Dao Ao Dai Literal Text
2 Pi-tê 1
Yaz, Si-môn Pi-tê, ayx Zâu Yê-su Jix-Tuz nyăngz pâuz yâuc ayx cumh pâuz munh, pungx phunz păngc Zâu Tênb-Huungh nyăngz peengh stimz cloon pănh nyăngz Njâuv Zâu, six Zâu Yê-su Jix-Tuz, Bix stipx nây saix nzongf nyăngz zen stimz, cayx năngđ buz nâyx wax đomc munh: Joođ Zâu nyăngz pôz cloon peengh oonz tuz pâu đuungx staox phunz nyâuh, yâuc hayh pâyz tuz Zâu Tênb-Huungh cloon pănh nyăngz Zâu Yê-su. Wâyc Zâu Tênb-Huungh nyăngz jab sađ phunz pănh tuz huungv ninyh tauv muif huungđ săngh mengc cloon lêpc gongx Zâu nyăngz jau, phunz pănh hayh pâyz tuz Nănh, senz nongc gwăngz eeng cloon nyâuđ dlênc bix sên pănh taih wax Tauh, yâuc tăng wax cuyb nyâuđ dlênc nyăngz gwăngz eeng, Nănh bix nyunc wax đomc saix nzongf yâuc lub nzongf nyăngz wac phunz pănh, phunz păngc wa nyâuh bix tuz gâyh đutb nây bamh canz zuc mêtc nyăngz jau senz oix ayx huđ wax đomc, bix tuz săngh cloon Zâu Tênb-Huungh songc stimz stingx nyăngz munh, wâyc nây, nyâuh oix zuc nzac jab ayx phunz nyâuh nyăngz zen stimz tuz pâu naih nyâuđ gongx; naih nyâuđ gongx zef pâu naih bănh sangz; naih bănh sangz zef pâu hayh cun tuz cănh; hayh cun tuz cănh zef pâu hayh tanyđ tuz; hayh tanyđ tuz zef pâu hayh zen gongx; hayh zen gongx zef pâu naih nyâuđ stăngz yâuf pez; naih nyâuđ stăngz yâuf pez zef pâu hayh hâuđ lênh munh. Wâyc năngđ coong nyâuh naih nâyx đomc yămz pong nzuf nyâuh nyăngz nyâuđ, nyâuh six max zâyf cungb yămz lâyc đoonh bix max ayx tuz setb laiv luungđ, yămz nyâuh pâyz pănh nyăngz Zâu Yê-su Jix-Tuz nyăngz jau. Wâyc laiv lanh max naih nâyx đomc dlayc, wax lanh six mâyc buđ nyăngz munh, mangc max phătc, yâuc nyâuđ cob nănh cah đangc tuz đaox dlăngc stoif ayx năngđ laix. Wâyc nây, yâuf pez lex, oix zuc nzac jab joomz nyâuđ, yâuc cayb stâuđ năngx tăngđ yămz Zâu êu nyâuh taih nyăngz jau, nyâuh ayx âyz nâyx đomc jau, nyâuh six max naih laiv zanyf zuc tuih. Păngc nây, bix tuz japc nzac Zâu stâyv quâyx yămz nyăngz côkz, senz pănh nyăngz njâuv Zâu, six Zâu Yê-su Jix-Tuz, yâuc tuz goib âyx sađ phunz nyâuh.
Wâyc nây, yaz songđ coong nâyx đomc jau bux nyâuh max setc tinyh, max cun nyâuđ hănđ pâyz yâuc jinh đangh stâuđ tăngđ yămz nâyx huungđ senz gâyf. Six tinyh phanv yaz năngx yămz nâyx njiuh tamf nyăngz săngx huđ, yaz six numđ sămv zuc coong bux ayx phunz nyâuh sting điub, wâyc pâyz tuz coong yaz cayx zuc gâyh nâyx nomz njiuh tamf gôh, âyz năngđ pănh nyăngz Zâu, six Zâu Yê-su Jix-Tuz bux phunz yaz pâyz nâyx. Six, yaz oix nzac jab ayx phunz tauv yaz ninyh blătc, nyâuh bix lauf muif dlih săngx tauv nâyx đomc wac. Wâyc buz six max zâyf coong cungb zongđ nyâyh bix nzâyz taih lănv phunz nyâuh pâyz tauv tômx jab cloon pănh nyăngz Zâu Yê-su Jix-Tuz hinđ setb taih nyăngz jau, nây six buz senz tuz mâyc mangc phătc Nănh naih nyăngz tômx lanyf. Wâyc Nănh tuz zanyb saix yâuc tuz gwăngz eeng tăng Zâu Tênb-Huungh taih, six senz Tênb-toongh Pha, wâyc naih wac tăng Năngx Lub Quaix yâuc naih Tômx Gwăngz Eeng Wax Tauh coong ănz Nănh, coong: “Nây six Yaz stăngz nyăngz Toonz, Yaz senz numđ nyađ Nănh nzongf.” Buz cloon Nănh yămz wa đăngb zeengh zoongz wax zanyf, buz lauf tuz numđ nâyx đomc stingb tăng wa guungh coong setb taih. Buz yâuc zen coong wax đomc tâuc wac munh nyăngz wac six senz nyăngz, nyâuh senz hoopđ zuc năngx cay zah nâyx đomc jau, cayx năngđ ah zây toongz siux wa nzămc nyăngz tinc ayx tuz tauv bah noib zax taih tauv, nzof stingz tau yâuc setb taih yămz nyâuh nyăngz nyâuđ, tah yetx six oix zuc pâyz coong, max naih laiv lanh munh âyz cănh nyăngz nyâuđ, bix hayh pob manyf tuz yămz wa Canyx Stâub wax đomc tâuc taih nyăngz wac. Wâyc max naih laiv zâux tâuc taih nyăngz wac, bix cănh tăng laiv lanh munh nyăngz zux ix coong setb taih, six wâyc tuz Zâu Singx-Lingh yenv, munh bix coong Zâu Tênb-Huungh nyăngz wac setb taih.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.