Skip to content
BibleKenya

Sheshi Kham

मत्ती 18

सोगलैतन घिन्या काङ्का

मर्कुस ९:३३-३७,४२-४८; लूका ९:४६-४८; १७:१-२

नाइ बेला सिइयाङ येशु ल्योङ रा:स्यु रांगिनौ, “स्वर्गला राज्यल सोगलैतन घिन्या काङ्का?”1

येशुले तोलोअ इङन्या लुलजन नेराक खुल्स्यु नकाङल खार्ल आसच्यानौ, ओटन ऐआढोवाङ, “ङा मछ्यु जेजन ऐढाच्या, यिङ फिरिसिस्यु जे इङन्या लुलल्याङमन माताइदुच्या भन्या खकै स्वर्गला राज्यल पसिन्या माल्चिदी।2 नैताइस्यु जोले ईका इङन्या लुलमन ओलझन्जै नरम जाटौ, नका स्वर्गला राज्यल सोगलैतन घिन्या ताइन्यालेया। जोले ङा मिनङन तोलोअ ऐटाइन्या लुलजन ग्रहन ढोव, ओले ङाजन ग्रहन ढाङवा।”

पापल परिनाम

मर्कुस ९:४२-४८; लूका १७:१-२

“तर जोले ङाजन बिस्वास ढान्या आका इङन्याङ मध्य तोलोअजन पाप ढाऔ परिङौ, बरु नाल ढेङल बडाक्कन्या लुङल चाखी पोअस्यु नकाजन घोलोमन्या समुन्दरल बुदाइन्या ठिक लेया।” आक्याई आका सङ्सार! “पाप ढाऔ परिङन्या परिक्छ्या ता ऐराया, तर आक्याई, ना जो रुतन पाप ढाऔ परिङन्या बाढा रा:!” जे कुई या जे खङले जेजन पाप ढाऔ परिङचिऊ कन नाजन पलस्यु क्याइचिते। नेंलोअ कुई या नेंलोअ खङसकाए अनन्तल मील क्याइसिऊभन्या ता बरु लुला या दुन्डा ताइस्यु जिबनल पसिन्या जे नाल्ट चान्या ताहा।3 जे म्युउले जेजन पाप ढाऔ परिङचिऊकन नकाजन कलअस्यु क्याइचिते। नेंलोअ म्युउसं नरगला मील हिनौ भन्याता बरु तोलोअ म्युउसं जिबनल पसिन्या जे नाल्ट ठिक लेया।4

मांन्या भेडालं आहान

लूका १५:३-७

“होसियार ताइचिते, जे ईका इङन्याङ मध्य तोलोअजन बै हेलाइ ताढोच्यो। दानाङभन्या ङा जेजन ऐढाच्या, स्वर्गदुतयाङै ङा बौल दर्शन स्वर्गल सदाईज ढाज्यारा। दानाङभन्या रुल ज़ा मांन्याङजन बचाइ रांऔ हो।”5

“जे बिचार नैलेव? तोलोअ रुल सय गोटा भेडाङ मध्य तोलोअ बिस्किस्यु हिनकन, ओले उनानसय वटाजन बनाएस्यु डान्डा घैरा जिऊल ना बिस्किस्यु हिनन्या तोलोअजन मारोअनाऔ का? ङा मछ्यु जेजन ऐढाच्या, यदि ओले नाजन डोएदा भन्या, बिस्किस्यु माहिनन्या ना उनानसय भेडाङभन्या तोलोअल नाल्ट नका भ्याई हेसाङन्यालेया। नामन्जै स्वर्गल लिज्यान्या जे बौल इच्छ्या बै ऐटाइन्याई लेया, कि ईका इईङन्याङ मध्य तोलोअ बै नास ताटाइरत्या।”

पाप ढान्या दाज्यूभाई या दिदीबैना

“यदि न दाज्यूभाई या न दिदीबैनाले न बिरोदत पाप ढोदा भन्या, हिनस्यु झेन नेंलोअयाएज झेनलेऊक नकाल दोस थनस्यो। नकाले न छेन थएदा भन्या, न दाज्यूभाई या न दिदीबैना नमी ताइदा।6 तर नकाले माथएदा भन्या ओलसं तोलोअ या नेंलोअजन लाङ ओटन नेंलोअ अथाबा तिन जना साचीयाङ्ङन सोगलै छेन पक्का ग्याताइत्या।”7 यदि ओले नकाङल छेन थटौ माभन्दा भन्या, मन्डलीयाङजन पानस्योचिरते। नकाले मन्डलीला छेन बै माथएदा भन्या, नका न नाल्ट गैरयहूदीयाङ सनर तिरो उठाइन्यामन्जै ग्याताइत्या। “ङा मछ्यु जेजन ऐढाच्या, जे पिरथ्बील जो पोअच्यो, नका स्वर्गत पोअन्यालेसिया। ओटन जे पिरथ्बील जो पलाअच्यो नका स्वर्गत पलाअन्या लेसिया।”8 “ङा मछ्यु फरि जेजन पानस्याच्या, पिरथ्बील जेमध्य नेंलोअ जो छेनत सहमति ताइस्यु कोबाअ नीदुच्या भन्या, ना स्वर्गला ङा बौङन जे नाल्ट ताइन्यालेया, दानाङभन्या जोङ नेंलोअ या तिनगोटा ङा मिनत दुउसिर, ओङ ङा नकाङल खार्ल ताइङा।”

छेमा मायान्या नोक्करल आहान

पत्रुस येशुल ल्योङ रा:स्यु ऐलेऊ, “औ प्रभु, ङा भाईले ख्वाए पाला ङा बिरोदत पाप आढोव, नैति ङा नकाजन साट पाला समन छेमा यांन्या रों?”9

येशुले नाजन ऐआढोव, “ङा नङजन ऐढाना, साट पाला माङडी, तर सहत्तर गुना साट पाला।” नैताइस्यु स्वर्गला राज्य तोलोअ रय सकाए मानौ दुदुसिया, जोले आनोक्करयाङ सकाए हिसाप होनन्या बिचार आढोव। जब ओले हिसाप नीऊ तअसिऊ, दस हजार सुनल सिक्का लोई लाङन्या, तोलोअजन आल्योङ राहोनौ। तर नका रुले नैजमालस्यु फोकौ माढुदुवा पाइना नकाल साहूले नकाजन आमेएमा सनर आज़ायाङ ओटन आमि सोगल जन्तु यएस्यु लोई फोअन्या आदेस आयोव। “तब ना नोक्करले घुन्डा टिकिस्यु नकाजन ढोक या:स्यु ऐलेऊ तअसिऊ, ‘साहू ज्यू, ङाजन दया ढाङते, ङा सोगलै ङालोई चुक्ता जाएस्याना।’” तब नका नोक्करलं साहूले यीङताए मानिस्यु नाजन आराहौ, ओटन नकालं लोई मनआमारिस्यौ।

“तर नका नोक्कर ओलन पलिईस्यु आहिनज्याऔक आन्हाएयाङ मध्य तोलोअ नोक्करस डोएसिऊ, जोले नकाल त सय चान्दील सिक्का लोई लाङस्यु आनाटौ। नकाले नाजन आभोङक्राल कोलोअस्यु ऐआढोव, ‘नलोई फोअते।’” “तर नकाल न्हाए नोक्करले निऊरिस्यु नाजन बिन्ति आढोव, ‘ङाजन दया ढास्यु वुइते,’ ङा नमी सोगलै फोअङा।” “तर नकाले माभनस्यु, ना हिनौ ओटन नवाएजा माङडी नकाले लोई आमाफोकौ समन नकाजन झ्यालखानाल आझोकौ। नकाल आन्हाए नोक्करयाङै ईका सोगलै रांरङौ ओटन नकाङ भ्याईज दुखी ताइवाङ। नकाङै हिनस्यु रा:साहूजन ईका स्वाट्टै घटना रापानस्यौ। ” “तब साहूले नका नोक्करजन आल्योङ खुल्स्यु ऐआढोव, ऐ बिकामी नोक्कर, नङ ङाजन बिन्ति नढाङनु, ओटन ङा नङजन नलोईन्या मनङामारिस्यानु।” ङा नङजन जोमनलेस्यु दया ङाढानु, नङ बै न न्हाए नोक्करजन दया ढाऔ मापरिऊ? तब नकाल साहूले भ्याई आयिङचोस्यु नाजन सोगल आलोईन्या आमाफोकौ समन सजाई यांन्या सिपाइयाङल कुईत जिम्मा आयोवाङ। ओटन येशुले निस्कर्स आपलिटौ “जे बै जेदाज्यूभाई या जेदिदीबैनाजन जेयिङ्ङन्ज छेमा मायोचिरकन, स्वर्गल लिज्यान्या ङा बौले बै जेजन नैताइन्या ब्यबहार ढान्यालेया।”

Source notes (9)
  1. Cross-reference लूका २२:२४
  2. Cross-reference मर्कुस १०:१५; लूका १८:१७
  3. Cross-reference मत्ती ५:३०
  4. Cross-reference मत्ती ५:२९
  5. Cross-reference लूका १९:१०
  6. Cross-reference लूका १७:३
  7. Cross-reference ब्यबस्था १९:१५
  8. Cross-reference मत्ती १६:१९; यहुन्ना २०:२३
  9. Cross-reference लूका १७:३; ४

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.