मत्ती 16

चिन्न सनर अचम्मला काम ढास्यु थन्ते राढान्या

मर्कुस ८:११-१३; लूका १२:५४-५६

1फरिसीयाङ सनर सदुकीयाङ रांवाङ, ओटन येशुजन अल्चिऊ नाल्ट स्वर्गला तोलोअ चिन्न थनस्यासिन ऐलेस्यु नीवाङ।1 2तर ओले नकाङजन जबाक आयोवाङ, “जब ओइ ताहापाइना जे ऐलेच्या, ‘ईका मौसम सफा लेया, दानाङभन्या नम घ्यामज्याऔ।’ 3छकाल्या ऐलेच्या, ‘नम घ्यामज्याया ओटन बादलले कप्स्यु नाएवा, आछिम आन्ढी रांन्यालेया।’ जे नमल अबस्था खिमस्यु लाअ कैताहौ, छुटाहौ सनच्या तर समायल चिन्नल अर्थ पानौ माढुदुचिदी। 4येशुले नकाङजन ऐआढोवाङ, दुस्ट सनर ब्यबिचारी पुस्ताले चिन्न रोअवा, तर नकाङजन योनाल चिन्नतन अपुर नैज चिन्न मायासिदी।” ऐलेस्यु बनाएस्यु हिनौ।2

सदुकीयाङ सनर फरिसीयाङ सोडा

मर्कुस ८:१४-२१

5येशु सिइयाङ सकाए दहल हुदिफन्ट राटापौक नकाङै भरेई होनन्या राम्योकौ रैस। 6ओटन येशुले नकाङजन ऐआढोवाङ, “ध्यान ढोच्यो, फरिसीयाङ सनर सदुकीयाङल सोडातन होसियार ताइच्यो।”3 7नकाङ रारांल छ्योङौ तअसिवाङ, “गे भरेई माहोन्दुया, नैताइस्यु ओले नैलिज्याऔ।” 8येशुले ईका सनस्यु ऐआढोवाङ, “ऐ, अल्पबिस्वासीयाङ! गेसं भरेई माल्दी ऐलेस्यु दानाङ जे जेल छ्योङज्याच्यो? 9नैति जे अझ बै जेमाबुजिचिऊ? ङा पास हजार रुयाङ नाल्ट पास गोटा भरेई ङाकलाटौक जे ख्वाए घोन जेदुउचिऊ जेजन यांका मालेऊ?4 10ओटन चार हजार रुयाङल नाल्ट साट पाटा भरेई ङाकलाटौक, जे ख्वाए घोन जेदुउचिऊ?5 11ङा जेसकाए भरेईल बारेल ङाछ्योङज्याङु माङडी ऐलेस्यु जे दानाङ माबुजिच्यो? जे फरिसी सनर सदुकीयाङल सोडातन होसियार ताइचिते।” 12तब नकाङै सोडावाला भरेईल बारे माङडी रैस, नका ता फरिसी सनर सदुकीयाङ सिक्छ्यातन होसियार ताइच्यो ऐलेऊदी रैस लेस्यु राबुजिऊ।

येशुल बारेङन पत्रुसलं घोसना

मर्कुस ८:२७-३०; लूका ९:१८-२१

13जब येशु कैसरिया फिलिप्पीला इलाकाल रायापाइना, ओले सिइयाङजन आगिन्वाङ, “रुयाङै रुल ज़ाजन काङ्का ऐढाज्यावाङ होला?” 14नकाङै जबाक रांयोव, “काङ्काङै बप्तिस्मा यांन्या यहुन्ना, काङ्काङै एलिया, ओटन काङ्काङै यर्मिया या अगमबक्ताङ मध्य तोलोअ काङ्कावाला ताहौ, ऐलिज्यारा।”6 15ओले नकाङजन आगिन्वाङ, “जे नै कैजेल्चिऊ वन, ङा काङ्का?” 16सिमोन पत्रुसले जबाक आयोव, “नङ जिङदा परमेस्वरलं ज़ा ख्रीस्ट हो।”7

17येशुले नकाजन ऐआढोव, “यहुन्नाल ज़ा सिमोन, नङ बअचान्याई लेना। दानाङभन्या रुल स्या सनर जीङन नङजन आका थनसिन्या माङडी, तर स्वर्गल लिज्यान्या ङा बौले आथननु हो। 18आब ङा नङजन ऐढाना, कि नङ पत्रुस ज्या। ङा ङामि मन्डली ईका चमयर्त सच्यानन्यालेङा, ओटन नरगला झलापयाङ नकातन झ्योङौ माडोएरदी। 19ङा नङजन स्वर्गला राज्यला चाबियाङ यांन्या लेङा। जो नङ पिरथ्बील पोकनकन, ना स्वर्गल पोअन्यालेसिया, ओटन पिरथ्बील नङ जो पलाकन, ना स्वर्गल पलाअन्या लेसिया।”8 20येशुले नका ख्रीस्ट जै ज्या, ऐलेस्यु काङ्काईजन तापानस्योचिर ऐलेस्यु, आ सिइयाङजन कडा आदेस आयोवाङ।

येशुले क्रूसतं आसिन्या बारेल भबिस्यबानी आपानन्या

मर्कुस ८:३१; ९:१; लूका ९:२२-२७

21येशु यरुशलेमल हिनस्यु, ह्युउन्या गुरयाङ, मुख्या पुजाउरोयाङ सनर शास्त्रीयाङ्ङन भ्याई दुख भुगिन्यालेङा, ओटन सएस्यु निन्यालेङा, सनर तिन दिनक जिङदा ताइस्यु सोन्यालेङा, ऐलेस्यु आ सिइयाङजन नवाए बेलाकन्ज पानस्याऔ तअसिऊ। 22पत्रुसले येशुजन तपोईदेए लाङस्यु आहप्काहौ, “परमेस्वरले ऐ ग्यालत्या, प्रभु, नयर्त खकै ऐताटाइत्या।”

23तर वलस्यु ओले पत्रुसजन ऐआढोव, “ऐ सैतान, ङा लेऊकन ढोङन्ते, नङ ङा नाल्ट बाढा हो। दानाङभन्या नङ परमेस्वरलं छेनत माङडी, तर रुयाङल छेनत यिङ लाइना।” 24तब येशुले आ सिइयाङजन ऐआढोवाङ, “जोले ङा छिन्ट रांन्या यिङ ढोव, नकाले ओलझन्जै तामानिऊत्या ओटन आक्रूस वुरस्यु ङाछिन्ट ग्यालागित्या।9 25दानाङभन्या जोले आपरान जोगाहौ रोंकौ, ओले नका गवाइवा, तर जोले आपरान ङा नाल्ट गवाहौ, नकाले ना डोएन्यालेया।10 26सोगल सङ्सार डोएस्युकने बै आपरान गवाहौकन, रुजन नैति कोबाअ फाइदा ताहौ का? अथाबा रुले आपरानल पोल नै यांऔ आढुदुऊ का? 27दानाङभन्या रुल ज़ा आबौल महिमात आमि स्वर्गदुतयाङ सकाए रांन्यालेया, ओटन नकाए बेला नाले स्वाट्टै रुयाङजन नकाङल काम अनुसार ध्यारी योंवरा।11 28ङा जेजन मछ्यु ऐढाच्या, इल च्याङज्यान्याङ मध्य ख्वाएयाएले रुल ज़ाजन आराज्यल आरांज्यान्या रांमारङौ समन सिइकाल मादाररदी।”