Sheshi Kham
मत्ती 15
पुर्खाङल सिक्छ्या
मर्कुस ७:१-१३
जब यरुशलेमङन ख्वाएयाए शास्त्रीयाङ सनर फरिसीयाङ येशु ल्योङ रांवाङ, तब नकाङै ओलजन रांगिनौ, “न सिइयाङै रापुर्खाङ रांमानिन्या चलन दानाङ मामानिर? नकाङै ज्याऔ हादेए राकुई माहुररंदी।”
येशुले नकाङजन ऐआढोवाङ, “जे परमेस्वरलं आग्या पालन माढास्यु, दानाङ जे चलनत लागिज्याच्यो? दानाङभन्या परमेस्वरले ऐलेया, ‘जे बौ सनर जेअमाल आदर ढोचिते, ओटन जेबौ या जेअमाल बिरोदत जोले सराप छेन छ्योङ, नका पक्का सएस्युनीन्या लायकला ताहा।’1 तर जे ऐलेच्या, जोले आबौ या आअमाजन ऐढोव, कि ‘झेन ङाल्योङन जो डोटौ नरोअनु, ना परमेस्वरजन चराइसिदा।’ ओले ङा बौल आदर ढान्या माताइदी ऐलेस्यु आमि पुर्खाङल चलनले गर्दा परमेस्वरलं बचनजन बिकामला आठहऱ्याहौ। ऐ, घुर्बीयाङ, यशैयाले जे बारेल सत्य भबिस्यबानी आढोव, ‘आका रुयाङै ङाजन याह्ले याएजै मान नाएस्याङरा, तर नकाङल यिङ ङातन लोए लेया।2 नकाङ डाङजै ङा प्रसम्सा ढाऔजाएसिरा, तर नकाङल सिक्छ्या रुयाङ राह्युउन्या बिधि याएज ज्या।’”
नै जन्तुले रुजन अशुद्द जाटौ
मर्कुस ७:१४-२३
येशुले तबर रुयाङजन आलेऊदेए आखुल्वाङ ओटन नकाङजन ऐआढोवाङ, “थएचिते ओटन बुजिचिते। जो रुल याह् भितरलं पसि, नकाले रुजन अशुद्द माजाटौडी। तर जो याह्लन बाहेर पलिह, नकाले रुजन अशुद्द जाएवा।”
ओलं छिन्ट सिइयाङ रा:स्यु येशुजन ऐराढोव, “नैति नङजन थाह मालेच्यो? फरिसीयाङ न छेन थएस्यु रायिङचोज्याया।”
तर येशुले आढोवाङ, “स्वर्गल लिज्यान्या ङा बौले आमालाइन्या सोगलै टुङजन भोअन्यालेसिया। नकाङजन राइचिरते, दानाङभन्या नकाङ अन्ढला अगवाङ हो। अन्ढलाले अन्ढलाजन डोऱ्याइदा भन्या, नकाने नेंलोअजै खाल्टाल परिन्या।”3
पत्रुसले ओलजन ऐआढोव, “गेजन ईका आहानल अर्थ पानस्यासिन्ते।”
येशुले ऐलेऊ, “नैति जे अझ बै जेमाबुजिचिऊ? रुल याह्लन जो भन्दिउल पसि, बुललन बाहेर देए ओइज पलिहा ऐलेस्यु जे जेमासन्चिऊ? तर जो छेनयाङ याह्लन बाहेर देए पलिइर, नकाङ यिङलन पलिइरा ओटन नकाङज रुजन अशुद्द जाएरा।4 दानाङभन्या रुयाङल यिङलन जै सुइटैन्या, हत्या, मेएमा फिरिन्या5, ब्यबिचार, कुन्या, ग्वारवा साची सनर बाएयाङ बाहेर देए पलिइरा। ऐटाइन्या छेनले रुजन अशुद्द जाएवा। तर कुई माहुरस्यु ज्याऔकाले ओलजन अशुद्द माजाटौडी।”
कनानी मेएमाल बिस्वास
मर्कुस ७:२४-३०
तब येशु नलन पलिईस्यु टुरोस सनर सीदोनला इलाकादेए हिनौ। नका इलाकालन तोलोअ कनानी मेएमा रा:स्यु कलिऊस्यु ऐलेऊ, “औ प्रभु, दाऊदल ज़ा, ङाजन दया ढाङते। ङाज़ाजन दुस्टआत्माले भ्याई दुख यांज्याऔ।” येशुले नकाजन नैज जबाक मायोदा। आ सिइयाङ रा:स्यु ओलजन बिन्ति रांढोव, “इकाजन परिङते, दानाङभन्या नका व्रस्युव्रस्यु गेछिनछिन रांज्याया।”
येशुले ऐआढोवाङ, “ङाजन इस्राएलला मांन्या भेडाङलं नाल्ट परिङसिऊ हो।” तर नका मेएमा रा:स्यु आहाक घुन्डा टिकिस्यु ऐआढोव, “औ प्रभु, ङाजन व्टङते।”
येशुले ऐलेऊ, “लुलल्याङल भरेई होनस्यु कांयाङजन क्याइस्यान्या ठिक माल्दी।” नका गैरयहूदी मेएमाले ऐलेऊ, “औ प्रभु, तर कांयाङ बै ता रांखसमलं देस्कतन तेइन्या भरेईल चोइलाङ कैरा सा।”
तब येशुले नकाजन जबाक आयोव, “ऐ स्त्री, न बिस्वास घिन्या लेऊरैस। नङ इच्छ्या नढान्या मन्जै ग्याताइत्या।” नकाल मेएमा आज़ा नवाए बेलाई बेल्दा।
येशुले तबर रुयाङजन आसबेल्वाङ
मर्कुस ८:१-१०
येशु नलन पलिईस्यु गालील दहल आवङवङ ताइस्यु हिनौ, ओटन डान्डाल वूमस्यु ओलै चुङौ। तब बअ-बअघिन्या रुयाङल हुल आल्योङ रांवाङ, ओटन नकाङै राहोनन्या दुन्डा, लुला, अन्ढला, लाटा सनर अपुर तबरजन आवङल रानाएवाङ, ओटन येशुले नकाङजन आसबेल्वाङ। आवाए समन कि, लाताङ छ्योङवाङ, लुलाङ बेल्वाङ, दुन्डाङ बावाङ, ओटन अन्ढलाङल म्युउयाङ आफएसिन्या, रङस्यु रुयाङ छक्कै परिवाङ, ओटन नकाङै इस्राएलला परमेस्वरलं महिमा रांढोव।
येशुले छुट्टै घिन्या रुयाङ हुलजन आयांइन्या
मर्कुस ८:१-१०
तब येशुले आ सिइयाङजन आल्योङ खुल्सिऊ ऐआढोवाङ, “ङा ईका रुयाङजन यीङताए मानिङरा दानाङभन्या इकाङ ङासकाए रालज्यान्या तिन दिन ताइदा ओटन इकाङ सकाए ज्यान्या नैज माल्दी। इकाङजन करेटै परिङन्या ङा मापरिङ्ङरदी। मानकन्ता इकाङ यमलै बिहोस ताइरा।” ओलजन आसिइयाङै ऐराढोव, “आवाए घिन्या रुयाङ हुलजन यांऔ नाल्ट ईका नैजमालन्या पोल नवाए धरअसा भरेई गे काङन होनै?”
येशुले नकाङजन ऐआढोवाङ, “जेसकाए ख्वाए गोटा भरेई लेऊ?” नकाङै ऐलेवाङ, साट पाटा भरेई सनर इङइङन्या ङा:स्या।
येशुले रुयाङ हुलजन नामल चुङन्या आग्या आयोवाङ। ओले नका साट पाटा भरेई सनर ङा:स्या होनस्यु परमेस्वरजन धन्याबाद योंवापाइना कलाएस्यु आ सिइयाङजन आयोवाङ, ओटन आसिइयाङै रुयाङजन रांयोवाङ। नकाङ सोगलैले कैस्यु वाङवाङ। ओटन येलन्या चोइलाङ नकाङै साट घोन रादुकौ। मेएमाङ सनर लुलल्याङ बाहेक कैन्याङ चार हजार ल्हेपाङ लेवाङ। जब रुयाङ हुलजन यांहौरा पाइना बिदा आयोवाङ, तब ओल डोङ्गात चरिस्यु मगादानलं इलाकादेए हिनौ।
Source notes (5)
- Cross-reference प्रस्थान २०:१२; २१:१७; ब्यबस्था ५:१६; लेवी २०:९
- Cross-reference यशैया २९:१३
- Cross-reference लूका ६:३९
- Cross-reference मत्ती १२:३४
- Footnote ब्याहा ढाऔ हादेए
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.