Skip to content
BibleKenya

Sheshi Kham

मर्कुसं 8

येशुले चार हजारजन आयांइवाङ

मत्ती १५:२९-३९

नका दिनल फरि तोलोअ घिन्या हुल दुउसिवाङ, तर नकाङसं ज्यान्या जन्तु नैज मालेव। तब येशुले आ सिइयाङजन आल्योङ खुल्स्यु ऐआढोवाङ, “ङाजन ईका हुलल यर्त दया रांऔ, दानाङभन्या इकाङ ङासकाए रालज्यान्या आछिम तिन दिन ताइदा, ओटन इकाङ ल्योङ ज्यान्या नैज माल्दी। ओटन यदि इकाङजन करेटै झिम परिङ्ङरकन थाकिस्यु यमलै बिहोस ताइरा, दानाङभन्या इकाङ तन काङ्का-काङ्काङ लोएङन रा:स्युलेरा।”

आसिइयाङै ओलजन जबाक रांयोव, “आका काङ्काई मालन्या पोल आवाए भरेई काङन होनै, ओटन आकाङ वाङर?”

येशुले रांजन आगिन्वाङ, “जेल्योङ ख्वाए गोटा भरेई लिज्याऔ?” ओयाङै ऐलेवाङ, “साट पाटा भरेई” ओटन येशुले हुलजन नामल चुङन्या हुकुम आयोवाङ, ओटन ओले साट पाटा भरेई आकुईत हिनस्यु धन्याबाद यांस्यु आकलाटौ, ओटन आसिइयाङजन यांस्यु ऐआढोवाङ, कि नकाङल हाल नाएस्योचिरते। ओटन नकाङै रुयाङल हाल रानाएस्योवाङ। ओटन सिइयाङ ल्योङ इङइङन्या ङा:स्यायाङ तचिइ ठक्क लेऊ, ओटन धन्याबाद यांस्यु ओ बै नकाङल हाल नाएन्या आग्या आयोवाङ। ओटन रुयाङ कैस्यु वाङवाङ, ओटन कैस्यु रा:सयलन्या कलाएयाङ साट वटा घोनल फाङ रासिमौ। नङं छ्योअछ्योअ चार हजार ल्हेपाङ लेवाङ। नकाङजन बिदा यांस्यु, ओटन रां आसिइयाङसं डोङ्गाल चरिस्यु दलमनुथाला जिल्लाल हिन्वाङ।

फरिसीयाङै अचम्मला कामयाङ रानिंन्या

मत्ती १६:१-४

फरिसीयाङ येशु ल्योङ रा: स्यु ओलसं छ्योङौ तअसिवाङ ओटन ओलजन अल्चिऊ नाल्ट ओलसं स्वर्गला तोलोअ अचम्मला कामयाङ नीवाङ।1 आआत्मालन ल्होन्या सअ पलिईस्यु येशुले ऐआढोवाङ, “आका पुस्ताले दानाङ अचम्मला कामयाङ रोंकौ? मछ्यु ङा जेजन पानस्याच्या ईका पुस्ताजन नैज अचम्मला कामयाङ यांन्यामालेसिदी।”2 ओटन ओले बिदा यांस्यु डोङ्गाल चरीउ ओटन हुदिफन्ट हिनौ।

फरिसीयाङ सनर हेरोदल सोडा

मत्ती १६:५-१२

येशुल सिइयाङै रा:सं भरेई होनन्या राम्योकौ, ओटन डोङ्गाल नकाङसं जम्मा तोलोअ याएज भरेई लेऊ। येशुले आसिइयाङजन ऐलेस्यु चेताउनी आयोवाङ, “ब्याएचिते, जे फरिसीयाङलं सोडा सनर हेरोदल सोडातन जोगाइसिच्यो।”3

नकाङ रारांल बिचार ढास्यु पानौ तअसिवाङ, गे सकाए ता भरेई माल्दी, नैताइस्युकने नाले ईका छेन छ्योङज्याऔ ताहाहोला। तब येशुले ओयाङल यिङला छेन सनस्यु ऐआढोवाङ, “गे सकाए भरेई माल्दी? ओमनलेस्यु दानाङ जे छ्योङज्याच्यो? नैति जे अझ बै जेमारङचिऊ? ओटन जेमाबुजिचिऊ? नैति जे यिङ जरन्या ताइस्यु लेऊ। येशुले आसिइयाङजन ऐआढोवाङ, जे म्युउ लेस्यु बै दानाङ मारङच्यो? ना लेस्यु बै दानाङ माथएच्यो? नैति जे दानाङ यांका माढोच्यो?4 जब ङा भरेई पास हजारल नाल्ट ङाकलाएङु, कि जे आकलाए ख्वाए घोन फाङ जेसिम्चिऊ?” नकाङै ओलजन रांढोव, “बारं घोन।”

“ओटन जब चार हजार रुयाङ नाल्ट ङा साट पाटा भरेई ङाकलाएङु, ओटन ख्वाए घोन फाङ जेढुदुचिऊ?” नकाङै ओलजन रांढोव, “साट घोन।”

येशुले नकाङजन ऐआढोवाङ, “ओटन नैति जे अझ बै जेमाबुजिचिऊ।”

बेथसेदालं येशुले मारङन्या रुजन आसबेलौ

नाल छिन्ट नकाङ बेथसेदा रांवाङ, ओटन रुयाङै तोलोअ मारङन्याजन येशु ल्योङ राहोनौ, ओटन नकाजन छुते ऐलेस्यु बिन्ति रांढोव। तब येशुले ना मारङन्याल कुई कोलोअस्यु नङ्गरलन बाहेर आहोनौ, ओटन नकाल म्युउल ठिल्स्यु नकाल यर्त आकुई नाएस्यु नाजन आगिनौ, “नैति नङ कोबाअ नरङनु?”

ओटन नकाले यादेए खिमस्यु ऐलेऊ, “ङा रुयाङजन ङारङ्ङु नकाङ सिङयाङ मनताइन्या रांबाज्यान्या रङज्याङा।” ओटन येशुले फरि नकाल म्युउल कुई आनाटौ, ओटन नाले चान्यासं आखिमौ, ओटन सोगलै जन्तु छरलङ्गै रङौ तअसिऊ। तब येशुले नकाजन ऐढास्यु झिम आपरिङौ, ईका नङ्गर भितर ताहिनन्।

येशुल बारे पत्रुसले ऐआलन्या

मत्ती १६:१३-१६; लूका ९:१८-२१

येशु सनर आ सिइयाङ कैसरिया नेराका फिलिप्पीला नङ्गर देए राहिनज्याऔक, ओले यमल आसिइयाङजन ऐलेस्यु आगिन्वाङ, “रुयाङ नै रांपानौ, ङा काङ्का?” नकाङै जबाक रांयोव, “नकाङ तन काङ्काङै ऐलेवाङ, ‘बप्तिस्मा यांन्या यहुन्ना।’ काङ्काङै एलिया ओटन अपुर अगमबक्ताङ मध्य तोलोअ।”5 तब येशुले रांजन आगिन्वाङ, “तर जे नै जेपान्चिऊ वन, ङा काङ्का?” पत्रुसले जबाक यांस्यु येशुजन ऐआढोव “नङ ख्रीस्ट नल्‌नु।” तब येशुले नकाङजन आबारेङन काङ्काईजन नैज मापानन्या आग्या आयोवाङ।

येशुले आसिन्या भबिस्यबानी आढोव

मत्ती १६:२१-२८; लूका ९:२२-२६

“तब येशुले ह्युउन्या सुरु आढोव, रुल ज़ाल आबस्यक लेया, ओले दानाङ दुख वुरौ, ओटन यहूदी नेताङ, मुख्या पुजाउरोयाङ, सनर शास्त्रीयाङ ओलजन बिकामला यिङस्यु सएरा,” ओटन ना तिन दिन छिन्ट बान्चिस्यु सोया। ऐलेस्यु येशुले ईका छेन छरलङ्गै आपानौ। तर ईका थएस्यु पत्रुसले ओलजन तपोईदेए लाङस्यु आसज्याकौ। तर येशुले वलस्यु आ सिइयाङ लेऊदेए आखिमौ, ओटन पत्रुसजन सज्याअस्यु ऐआढोव, “ऐ सैतान, ङा सामन्दीतन लोए ताहन्ते दानाङभन्या न यिङ परमेस्वर लेऊदेए माल्दी, तर न यिङ रुयाङ लेऊदेए नजाएनु।” तब येशुले आसिइयाङसं हुलजन आलेऊदेए खुल्स्यु नकाङजन ऐआढोवाङ, “काङ्का रु ङाछिन्ट रारां ङप्सिकन ओले ओलजन जै, तामानिऊत्या, ओटन आक्रूस वुरस्यु ङाछिन्ट ग्यालागित्या।6 दानाङभन्या जोले आपरान जोगाहौ रोंकौ नकाले ना गवाइवा, तर जोले ङामि सनर चान्याथाईल नाल्ट आपरान गवाहौ, ना ओले बचाइवा।7 दानाङभन्या रुले सोगलै जगत डोटौकन बै आपरान गवाहौ कन ओलजन नै फाइदा ताहौका? अथाबा रुले आपरानल पोत नैति यांऔ आढुदुऊका, यदि जो काङ्काईबै ईका ब्यबिचारी पापी पुस्ताङलं खार्ल ङा सनर ङा छेन त जो लाजह, रुल ज़ा बै आबौल महिमा त पबित्र दुतयाङसं रांन्या बेलाक नकाङजन रङस्यु लाजहा।”

Source notes (7)
  1. Cross-reference मत्ती १२:३८; लूका ११:१६
  2. Cross-reference मत्ती १२:३९; लूका ११:२९
  3. Cross-reference लूका १२:१
  4. Cross-reference यर्मिया ५:२१; इजकिएल १२:२; मर्कुस ४:१२
  5. Cross-reference मर्कुस ६:१४-१५; लूका ९:७-८
  6. Cross-reference मत्ती १०:३८; लूका १४:२७; यहुन्ना ६:६८-६९; ८:३४
  7. Cross-reference मत्ती १०:३९; लूका १७:३३; यहुन्ना १२:२५

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.