Skip to content
BibleKenya

Dao Ao Dai Literal Text

1 Pi-tê 1

Yaz, Pi-tê, ayx Zâu Yê-su Jix-Tuz nyăngz cumh pâuz munh, pungx phunz tuz sên taih nyăngz munh, six yămz đanv muif đoif wax đomc pec stingx, yămz Boon-tat stâyz phangz, Ga-la-ti, Cap-ba-đô-si, Ê-si cloon Bi-ti-ni stâyz phangz, âyz Zâu Tênb-Huungh pâyz quaix đangc nyăngz jau, six Tênb-toongh Pha, nongc lanyc đăngb zeengh yămz Singx-Lingh phunz hayh mungv wac cloon Zâu Yê-su Jix-Tuz njâuc nyăngz samđ. Cloo Zâu nyăngz pôz cloon peengh oonz tuz pâu đuungx staox phunz nyâuh.

Tanv Zâu Tênb-Huungh, senz pănh nyăngz Zâu Yê-su Jix-Tuz nyăngz Pha, âyz Nănh hâuđ lênh munh nyăngz nyâuđ songđ ayx phunz pănh tuz steengb laif, păngc yămz Zâu Yê-su Jix-Tuz tăng tayc săngh taih bix tuz naih njih mungc săngh, senz max hayh yootz, max naih wâyx, yâuc max hayh jac, nyăngz phănc, tuz njâuh ănz wa guungh phunz nyâuh, six njâuh phunz păngc zen stimz, bix tuz Zâu Tênb-Huungh nyăngz tômx jab leđ nongc phunz tuz njâuv wax đomc munh, senz bênc săngh nongc tuz hinđ setb taih yămz stêtb mâyv noib wax đomc. Wâyc nây, nyâuh senz numđ nyađ nzongf, max cun nâyx zanyf zuc pongh stauh tix cay max lauh, yămz đuungx huungđ stâyv nyâuđ nyăngz jau nongc stâyv nyâuh nyăngz zen stimz — senz năngx saix têx sămz, stong zuc sinx quaix tâuf — six nongc phunz tuz tanv, tuz zanyb, yâuc tuz gwăngz eeng, tauv Zâu Yê-su Jix-Tuz hinđ setb taih, Hănđ max zeengx phătc quaix Nănh nyâuh yâuc stăngz Nănh, nzof nâyx zanyf nyâuh hănđ max phătc Nănh yâuc zen Nănh, nyâuh songđ senz oonz looc yâuc numđ nyađ tuz max hayh coong ayx laix, yâuc tuz naih gwăngz eeng pong nzuf, nyâuh nyăngz zen stimz tuz stipx nyăngz phănc, six nyâuh nyăngz mengc hoonh tuz njâuv. Nâyx huungđ njâuv pôz, wax đomc tâuc wac munh songđ năngx cayb zah lov yâuc tim mangc, stiz songđ tâuc wac coong tauv nâyx huungđ pôz taih phunz nyâuh, songđ zah mangc jađ laiv zanyf max six laiv lanh munh, âyz Zâu Jix-Tuz nyăngz Singx-Lingh cănh yămz stiz cah njaf hinđ manyf phunz stiz pâyz tuz quaix đangc, coong tauv Zâu Jix-Tuz tanyđ zâuđ nyăngz jau cloon blătc quaix đangz tuz nyăngz gwăngz eeng. Wax đomc tâuc wac munh yâuc tuz hinđ phunz pâyz coong, stiz ayx nyăngz cumh pâuz six max zâyf wâyc phunz stiz, six wâyc phunz nyâuh, senz nâyx zanyf tuz lănv nzônh phunz nyâuh nyăngz Cuđ Jenx, păngc yămz nzônh Cuđ Jenx phunz nyâuh wax đomc munh, six păngc tăng guungh paiđ taih nyăngz Zâu Singx-Lingh wax đomc — njinh wax đomc stinz munh lauf oix tuz phătc tauv nâyx đomc jau.

Wâyc nây, oix zuc bênc săngh nyâuh nyăngz stimz nyâuđ cayx năngđ stayb quav langb nâyx, sting điub taih, oix zuc naih clăkx clunh nyăngz njih mungc, zu tauv Zâu Yê-su Jix-Tuz hinđ setb taih bix sađ phunz nyâuh nyăngz pôz. Cayx năngđ sây hayh mungc wac nâyx, năngx gâyf ayx âyz nyâuh nyăngz stimz nyâuđ, senz cah đangc ayx phunz nyâuh nyăngz stimz yuc wax đomc, êu nyâuh taih wax Tauh six đăngb zeengh, wâyc nây, yămz nyâuh ayx nyăngz muif huungđ, lauf oix zuc đăngb zeengh. Wâyc naih wac ja coong: “Nyâuh oix zuc đăngb zeengh wâyc Yaz six đăngb zeengh.” Năngđ coong nyâuh êu âyz muif lanh munh ayx nyăngz cumh pâuz bix stămđ, yâuc max pyac laiv lanh wax Tauh six “Pha”, năngđ nây nyâuh yămz stâyv sangc ayx cayx năngđ zeb munh nyăngz săngx huđ, six oix zuc naih nyâuđ cumh nzav Nănh, wâyc pâyz tuz coong max zâyf păngc yămz wax đomc hayh huđ yootz nyăngz tax huungđ năngđ sămz max six nyanh, nyâuh bix tuz suc tăng nyâuh nyăngz claof jex stâyv stipx stâyv max săngh nyăngz jau setb taih, six păngc yămz Zâu Jix-Tuz saix nyăngz samđ, cayx năngđ pax jiz yuungh max huđ hanyh yâuc max naih wâyx, wâyc tuz tingc săngh tăng max zeengx zuyx guungh zuyx nib wax zanyf, bix tuz hinđ setb taih yămz nây stêtb mâyv nyăngz noib wâyc nyâuh, six păngc yămz Zâu Yê-su bix zen caođ Zâu Tênb-Huungh wax đomc munh, senz ayx phunz Zâu Yê-su tăng tayc săngh taih yâuc sađ gwăngz eeng phunz Nănh wax Tauh, phunz nyâuh nyăngz njih mungc cloon zen stimz six păngc yămz Zâu Tênb-Huungh. Nyâuh mungv âyz senz gâyf bix tuz stav đăngb nyâuh nyăngz nyâuđ, nzăngđ tuz naih senz nyăngz nyâuđ stăngz yâuf pez, wâyc nây nyâuh oix zuc nongc nzuf nyâuđ lanh stăngz lanh, wâyc nyâuh tuz steengb laif, six max zâyf tăng hayh yootz nyăngz phăn, six tăng max hayh yootz nyăngz phăn, păngc stâyv quâyx săngh nyăngz gâyf cloon stâyv quâyx yămz nyăngz Zâu Tênb-Huungh. Wâyc zuc:

“Muif huungđ stinb a six cayx năngđ mađ nâyx,

nzof nănh nyăngz muif huungđ gwăngz eeng six cayx năngđ mađ nyăngz phăngh.

Mađ caođ, phăngh yâuc blâyc,

six Zâu nyăngz gâyf yâuc stâyv quâyx yămz.”

Nây gâyf six tuz nzônh phunz nyâuh nyăngz Cuđ Jenx.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.