Skip to content
BibleKenya

Sheshi Kham

मत्ती 22

ब्याहा-भोसलं आहान

लूका १४:१५-२४

येशुले फरि आहानङन नकाङजन ऐआढोवाङ, “स्वर्गल राज्यजन तोलोअ रय सकाए मानौ दुदुसिया, जोले आमि ल्हेपाज़ाल ब्याहा-भोस तयार आजाटौ, ओटन भोसलं थाई परिङसिन्या रुयाङजन खुल्चिरते ऐलेस्यु आमि नोक्करयाङजन आपरिङवाङ, तर ओयाङ मारांदुरा।” फरि नकाले अपुर नोक्करयाङजन ऐढास्यु आपरिङवाङ, “थाई परिङसिन्या रुयाङजन ऐढोचिरते, ब्याएचिते ङा ङामि भोस तयार जाएस्यु लेङा, ङा यीङयाङ सनर निखार पशुयाङजन पलस्यु नाएसिया, ओटन सोगलै जन्तु ठिक्कै ताइस्युलेया ब्याहा भोसलं रांचिते।” तर नकाङै नैज वास्ता माढास्यु काङ्काङ रा: खेएबारीदेए, छुट्टैयाङ रा: बैपार देए लागिवाङ। अपुऱ्याङै नकाल नोक्करयाङजन कोलोअस्यु राटुपवाङ ओटन नकाङजन दुर्ब्यब्यहार ढास्यु रासएवाङ। तब रय आयिङचोव, ओटन आसिपाइयाङजन परिङस्यु ना साइढवाङजन सएस्यु, ओटन नकाङल सहर आहिपस्योवाङ। “तब नकाले आनोक्करयाङजन ऐआढोवाङ, ‘ब्याहा-भोस तयार लेया, तर खुल्सिन्याङ मासुवाइन्या लेवाङ। नैताइस्यु जे द्वाहादोबाटाल हिन्चिते, ओटन ज्वाएजन डोएच्यो नकाङजन ब्याहा-भोसलं खुलचिरते।’” तब ना नोक्करयाङै द्वाहादोबाटाल हिनस्यु राडोएन्या भरियाङजन, चान्या सनर माचान्या सोगलैजन, रांखुल्वाङ, ओटन ब्याहा झिमल रुयाङ फाङताइवाङ। “तर जब रयले पाहुनाङजन भितर पसिस्यु आखिम्नाऔक, नाले तोलोअ रुले ब्याहाला क्वा आमाक्वाइसिन्या आरङौ। ओले नकाजन आगिनौ, ‘ऐ न्हाए, ब्याहाला क्वा माक्वाएसिस्यु नङ कढाई भितरलं नरानु?’ नकाले नैज माछ्योङदा।” “तब रयले सेवाऱ्याङजन आढोवाङ, ‘नकाल खङ-कुई पोअस्यु नकाजन बाहेरङा चिऊन्याल क्याइचिते, ओङ व्‌रा ओटन ह्वा ज़िङ कैवा।’1 आसापट येशुले ऐलेऊ, दानाङभन्या खुल्सिन्याङ भ्याई लेरा, तर छेल्सिन्याङ थोरैजाइ लेरा।”2

कर फोअन्या बारेल रांगिनन्या

मर्कुस १२:१३-१७; लूका २०:२०-२६

तब फरिसीयाङ हिनस्यु ओलजन आछेनतै कैलेस्यु फसाहै ऐलेस्यु सल्ला रांढोव। ओलं छिन्ट नकाङै सिइयाङजन हेरोदी बगालला रुयाङस आल्योङ रांपरिङौ। ओटन नकाङै ऐराढोव, “औ गुरुज्यू, गे ऐसन्या, नङ इमानदार लेना, ओटन परमेस्वरलं यम सत्यसैज ह्युउकनरा, नङ काङ्काईल छ्याइ मामानिन्दी, दानाङभन्या नङ रुयाङल हां खिमस्यु काम माढोन्दी। आब गेजन ईका पानस्यासिन्ते, नैताहकन न बिचार नैलेव। कैसरजन3 तिरो फोअन्या ठिक लेऊ सन् मालेऊ?” तर येशुले नकाङल कपटाई सनस्यु ऐआढोवाङ, “घुर्बीयाङ, जे ङाजन दानाङ बिचार ज्याङच्यो? ङाजन तिरो फोअन्या सिक्का थनस्याङचिते।” नकाङै येशु ल्योङ तोलोअ सिक्का राहोनौ। ओटन येशुले नकाङजन आगिन्वाङ, “ईका सुरुप काङ्काल?, ओटन काङ्काल मिन खुपिसिज्याऔ?” नकाङै येशुजन ऐराढोव, “कैसरलं4।” तब येशुले नकाङजन ऐआढोवाङ, “नैताइस्यु जो कैसरलं हो, नका कैसरजन योंचिते, ओटन जो परमेस्वरलं हो, ना परमेस्वरजन योंचिते।” ओटन आछेन थएस्यु नकाङ छक्कै ताइवाङ, ओटन ओलजन यमल राइनिइस्यु हिन्वाङ।

सिन्याङतन पुनरुत्थानल बारेल रांगिनन्या

मर्कुस १२:१८-२७; लूका २०:२७-४०

ओइछिम्क सदुकीयाङ सिन्याङ पुनरुत्थान माताइरदी ऐलेस्यु येशु ल्योङ रा:स्यु दाबि रांढोव,5 “नकाङै ऐलेवाङ, औ गुरुज्यू, मोशाले ऐलेस्यु लेया, जो रु दाज्यू निसन्तान ताइस्यु सी, नकाल भाईले आदाज्यूल मेएमा ब्याहा ढास्यु आदाज्यूल नाल्ट सन्तान नाटौपरिया।6 गे आल साट भाई लेवाङ। जेठाले ब्याहा आढाऔ छिन्ट नका निसन्तान सिऊ ओटन नकाल आभाईयाङ ऐलेस्यु ब्याहा रांढोव। नैलेस्युजै फरि माईलाले ओटन साईलाले, नैलेस्यु साटै वटाङस नैज ताहौ। नकाङ सोगलै रासिऊ छिन्ट नका मेएमा बै सिऊ। नैताइस्यु सिन्याङ पुनरुत्थान आताहौक नका काङ्काल ना मेएमा ताहौ? दानाङभन्या नका सोगलैल मेएमा ताइस्युलेया।”

येशुले नकाङजन जबाक आयोवाङ, “जे भरमल परीस्यु लेच्या, दानाङभन्या जे पबित्रशास्त्र सनर परमेस्वरलं सक्ति मासन्चिदी। तर सिन्याङल पुनरुत्थानक रुयाङै ब्याहा माढोरदी, दानाङभन्या नकाङ स्वर्गला स्वर्गदुतयाङमन्जै ताइरा। तर सिन्याङै पुनरुत्थानल बारेल परमेस्वरले जेजन नैआपानस्याचिऊ, नैति जे पबित्रशास्त्रला बचन परीस्यु जेमाल्चिऊ? ‘ङा अब्राहामल परमेस्वर, इसहाकलं परमेस्वर सनर याकूबल परमेस्वर हो।’ परमेस्वर सिन्याङल परमेस्वर माङडी, तर जिङदाङल परमेस्वर हो।”7 ईका थएस्यु रुयाङल हुल ओलं ग्यानत छक्कै परिवाङ।

सोगलैतन घिन्या आग्या

मर्कुस १२:२८-३४; लूका १०:२५-२८

येशुले सदुकीयाङजन छपक्कै आसदिङवाङ ऐलेन्या थएस्यु फरिसीयाङ आल्योङ दुउसिवाङ। नकाङ मध्य तोलोअ ब्यबस्थाला शास्त्रीले ओलजन बिचारन्या यिङले आगिनौ,8 “औ गुरुज्यू, मोशाल ब्यबस्थालं घिन्या आग्या काङ्कावाला हो?”

येशुले नकाजन ऐआढोव, “नङ परमप्रभु न परमेस्वरजन सोगलै नयिङले, सनर सोगलै नपरानले, ओटन सोगल यादले प्रेम ढोते।9 सोगलैतन घिन्या सनर पैला आग्या ईकाइ ज्या। छुट्टै बै ऐटाइन्या लेया, ‘नङ नडेराबाराजन नङझन्ज मन प्रेम ढोवरते।’10 मोशाल ब्यबस्था सनर अगमबक्ताङल सिक्छ्याल आधार जै आका नेंलोअ आग्याने हो।”11

ख्रीस्ट काङ्काल ज़ा?

मर्कुस १२:३५-३७; लूका २०:४१-४४

जब फरिसीयाङ दुउसिस्यु लेवाङ, तब येशुले नकाङजन आगिन्वाङ, “ख्रीस्टल बारेल जे नै जेयिङचिऊ? नका काङ्काल ज़ा हो?” नकाङै ओलजन ऐराढोव, “दाऊदल ज़ा।” येशुले नकाङजन आगिन्वाङ, “नैताहकन दाऊदले परमेस्वरलं आत्माङन प्रेरना डोएस्यु नकाजन कैलेस्यु प्रभु ऐलेस्यु पुकारिऊ? ओले ऐलेऊ, ‘परमप्रभुले ङा प्रभुजन ऐआढोव, नङ ङा दाइन्या कुईङन चुङनते, जब समन ङा न शत्तुरयाङजन नखङ बाङल माजातङर।’”12 यदि दाऊदले ओजन प्रभु ऐढोवकन, नका कैलेस्यु ओलं ज़ा ताहौ वन? तर काङ्काईले त आखर छ्योङौ रांमाढुदुऊ। ओ छिम्कन काङ्काईले ओलजन गिनन्या रामाआन्तिदुऊ।

Source notes (12)
  1. Cross-reference मत्ती ८:१२; २५:३०; लूका १३:२८
  2. Cross-reference २इतिहास ८:३
  3. Footnote रोमी सम्राटजन कैसर ऐढासिया
  4. Footnote रय = कैसर
  5. Cross-reference प्रेरित २३:८
  6. Cross-reference ब्यबस्था २५:५
  7. Cross-reference प्रस्थान ३:६
  8. Cross-reference लूका १०:२५-२८
  9. Cross-reference ब्यबस्था ६:५
  10. Cross-reference लेवी १९:१८
  11. Cross-reference लूका १०:२५-२८
  12. Cross-reference भजनसङ्ग्रह ११०:१

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.