bah camx bah caiz, yâuc naih nyâuđ mauh tax huungđ quênx, stiz six zuc zaux nyăngz toonz sab. Wâyc stiz quanyf senz gâyf nyăngz jau, bix ninyh yăngh lêpc Ba-la-am nyăngz jau, Bê-ô nyăngz toonz, nănh six stăngz nyanh bix ayx huđ wax tauh. Six nănh yâuc zuc coong mađ wâyc nănh nyăngz stoif — ah tauh maf li max hayh coong wac yâuc coong munh nyăngz wac taih nongc cangđ wax tauh tâuc wac munh ayx oongx nyăngz jau. Nâyx đomc munh six cayx năngđ nof max naih womz, yâuc cayx năngđ bungc đay zuc nzaox gaib stâyb ninyh nâyx, nzof nzămc meengh măkc nyăngz tinc yâuc tuz njâuh phunz stiz. Wâyc stiz ayx nzetx lub coong bah camx caiz nyăngz wac, yâuc âyz cănh nyăngz stimz nyâuđ ninyh ayx pongz lauh nyăngz jau, stiz yâuc hox ah yac tuz gâyh đutb stiz ayx max săngh nyăngz jau wax đomc munh, stiz nyunc phunz munh tuz pungx goib, six stiz nyăngz stinb yâuc cănh ninyh ayx max săngh luungđ nyăngz nâuh. (Wâyc laiv lanh munh zuc laiv huungđ hingh nănh, nănh six ayx wax huungđ nyăngz nâuh.) Wâyc năngđ coong stiz tuz gâyh đutb nây bamh canz max săngh luungđ nyăngz jau, wâyc stiz tuz pâyz Zâu six pănh nyăngz Njâuv Zâu, senz Zâu Yê-su Jix-Tuz, bix zef năngx phunb đangz muf buc wax đomc timb têx, wax đomc munh tauv cah đangz phanx stiz six zef năngx huđ têx cah đangc. Stiz năngđ wănh max pâyz tauv peengh stimz nyăngz jau lôx năngx gongx têx, pâyz bix zef năngx winb đangz ănz tuz nzaox phunz stiz wax huungđ đăngb zeengh lanyf. Nâyx đomc tongb manyh nyăngz wac setb taih phunz stiz senz toix nzongf, coong: “Clô năngx nhlinc nănh ô setb nyăngz tax huungđ” nzof “tungf đaox tuz dlăngc zef ninyh lênx pamc.”
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.