Skip to content
BibleKenya

Dao Ao Dai Literal Text

1 Cô-lin-tô 15:58

Verse 58 is marked below, with the whole chapter around it. Read from the start

Yâuf pez lex yaz coong phunz nyâuh pâyz tauv yaz nzônh phunz nyâuh nyăngz Cuđ Jenx, six nyâuh jinh đangh stipx, yâuc stâuđ tăngđ yămz nyăngz Cuđ Jenx, yâuc păngc nây cuđ jenx nyâuh bix tuz njâuv, tinyh phanv nyâuh nzac jab nzauf yaz nzaox phunz nyâuh nyăngz gâyf năngx sen, năngđ max zâyf nâyx, nyâuh zen six max setb laiv huungđ. Nzof yămz yaz nzaox phunz nyâuh nyăngz gâyf, six lauf yaz stipx nyăngz gâyf — nây six Zâu Jix-Tuz tayc wâyc pănh nyăngz stoif âyz năngđ Canyx Stâub coong nyăngz wac, Nănh zuc plopx tauv tah stamz noib yâuc tuz săngh taih cayx năngđ Canyx Stâub coong nâyx, Nănh hinđ setb taih phunz Sê-pha, zef hinđ phunz wa săpc nyâyc lanh cumh pâuz munh. Blătc quaix đangz, Nănh yâuc toongx ah hâyđ hinđ phunz ngâuf pez đuungx lanh munh phătc, wax đomc munh naih đuungx lanh nâyx zanyf lauf năngx jinh săngh, six naih ah phanx mâyc njoomh blătc nzof. Blătc wa, Nănh zef hinđ phunz Ya-coopc, zef hinđ phunz wax đomc muif lanh cumh pâuz munh. Tăng wa, blătc wax đomc munh, tauv cah đangz wax hâyđ nănh zef hinđ phunz yaz phătc, ayx cayx năngđ cay yaz six steengb stâyv đangz wax tauh sây đany. Wâyc yămz wax đomc cumh pâuz munh yaz six năngx jenz quaix, yaz yâuc max payh tuz hipđ ayx cumh pâuz munh, wâyc yaz ayx huđ ănz Zâu Tênb-Huungh nyăngz jiux pangx. Six păngc Zâu Tênb-Huungh nyăngz pôz yaz bix tuz năngđ nâyx zanyf, nzof Nănh nyăngz pôz yămz yaz six max zâyf coong max setb laiv huungđ. Plănc taih, yaz yâuc ayx cumh pâuz năngx zâuđ têx wax đomc muif lanh munh, six max zâyf cănh yaz, nây six Zâu Tênb-Huungh nyăngz pôz cloon yaz yămz. Wâyc nây, hănđ six yaz max six wax đomc munh, buz lauf nzaox năngđ nâyx, nzof nyâuh lauf zen năngđ nâyx.

Ha, năngđ coong Zâu Jix-Tuz tuz nzônh coong, Nănh tuz ayx tăng tayc săngh taih, năngđ nâyx săngh laix nyâuh bix naih ah phanx yâuc coong, munh tayc max hayh săngh taih, nâyx heh? Năngđ coong munh tayc max hayh săngh taih, six njinh cloon Zâu Jix-Tuz six lauf max tuz săngh taih; nzof năngđ coong Zâu Jix-Tuz max tuz săngh taih, têx buz nzaox nyăngz jau six max setb laiv huungđ, nzof nyâuh zen nyăngz jau lauf max setb laiv huungđ. Nzof buz yâuc cayx năngđ cay puv maoh ayx zanyx manyf phunz Zâu Tênb-Huungh nâyx, wâyc buz ayx zanyx manyf coong Zâu Tênb-Huungh ayx phunz Zâu Jix-Tuz săngh taih, wâyc nây, năngđ coong munh tayc bix max hayh săngh taih, Zâu Tênb-Huungh lauf max ayx phunz Zâu Jix-Tuz săngh taih. Wâyc zuc năngđ coong munh tayc max tuz săngh taih, six njinh cloon Zâu Jix-Tuz lauf max tuz săngh taih, nzof năngđ coong Zâu Jix-Tuz max tuz săngh taih, têx nyâuh nyăngz zen stimz six max setb laiv huungđ; nyâuh six lauf năngx jinh zuc yămz nyâuh nyăngz stoif cah đi. Nzof mâyc njoomh yămz Zâu Jix-Tuz wax đomc munh six lauf zuc mêtc. Năngđ coong pănh nyăngz njih mungc yămz Zâu Jix-Tuz bix cungb yămz nây yangh stâyv cuungv, têx pănh six săngh năngx stanc quaix yămz nây bamh canz nyăngz munh tauv laiv wax đomc.

Six nâyx zanyf, Zâu Jix-Tuz tuz ayx tăng tayc săngh taih, ayx zetx toongv săngh taih nyăngz munh, yămz wax đomc mâyc njoomh nyăngz munh tauv laiv. Wâyc zuc tăng ah lanh munh bix naih zuc tayc, six lauf tăng ah lanh munh bix tuz tăng tayc săngh taih. Wâyc tăng A-đam, muif lanh munh bix zuc tayc ayx năngđ laix, six lauf năngđ wa nâyx, yămz Zâu Jix-Tuz muif lanh munh six tuz săngh taih. Six mănv yâuc cănh tuz âyz mănv nyăngz phănc: Zâu Jix-Tuz six ayx zetx toongv; tauv Zâu Jix-Tuz taih nyăngz săngx huđ, lêpc Nănh wax đomc munh zef tuz săngh taih. Tăng wa, tauv stêtb mâyv noib, Nănh six jaoz côkz phunz Zâu Tênb-Huungh six Pha, yămz Nănh mêtc nzuf ayx huungh cun cloon naih lanyf naih jab tauv laiv wax đomc nyăngz săngx huđ. Wâyc Nănh six ayx huungh cun tuz tauv laiv zanyf Nănh zoz nzuf wax đomc yônz zaz ănz Nănh nyăngz staux đi. Tauv stêtb mâyv yônz zaz zuc mêtc nyăngz jau six zuc tayc. Wâyc “Zâu Tênb-Huungh zoz muif huungđ ănz Nănh nyăngz staux đi.” Six coong tauv coong “Nănh zoz muif huungđ,” six max coong tauv ayx phunz muif huungđ buc Nănh wax Tauh. Tauv wax zanyf, muif huungđ six zuc buc Nănh nzuf, tauv wa njinh Toonz lauf zuz buc ayx phunz muif huungđ buc Nănh wax Tauh, phunz Zâu Tênb-Huungh six ayx muif huungđ yămz manf dlayc.

Năngđ max zâyf nâyx, bix wax đomc ayx quaix-gâyf tayv phunz munh tayc wax đomc six ayx laix heh? Năngđ coong munh tayc senz max hayh săngh taih, ha săngh laix stiz bix wâyc wax đomc munh ayx quaix-gâyf heh? Nzof săngh laix buz bix laiv zanyf lauf zuc tanyđ munh ayx huđ ănz? Yâuf pez lex, yaz muif noib tayc, yaz numđ nyađ nyâuh, wâyc yaz tuz nyâuh yămz pănh nyăngz Zâu, six Zâu Yê-su Jix-Tuz. Năngđ coong âyz bamh munh nyăngz zux ix, yaz lôx cloon yămz wa Ê-phê-sô wax đomc jămx staov yez tinyh bopc nzof gôh, nâyx yaz bix tuz luungđ gongx heh? Năngđ coong munh tayc max tuz săngh taih, six “Phanv nhlinc phanv hopb, wâyc săngh đoomz pănh six tayc.” Nyâuh năngx gâyf bây zuc jaf: “Lah pyeoz toic huđ six ayx phunz stimz gongx nyăngz gao huđ ninyh.” Oix zuc sting điub taih! Yâuf năngx gâyf njinh luh longđ stoif gôh. Wâyc naih ah phanx munh senz max pâyz tauv Zâu Tênb-Huungh ax tiny — Yaz coong nâyx six nongc ayx phunz nyâuh numđ nyayz.

Six, naih munh yâuc coong: “Munh tayc bix săngh taih ayx laix heh, laiv năngx hayh naih stinb nongc săngh taih nzof heh?” Munh oongx munh lex! Mâyh songx nyăngz tax huungđ, năngđ coong max yootz six max hayh săngh tuz. Nzof mâyh songx nyăngz tax huungđ, six max zâyf lub taih nyăngz miuh, mâyh six cungb songx nhlimb cuungv — cayx năngđ blauh witx max six pitc huungđ nhlimb. Six Zâu Tênb-Huungh cănh âyz Nănh nyăngz zux ix phunz naih miuh, ah huungđ nhlimb cănh naih ah huungđ miuh. Max zâyf muif huungđ stinb a six songc ah huungđ a. Bamh munh nyăngz stinb a six cănh njingc, stanyb hauđ nyăngz stinb a lauf cănh njingc, nooc nyăngz stinb a yâuc cănh njingc nzof byauf nyăngz stinb a lauf cănh njingc. Lauf naih đuungx huungđ hanyh jangx yămz wa cah zâyc guungh nzof cah đi nib lauf naih đuungx huungđ hanyh jangx. Six, guungh nyăngz gwăngz eeng cănh njingc, nzof nib nyăngz gwăngz eeng lauf cănh njingc. Bah noib nyăngz gwăngz eeng six cănh njingc, lav nyăngz gwăngz eeng lauf cănh njingc, nzof wax đomc stingz tau nyăngz gwăngz eeng lauf max tinyh năngđ. Wâyc nâyx nomz stingz tau cloon wax nomz stingz tau nyăngz gwăngz eeng lauf max tinyh năngđ. Munh tayc săngh taih six lauf năngđ nâyx. Zuc plopx nyăngz stinb six hayh yootz, săngh taih nyăngz stinb six max hayh yootz; zuc plopx nyăngz stinb six stanc; tuz săngh taih nyăngz stinb six gwăngz eeng; zuc plopx nyăngz stinb six đoonh, tuz săngh taih nyăngz stinb six njoongh; zuc plopx nyăngz stinb six naih samđ, săngh taih nyăngz stinb six pênx stinz, năngđ coong naih nâyx nomz samđ nyăngz stinb, six lauf naih pênx stinz nyăngz stinb. Năngđ nây lauf naih ja coong: “Tah yetx tauh A-đam six pênx săngh nyăngz mengc hoonh.” Tah nyâyc tauh A-đam six stinz sađ phunz naih săngh mengc. Six max zâyf pênx stinz nyăngz stinb taih đangc, six naih samđ nyăngz stinb taih đangc, tăng wa nzăngđ tauv pênx stinz nyăngz stinb taih. Tah yetx tauh munh six tăng nib setb taih, yâuc săngh nib nyăngz munh. Tah nyâyc tauh munh six tăng guungh taih. Săngh nib nyăngz wax tauh munh ayx năngđ laix, six wax đomc săngh nib nyăngz munh tauv laiv lauf năngđ wa nâyx; nzof săngh wa guungh nyăngz wax Tauh ayx năngđ laix, six wax đomc săngh wa guungh nyăngz munh tauv laiv lauf năngđ wa nâyx. Pănh nzâyz săngh nây nib nyăngz wax tauh nyăngz hanyh jangx ayx năngđ laix, pănh six lauf nzâyz săngh wa guungh nyăngz wax Tauh nyăngz hanyh jangx năngđ wa nâyx.

Yâuf pez lex, yaz oix coong manyf nâyx đomc jau coong, naih a naih samđ six max hayh stipx tuz Zâu Tênb-Huungh nyăngz côkz. Hayh huđ yootz nyăngz phănc six max hayh stipx tuz mayv huđ yootz nyăngz phănc. Mungv bex, yaz phunz nyâuh pâyz tuz ah huungđ max zeengx plongx yangh nyăngz jau: Pănh six max zâyf muif lanh mâyc njoomh nzuf, pănh six muif lanh tuz pyênv wav, toongx ah zanyf, cayx năngđ ah nzipx mâyc nâyx, yămz blungh blex stingb buib wax zanyf. Wâyc blungh blex stingb six buib nhlangđ, wax đomc tayc nyăngz munh six tuz săngh taih yămz max hayh yootz nyăngz stinz, nzof pănh tinyh đoih six tuz pyênv wav. Wâyc nâyx nomz hayh yootz nyăngz stinb six tuz wav pênx max hayh yootz nyăngz stinb, nzof nâyx nomz hayh tayc nyăngz stinb yâuc wav pênx max hayh tayc nyăngz stinb. Zu tauv laiv zanyf, nâyx nomz hayh yootz nyăngz stinb tuz wav pênx max hayh yootz nyăngz stinb, nzof nâyx nomz hayh tayc nyăngz stinb tuz wav pênx max hayh tayc nyăngz stinb wax zanyf, tuz ja taih nyăngz wac songđ tuz setb taih nzuf, coong:

“Tayc nyăngz jab zuc mêtc nzuf, tuz hingh nyăngz jab songđ cun sen.”

“Tayc nyăngz jab lex, mâyh tuz hingh yămz laiv heh?

Tayc nyăngz jab lex, mâyh tôc tayc nyăngz njaiz yămz laiv heh?”

Tôc tayc nyăngz njaiz six stoif, nzof stoif nyăngz jab six gâyf njanh. Six sâuf hâuđ Zâu Tênb-Huungh, Nănh phunz pănh tuz hingh quaix yămz pănh nyăngz Zâu, six Zâu Yê-su Jix-Tuz! Yaz stăngz nzongf nyăngz yâuf pez lex, wâyc nây, oix zuc zen năngx tăngđ, năngx gâyf plungh plănb, oix zuc muif dlih nzac jab ayx Zâu nyăngz cumh pâuz, wâyc pâyz tuz coong nyâuh wâyc Zâu ayx nyăngz cumh pâuz zâuđ, six max zâyf coong max setb laiv huungđ.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.