Skip to content
BibleKenya

Sheshi Kham

मत्ती 23

ब्यबस्थाला शास्त्रीयाङ सनर फरिसीयाङजन चेताउनी

मर्कुस १२:३८-४०; लूका ११:३९-५२; २०:४५-४७

तब येशुले रुयाङल हुलजन सनर आ सिइयाङजन ऐआढोवाङ, “ब्यबस्थाला शास्त्रीयाङ सनर फरिसीयाङ मोशाल पोत चुङरा। तर जे ध्यानसं लेच्यो, नकाङ रापानन्या छेन ध्यानसं थएच्यो, तर नकाङै राढान्यामन ताइन्या काम ताढोच्यो, दानाङभन्या नकाङै अर्थ ता ऐयोरा, तर रा: जिबनल नका अनुसार माढोरदी। नकाङै ब्यबस्था नियामल यिईन्या सनर वुरौ जै माढुदुसिन्या वुर पोअस्यु रुयाङल येपत नाएस्योरा। तर राकने ना तोलोअ कुईसैले बै छेन्ङालेस्यु माछुरडी।” “तर नकाङै सोगल काम रुयाङजन थनौ नाल्ट ढोरा। दानाङभन्या नकाङ रा: चान्दा सनर नारीत ब्यबस्था-पत्र जनै घिन्या जाएरा, ओटन रा: क्वाल झुम्काङ सल्होएरा,1 भोसजिऊलं चान्या सम्मान डोएन्या पो सनर आराधना झिमजिऊल मुख्या पदयाङ निज्युरा, नकाङ रुयाङै बजार जिऊल गुरु राढान्या सनर जडौ राढान्या निज्युरा।” “तर जेजन काङ्काईले ‘गुरुज्यू’ ताढाचिऊत्या, दानाङभन्या जे गुरु तोलोअजाई लेया, ओटन जे सोगलै दाज्यूभाईयाङ हो। जे पिरथ्बील काङ्काईजन गे बौ ऐताढोच्यो, दानाङभन्या स्वर्गल जे बौ तोलोअजाई लेया। जेजन काङ्काईले ‘गुरुज्यू’ ताढाचिऊत्या, दानाङभन्या जे तोलोअ याएजै गुरु ख्रीस्ट हो। जेमध्य जो सोगलैतन घिन्या ले, ना जे सेवाऱ्या ताइन्यालेया।2 जोले ओलझन्ज घिन्या जाटौ, ना इङन्या जाएसिया, ओटन जोले ओलजन सइङौ, नकाजन घिन्या जाएन्यालेसिया।”3

येशुले नकाङल कपट आमानिजिउ

मर्कुस १२:४०; लूका ११:३९,४४-५२; २०:४७

“ऐ घुर्बीयाङ, शास्त्रीयाङ सनर फरिसीयाङ आक्याई! दानाङभन्या जे रुयाङलं सामन्दी स्वर्गला राज्यलं झलाप बन्द जेजाएचिऊ। न त जे पसिच्यो, न पसिऊ रोअन्याङजन रूफ्स्योचिरा।” “ऐ घुर्बीयाङ, शास्त्रीयाङ सनर फरिसीयाङ, जे आक्याई! दानाङभन्या जे बिदवाङल झिमबन ज्योस्योचिरा, ओटन ल्होन्या-ल्होन्या प्रार्थना ढाऔ जाएसिच्या। नैताइस्यु जे अपुऱ्याङतन भ्याई सजाई डोएन्यालेच्या।”

“ऐ घुर्बीयाङ, जे शास्त्रीयाङ सनर फरिसीयाङ, जे आक्याई! दानाङभन्या जे तोलोअजन जे पक्छेल होन्ङालेस्यु समुन्दर सनर नाम भरि चाहारच्या, ओटन नका जे सल्लात रायापाइना नकाजन नरगल जेतन डबल सजाय डोएन्या लायकला जाएच्या।” “आक्याई अन्ढला अगवाङ, जे ऐलेच्या ‘काङ्काङै मन्दिरलं किऱ्या ज्योरकन कैज माताइदी, तर मन्दिरला सुनल किऱ्या ज्योरकन ना बाचाले पोअन्यालेया।’” “मुर्ख सनर अन्ढलाङ, काङ्कावाला घिऊ? सुन सन् सुनजन पबित्र जाएन्या मन्दिर? ‘यदि काङ्काङै बेदील किऱ्या रांज्योवक कैइज माताइरदी, तर नकायर्त नाएसिन्या भिटीलं किऱ्या रांज्योवक बाचाले पोअसिरा ऐलेच्योकन।’” ऐ अन्ढलाङ, काङ्कावाला घिऊ? भिटी सन् भिटीजन पबित्र जाएन्या बेदी? नैताइस्यु बेदील किऱ्या ज्यान्याले बेदील सनर नालयर्ता सोगलै जन्तुल किऱ्या ज्योवा। मन्दिरलं किऱ्या ज्यान्याले मन्दिर सनर नाभितरल चुङन्या परमेस्वरलं किऱ्या ज्योवा। स्वर्गल किऱ्या ज्यान्याले सिहासनल यर्त बिराजमान ताइन्या परमेस्वरलं किऱ्या ज्योवा।4 “ऐ घुर्बी, शास्त्रीयाङ सनर फरिसीयाङ, जे आक्याई! दानाङभन्या जे बासमटी सनर स्वोप ओटन जीराल दसाम्स योंच्या, तर ब्यबस्थाला गम्भिर छेनल बारेल, अथाबा निया, सनर दया ओटन बिस्वासलं हेलचार ढास्युलेच्या। जे दसाम्स यांन्या काम ढाऔपरिन्या हो, ओटन ना घटलागिन्या छेनजन हेलचार माढाऔ परिन्या हो।5 अन्ढला अगवाङ, जे भुसना छेलच्या, तर ऊटजन व्आलच्या।”

“ऐ घुर्बी, शास्त्रीयाङ सनर फरिसीयाङ, जे आक्याई! दानाङभन्या जे कटौरा सनर थालल बाहेरङन सिलच्या, तर भितरङन कने ना लोब सनर छलकपटले भरिसिन्या ताइच्या। ऐ अन्ढला फरिसीयाङ, पैला कटौरा सनर थालल भितरङन सफा ढोचिते, ओटन नकाल बाहेरङन बै सफा जाएचिते।”

“ऐ घुर्बी, शास्त्रीयाङ सनर फरिसीयाङ, जे आक्याई! दानाङभन्या जे ऱ्हाएले सेप्सिन्या ऊईयाङ मनताइन्या लेच्या, जो बाहेरङनकने चान्या रंनरा, तर भितरङनकने सिन्या रुयाङल रूईयाङ सनर सोगल किसिमला स्युउनमले भरिसिन्या लेच्या।”6 जे बै नामन्जै बाहेरङन कने रुयाङल हाल धर्मि रंनच्या, तर भितरङन कपट सनर पापले भरिसिन्या लेच्या।

येशुले नकाङल सजाईल भबिस्यबानी आढान्या

लूका ११:४७-५१

“ऐ घुर्बी, शास्त्रीयाङ सनर फरिसीयाङ, आक्याई जे! दानाङभन्या जे अगमबक्ताङल ऊईयाङ जाएच्या, ओटन सोझाङल पाछाअजन सजाईच्या, ओटन जे ऐलेच्या, ‘गे पुर्खाङ बेलाक गेलन्याताहकन ता गे अगमबक्ताङल जी बगाहौक ओयाङसं सामेल माताहै होला।’” नैताइस्यु जे अगमबक्ताङल हत्या ढान्याङलै सन्तानयाङ ज्या ऐलेन्या जेईज बयन यांज्याच्या। जे पुर्खाङै राढान्या काम पुरा ढोचिते। “ऐ डाङयाङ सनर डाङल पुङयाङ, जे नरगला सजायतन कढाई बचिच्यो?7 नैताइस्यु ङा जेल्योङ अगमबक्ताङ, सनर बुद्दिमान रुयाङ ओटन शास्त्रीयाङ परिङ्ङरा। नकाङ मध्य ख्वाएजन सएन्यालेच्या ओटन क्रूसतं केपन्यालेच्या, ओटन ख्वाए याङजन जेमि बैठअझिम कोर्ला लाइचिरा, ओटन सहर-सहर जिऊल सटाइचिरा। पिरथ्बील बगाइसिन्या स्वाट्टै सोझाजन्ताल जी-निर्दोस हाबिलल जी तन रएस्यु बेरेक्याहल ल्हेपाज़ा जकरियाल जी समन, जोजन जे मन्दिर अथाबा बेदील खार्ल जेसएचिऊ, ना दोस जे ङएटै परिन्या लेया।8 ङा मछ्युजै, जेजन ऐढाच्या, ईका स्वाट्टै छेन ईका बेलाका पुस्ता यर्त परिरान्या लेया।

यरुशलेमत येशुल प्रेम

“ऐ, यरुशलेम, ऐ, यरुशलेम, नङ अगमबक्ताङजन सतनरा ओटन परमेस्वरले नङजन आपरिङसिन्या दुतयाङजन लुङले तुपनरा! जोमनलेस्यु बामाअले आबाचिपयाङजन आकरनीउल दुकौर, ओमनलेस्यु ङा बै तबर पाला न लुलल्याङजन दुउन्या इच्छ्या ङाढोङु, तर नङ माभन्दुना। खिम्चिते, जे झिम धाङ्गिल बनाएन्या लेसिया।9 दानाङभन्या ङा जेजन ऐढाच्या, ‘परमप्रभुल मिनतन रांन्या धन्याला ज्या’ जेमालेऊ समन जे ङाजन रङन्या माल्चिदी।”10

Source notes (10)
  1. Cross-reference मत्ती ६:१; ब्यबस्था ६:८; गन्ती १५:३८
  2. Cross-reference मत्ती २०:२६-२७; मर्कुस ९:३५; १०:४३-४४; लूका २२:२६
  3. Cross-reference लूका १४:११; १८:१८
  4. Cross-reference यशैया ६६:१; मत्ती ५:३४
  5. Cross-reference लेवी २७:३०
  6. Cross-reference प्रेरित २३:३
  7. Cross-reference मत्ती ३:७; १२:३४; लूका ३:७
  8. Cross-reference उत्पत्ति ४:८; २इतिहास २४:२०-२१
  9. Cross-reference यर्मिया २२:५
  10. Cross-reference भजनसङ्ग्रह ११८:२६

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.