Skip to content
BibleKenya

Wale Magar Kham

युहन्ना 8:32

Verse 32 is marked below, with the whole chapter around it. Read from the start

ब्यभिचार ओडोज़्याकं क्योसिव

स्यान्टै मीरं याज़ीःम-याज़ीःमडे यानाव। होकाम येसु जैतुन डान्डाटं ओनाव। फरि छकाल्ने येसु प्रार्ठना डोने ज़ीःमलं वोल्डे ओराव, होकाम स्यान्टै मीरं येसु लेवकं याराव, होकाम येसुये चुङडे नोरंलाई ओपोयोरं। न्याम पैनेरं सोनो फरिसीराई ब्यभिचार ओडोज़्याकं क्योसिव टोबो मेमालाई यारोयो, होकाम नोलाई मीराई याखार्ल यासच्यानो। नोराई येसुलाई हैयाडोव, “गुरबा आव मेमा ब्यभिचार ओडोज़्याकं ओक्योसिव। न्यामटं ऐटावरंलाई लुङये झोम्ने आग्या मोसाये गेलाई याडेनैसिव। नङ आवलो ओबारेलं कै नवार?”1 नोराई येसुलाई जान्चीने सोनो येसुलाई आरोप लैसिडु सै वार्डे ऐ यावारो। होकाम येसुये घोम लेडे नामलं उकुइसैये ओसोरो। नोराई येसुलाई पजोयोका-पजोयो याझोयो, होकाम येसु ठ लेडे च्याङसिडे नोरंलाई हैओडोवरं, “जे भरिलाम जोये खर्कज़ पाप ओडोव माले, होये आव मेमालाई ङाडे लुङये ओझोमोकं।” होकाम येसुये फरि घोम लेडे उकुइसैये नामलं ओसोरो। नोराई आवरोः याठोयो, होकाम सेःरङाम टोबोनि टोबो आलिज़ा समं स्यान्टै यानाव, होकाम येसुनि नो मेमासं नेबाठङ राःडे याख्यानोयोरं, नो मेमा येसुलो ओङाःकं च्याङसिडेज़ ओलेव। येसुये नो मेमालाई ठ लेडे रःङडे हैओडोव, “ए मेमा, नोरं कान्डे यानाव? कडा काङ्कायेज़ नङलाई सजै मायानरंये?”

नो मेमाये हैओवारो, “प्रभु, काङ्कायेज़ मायाङरंये।” येसुये हैओडोव, “ङा पनि नङलाई सजै ङामयान। गनानके फरि पाप टाडो।”]2

येसु सङसारला ज्योती

येसुये फरि नोरंलाई हैओडोवरं, “ङा प्रिठीबीला ज्योती ची। ङाछिन्ट राने अन्ड्यारोलं बाने माले, बुरु नोये जीबनला ज्योती डैनेले।”

होकाम फरिसीराई येसुलाई हैयाडोव, “नङ नबारेलं नङज़ गोहाइ नयोज़्या। नगोहाइ सत्य माठहरि।”

येसुये जबाफ ओयोवरं, “ङा ङाबारेलं गोहाइ ङायोनि, पनि ङागोहाइ सत्यले। ङा ठा ङासंन, ङा काङाम ङाराव, होसोनो कान्डे ङानारिज़्या। बुरु जे जेमसन, ङा काङाम ङाराव, होसोनो कान्डे ङानाज़्या। जे मी रःङडे निया जेडाये। ङा काङ्कालो ओनिया ङामडोये। ङा निया ङाडोखे भने पनि, ङा निया सत्य ठहरिये। कडालेकं निया डाने ङा ङाबाठङ ङाम्ले, बुरु ङा सोनो ङालाई परिःङने ङाबाबु ङासंले जे जेन्यामटं पनि नेबऱ्याङ मीलो ओगोहाइ सत्य ठहरिये वार्डे सर्सिवले। ङाबारेलं ङाज़ गोहाइ ङायोये, होसोनो ङालाई परिःङने ङाबाबुये ङाबारेलं गोहाइ योवये।”

नोराई येसुलाई हैयाडोव, “नबाबु काङ उलिज़्याव?”

येसुये जबाफ ओयोवरं, “जे न ङालाई जेसरेःसङ न ङाबाबुलाई। जे ङालाई जेसरेसङखिन्के ङाबाबुलाई पनि जेसरेखेहो।” येसुये आव रोः प्रार्ठना डोने ज़ीःमलं ओपैरंकं भेटी चरैने जालो ओछ्योकं हैओवारो। होकाम काङ्कायेज़ येसुलाई माक्योरंये, कडालेकं येसुलो ओबेला अजं ओमराटाव।

जोडे ङा ङानारिज़्या होङ जे जेमनाडु

येसुये फरि नोरंलाई हैओडोवरं, “ङा ङाना होकाम जे ङालाई खिम्ने जेले, होकाम जे जेपापलंज़ सिने जेले। जोङ ङा ङाना जे जेमराडु।”

यहुडीराई हैयावारो, “आवये के सैसिने ओपान्ज़्याव सै कडि? कडालेकं आवये ‘जोङ ङा ङाना जे जेमराडु’ वार्डे हैवार्ज़्या।”

होकाम येसुये नोरंलाई हैओडोवरं, “जे मेलारं ची। ङा रोटा ची। जे आव प्रिठीबीलारं ची। ङा आव प्रिठीबीला माङ्क ची। ङा जेलाई हैङाडाच्योज़्या, ‘जे जेपापलंज़ सिने जेले’ कडालेकं ‘ङा होज़3’ वार्डे जे बिस्वास जेमडाखे भने जेपापलंज़ सिने जेले।”

युहन्ना ४:२६; बाने ३:१४

नोराई येसुलाई यापजोयो, “नङ काङ्का खेने?”

येसुये नोरंलाई हैओडोवरं, “ङा होज़, आव रोः जेलाई पैलाकामज़ हैङाडाच्योज़्या। ङा जेलाई डोसैने सोनो निया डाने भ्याज़ लिज़्या। हैनि पनि ङालाई परिःङने सत्य ले, होसोनो हो लेवङाम ङा जो ङाठोयो हो रोःज़ ङा प्रिठीबीलाई हैङाडोज़्या।”

बाबुलो ओबारेलं येसुये हैओवार्ज़्याव ची वार्डे नोराई माबुझिरंये। हैजैडे येसुये हैओवारो, “होकाम जे मानवालो ओज़ालाई याडे छेन्ने जेले, ‘ङाज़’ वार्डे जे ठा सन्ने जेले, ङा ङाअडिकारये कडिज़ ङामडो, बुरु बाबुये ओपैसोङो रोःरं ङापाङज़्याव वार्डे सन्ने जेले। ङालाई परिःङने ङासंज़ लिज़्या। नोये ङालाई ङाबाठङ मारासोङोये, कडालेकं ङा एकसप्ड्याज़ नोलाई खुसि झैने येःन ङाडोये।”

येसुये आव रोः ओपाङ्क भ्या मीराई येसुलाई बिस्वास याडोव।

सत्यये नङलाई छुट्कारा यानो

येसुये ओललाई बिस्वास डाने यहुडीरंलाई हैओडोवरं, “जे ङाबचनलं जेरंहिखे भने जे डस्साज़ ङासिसरंज़। होकाम जे सत्य कडि वार्डे सन्ने जेले, होकाम सत्यये जेलाई छुट्कारा झैनेले।”

नोराई येसुलाई जबाफ यायोव, “गे अब्राहामलो ओसन्तानरं ची, होसोनो आर्क समं काङ्कालो ओकमारा गेटाव माले। ‘जे छुट्कारा टाने जेले’ वार्डे कैजैडे हैजेवार्ज़्याव?”

येसुये नोरंलाई जबाफ ओयोवरं, “डस्साज़ ङा जेलाई हैङाडाच्यो, पाप डाने स्यान्टै पापलो ओकमारारंज़। कमारा एकसप्ड्या ज़ीःमकं मालेये, बुरु ज़ाके एकसप्ड्याज़ ज़ीःमकं लेये। हैजैडेज़ परमेस्वरलो ओज़ाये जेलाई छुट्कारा याझैच्योव भने जे पक्काज़ छुट्कारा डैने जेले। ङा ङासंन जे अब्राहामलो ओसन्तानरंज़। हैनि पनि जे ङालाई सैःने जेपान्सङज़्या, कडालेकं ङाबचनये जेलेवकं पो माडोयोये। जो-जो ङा ङाबाबुलो ओङाःकं रःङडेङानै, होज़ ङा हैङावारंये। जे पनि जोज़ जेबाबु लेवङाम जेठोयो, होज़ जेडोये।”

नोराई येसुलाई हैयाडोव, “गेबाबुके अब्राहाम ची।”

येसुये नोरंलाई हैओडोवरं, “जे अब्राहामलो ओसन्तानरं जेटाखिन्के, अब्राहामये जो येःन ओडोव हो डाने जेलेव। ङा परमेस्वरङाम ङाठोयो सत्य रोः जेलाई हैङाडाच्योज़्या, बुरु आर्क जे ङालाई सैःने जेपान्सङज़्या। अब्राहामये ऐटाव येःन ओडोव माले। जेबाबुये जो येःन ओडोव जे हो येःनज़ जेडोज़्या।”

नोराई येसुलाई हैयाडोव, “गे ब्यभिचारङाम जर्मीव नामऱ्यारं माङ्कची! गेबाबु टोबोज़ ले, हो परमेस्वरज़।”

येसुये नोरंलाई हैओडोवरं, “परमेस्वर जेबाबु ओटाखिन्के जे ङालाई मया जेडाङखेहो, कडालेकं ङा परमेस्वर लेवङाम ङाराव ची। ङा ङाइछ्याये ङाराव माङ्क, बुरु परमेस्वरये ङालाई उपरिःङसोङो ची। ङा हैङावार्ज़्याव जे कडा जेमबुझि? कडालेकं जे ङाबचन जेमठैडुये। जे के जेबाबु सैतानसंकारं ची, होसोनो जेबाबुलो उइछ्या पुरा झैने जे इछ्या जेडोज़्या। नो के सुरुङामज़ हत्यारा लेव, होसोनो नोलाई सत्यसं कडि वास्टाज़ माले। कडालेकं नोसं कडि सत्यज़ माले। नोये ढुटोयोये, नो ओल ओबानि स्यानावज़ पाङये, कडालेकं नो ढुटुवाज़ होसोनो ढुटुवालो ओबाबु ची। ङा सत्य ङापाङये, हैजैडे जे ङालाई बिस्वास जेमडाङये। जे भरिलाम काङ्काये ङालाई पापलो डोस लैसङडुव? होकाम ङा सत्य ङापाङखे भने, कडा जे ङालाई बिस्वास जेमडाङ? जो परमेस्वरलोज़, होये परमेस्वरलो ओपाङ ठोयोये। जे परमेस्वरलो माङ्करं ची, हैजैडे जे जेमठैये।”

येसु सोनो अब्राहाम

यहुडीराई येसुलाई जबाफ यायोव, “कडा गे हैगेवारो गेरोः ठीकं माङ्क, सै नङ सामरी ड होकाम नङलाई ज़्याः लागिडे उलिज़्याव?”

येसुये जबाफ ओयोवरं, “ङालाई ज़्याः मालागिये, बुरु ङा ङाबाबुलो ओमान ङाडोये, होकाम जे के ङालाई मान जेमडाङये। ङा ङामहिमा ङामखिम, टोबो लिज़्या जोये महिमा खिमोये होसोनो फासिला डोवये। डस्साज़ ङा जेलाई हैङाडाच्यो, कोइये ङाबचन याठोयो भने नो खर्कज़ सिने माले।”

यहुडीराई येसुलाई हैयाडोव, “आबो गेलाई पक्काज़ ठा ओटाव, नङलाई ज़्याः लागिडे उलिज़्यावज़। अब्राहाम उसिव, अगमबक्तारं पनि यासिरं, नङ हैनवार्ज़्या, ‘कोइये ङाबचन याठोयो भने नो खर्कज़ सिने माले।’ कडा नङ गेसाखा अब्राहाम भन्डा घ्योव डोरो? होके यासि, होसोनो अगमबक्तारं पनि यासिरं। नङ नङलाई काङ्का वार्डे हैनवार्ज़्याव?”

येसुये जबाफ ओयोवरं, “होकाम ङा ङामहिमा ङाज़ ङाडोखे भने ङामहिमा सोजोज़ टाये। ङालाई महिमा याने ङाबाबु लिज़्या, जोलाई जे ‘गेपरमेस्वर’ हैजेवार्ये। जे होलाई जेसरेव माले, बुरु ङा होलाई ङासरेये। ङा होलाई ङामसरेये ङावार्खे भने जे स्याव डुटाहा ठहरिने ङाले। हैनि पनि ङा होलाई ङासरेये, होसोनो होलो ओबचन ङाठैये। जे जेसाखा अब्राहाम ङासमय रःङनेलो लागिटं बनै खुसि ओटाव, नोये ङाराने डिन रःङने आसये बनै ओरेङो।”

हैजैडे यहुडीराई येसुलाई हैयाडोव, “नङके अजं पचास बर्सज़ नमयोटा, होकाम नङ अब्राहामलाई नरोःङोले?”

येसुये नोरंलाई हैओडोवरं, “सत्य रोः ङा जेलाई हैङाडाच्यो, अब्राहाम ओलेव भन्डा ङाडेङामज़ ङा ङालिज़्या।”

होकाम नोराई येसुलाई लुङ टिडे झोम्ने यापानो, होकाम येसु मोसिडे प्रार्ठना डोने ज़ीःमलाम पाखाडे पुलुडे ओनाव।

Source notes (3)
  1. Cross-reference लेबी २०:१०; न्याम २२:२२-२४
  2. Footnote कोइ पुरानो कुइये सर्सिव कितापयालं आव खन्ड छुटं पोलं नैसिव ले
  3. Footnote परमेस्वरलो उमिनकामटा टोबो मिन

Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.