1 Pi-tê 2

1Wâyc nây, nyâuh quanyf tuz nzuf muif huungđ okx nyăngz jau, cloon muif huungđ puv maoh nyăngz jau cloon pâyc zac nyâuđ yootz nyăngz jau, cloon hănđ munh nyăngz jau cloon muif huungđ tanh munh nyăngz jau, 2songđ oix zuc ngoc mengc hoonh nyăngz đăngb zeengh nu, cayx năngđ munh sây ah yac steengb stâyv nâyx, phunz nyâuh păngc nây bix hayh lub taih tuz njâuv, 3năngđ coong nyâuh tuz zangđ mungv yâuc pâyz coong Zâu six gongx, 4oix zuc taih yămz stătx Nănh, senz săngh mengc nyăngz njăuz pyây, zuc munh nzêmh, six yâuc tuz Zâu Tênb-Huungh sên taih nongc ayx saix, 5nzof nyâuh yâuc năngđ săngh mengc nyăngz njăuz pyây nâyx, tuz zâyv săngh Singx-Lingh nyăngz pyau, yâuc săngh đăngb zeengh nyăngz stayb munh, nongc stungx mengc hoonh nyăngz stanyb lanyh păngc yămz Zâu Yê-su Jix-Tuz, bix tuz Zâu Tênb-Huungh numđ nyađ. 6Wâyc, yămz Canyx Stâub naih ja coong:

“Mangc bex, Yaz oonz ah nomz pyau joongz njăuz ănz wa Si-ôn,

tuz sên taih, saix nzongf.

Nzof laiv lanh zen caođ Nănh six max zuc nyayz.”

7Wâyc nây, yămz nyâuh zen nyăngz munh, six senz saix nzongf. Six yămz wax đomc max zen nyăngz munh:

“Ayx pyau stangc munh nzêmh wax nomz njăuz pyây,

yâuc săngh ănz wa pyau joongz nongc sen quaix wax nomz njăuz,”

8yâuc săngh

“Zuc tib nyăngz njăuz, cloon phunz munh zuc glinyf nyăngz njăuz pyây lub.”

Stiz zuc glinyf six wâyc max âyz Zâu nyăngz wac ayx, six nâyx đomc yâuc tuz bênc săngh phunz stiz nzof. 9Six nyâuh tuz sên taih nyăngz munh, săngh huungh pyau nyăngz stayb munh, săngh đăngb zeengh nyăngz pec stingx, yâuc săngh Zâu Tênb-Huungh nyăngz munh, nongc phunz nyâuh lănv nzônh tauv Nănh êu nyâuh tăng nzămc setb taih yămz Nănh njingc nzongf nyăngz gwăngz wax đomc jau, 10nyâuh cah đangc “six max zâyf songc ah stingx”, nâyx zanyf bix tuz săngh “Zâu Tênb-Huungh nyăngz pec stingx”; nyâuh cah đangc “max zeengx tuz Zâu Tênb-Huungh hâuđ lênh”, six nâyx zanyf “yâuc tuz hâuđ lênh”.

11Stăngz nyăngz yâuf pez lex, nyâuh six cayx năngđ cay zeb munh nâyx yâuc săngh quaix jêmh nyăngz munh, yaz songđ quinb nyâuh, oix zuc pyenv goib stinb a oix nyăngz jau, senz nzeengz cloon nyâuh nyăngz mengc hoonh wax đomc, 12nyâuh yămz max zen munh nyăngz mungh tongx oix zuc ayx gongx dlayc, max cun, stiz hănđ coong nyâuh six munh huđ munh, six stiz yâuc phătc nyâuh ayx gongx nyăngz dlayc, năngđ nây tauv Zâu Tênb-Huungh taih tauv wax noib stiz songđ tanv Nănh.

13Wâyc Zâu, oix zuc mungv bamh munh nyăngz yetx stong lanyf, senz ayx huungh naih lanyf naih jab wax đomc munh, 14cloon wax đomc ayx côx lub nyăngz munh, six tuz huungh paiđ ninyh nongc tingc ayx huđ nyăngz munh, yâuc tanv ayx gongx nyăngz munh wax đomc. 15Wâyc Zâu Tênb-Huungh oix nyăngz zux ix: six nyâuh ayx gongx nyăngz dlayc, nongc ayx phunz oongx max pâyz luungđ wax đomc munh zuc stinyb njâuh, 16oix zuc yămz ayx cayx năngđ pungx goib nyăngz munh nâyx, yâuc năngx gâyf nongc nyâuh tuz pungx goib nyăngz jau taih nongc ayx sangx buyx tăng okx nyăngz dlayc, six oix zuc ayx cayx năngđ Zâu Tênb-Huungh nyăngz pâuz nâyx. 17Oix zuc zanyb muif lanh munh. Oix zuc stăngz cănh nyăngz yâuf pez. Oix zuc cumh nzav Zâu Tênb-Huungh. Oix zuc zanyb huungh stix.

18Nyâuh ayx pâuz nyăngz munh lex, oix zuc nongc nzuf nyâuđ mungv yâuc zanyb nyâuh nyăngz zâu, max zâyf cungb mungv nyâuđ gongx nyâuđ dlênc wax đomc zâu cuungv, hănđ njinh wax đomc zâu đokc lauf oix zuc mungv. 19Năngđ coong laiv lanh wâyc ayx âyz Zâu Tênb-Huungh nyăngz zux ix, bix zuc tanyđ zâuđ, senz tuz naih oonz looc gôh. 20Năngđ coong nyâuh ayx longđ stoif bix zuc bopc yâuc zuc tanyđ bix naih luungđ săngh tanv heh? Six năngđ coong nyâuh ayx gongx bix zuc tanyđ zâuđ, six tuz naih oonz looc yămz Zâu Tênb-Huungh nyăngz cah đangc. 21Wâyc nyâuh six tuz êu taih nongc ayx nâyx, wâyc Zâu Jix-Tuz lauf zuc tanyđ zâuđ tayv phunz nyâuh, nongc ayx ah huungđ gao phunz nyâuh âyz Nănh,

22“Nănh max ayx longđ stoif,

nzof Nănh nyăngz nzetx yâuc max phătc naih laiv zâux puv maoh nyăngz wac”;

23Nănh zuc munh mađ, Nănh yâuc max mađ clao; zuc tanyđ zâuđ, Nănh yâuc max coong huukb, six Nănh cănh jaoz Nănh phunz peengh stimz nyăngz stămđ wax Tauh; 24Nănh đamz pănh nyăngz stoif yămz Nănh nyăngz stinb ănz wa săpc đăngc zax, phunz pănh tayc yămz stoif nyăngz jau, bix tuz săngh yămz peengh stimz nyăngz jau, yâuc păngc Nănh zuc bopc wax đomc đonx nyâuh bix tuz zany gongx. 25Wâyc nyâuh six cayx năngđ cay pax jiz yuungh ninyh gaih jêmh, bix nâyx zanyf nyâuh yâuc tuz phunb đangz lauf pongh jămđ pax jiz yuungh nyăngz Zâu, six senz jămđ nyâuh nyăngz mengc hoonh wax Tauh.