Skip to content
BibleKenya

Sheshi Kham

मर्कुसं 7

सेरयाङल सिक्छ्या

मत्ती १५:१-२०

यरुशलेमङन रांन्या वाला ख्वाए फरिसीयाङ सनर शास्त्रीयाङ येशु ल्योङ चारवरङन दुउसिवाङ। येशुल ख्वाएयाए आसिइयाङै यहूदीयाङल परम्परा अनुसार जुठुउ अथाबा राकुई, माहुरस्युई भरेई राकैज्यान्या रांरङौ। दानाङभन्या फरिसीयाङ सनर स्वाट्टै यहूदीयाङ ऐकन्ता चलनजन मानिस्यु जब समन चान्यासै कुई माहुररं तब समन ज्यान्या माज्योरदी। ओटन बजारङन जो होन्‌रकन बै कुई माहुरसिस्यु माज्योरदी, ओटन ऐटाइन्या भ्याई परम्परा मानिरा, खुरी, फुरसला, कासालं ताम्बाल, जायाङ मान्जिन्या चलन। ऐताइस्यु फरिसीयाङ सनर शास्त्रीयाङै येशुजन रांगिनौ, न सिइयाङ रां शाखापुर्खाङै रांमानिन्या चलन दानाङ मामानिर, तर जुठुउ कुईले ज्योज्यारा। 1

तब नकाङजन येशुले ऐआढोवाङ, “यशैया भबिस्यबक्ताले जे घुर्बीयाङल बारेङन ठिक ऐलेस्यु भबिस्यबानी आढोव, जोमनताइन्या सरसिस्यु ले। ‘ईका रुयाङै याह्‌ले ता आदर ऐढोरा, तर नकाङ यिङ ङातन लोए लेया। (यशैया २९:१३) नकाङ दाङजै ङामि आराधना ढोरा, तर नकाङल सिक्छ्या रुयाङै राह्युउन्या मेसा याएज ज्या।’ दानाङभन्या परमेस्वरलं आग्याजन राइस्यु रुयाङल चलन मानिरा।” येशुले नकाङजन ऐआढोवाङ, “जे जेमी चलन मानिउ नाल्ट, परमेस्वरलं ‘आग्याजन ख्वाए माचान्यासं जेतारिचिऊ।’ दानाङभन्या मोशाले ब्यबस्था अनुसार ऐलेऊ, जेअमा-जेबौयाङजन आदर ढोचिते ओटन जोले आमा-बौल बिरोद ढास्यु माचान्या छेन छ्योङ, नाजन पक्का सएन्याई ताहा।2 तर जे ऐलेच्या, कि यदि काङ्काङै आबौ या आअमासं ऐले। जो-ज्वाए नङजन ङा ङाव्एनु नका बलि ज्या (नकाल अर्थ ना परमेस्वरजन चराहौमन) ज्या, नैताहकन नाजन आअमा या आबौल नाल्ट फरि नैज सेवा ढाऔ मायोचिदी। ऐलेस्यु जे ढास्यु जेरांन्या, चलनङजन कायम नाएस्यु परमेस्वरलं बचनदेए यिङ मायोचिदी। ओटन ऐटाइन्याई कामयाङ ढोच्या।”

रुजन जुठुउ जाएन्या छेन

मत्ती १५:१०-२०

तब येशुले रुयाङल हुलजन आल्योङ खुल्स्यु नकाङजन ऐआढोवाङ, “जे सोगलैले ङा छेन थएचिते ओटन बुजिचिते। ऐटाइन्या नैज जन्तु माल्दी बाहेरलन भितर पसिस्यु जो रुल भितर कोलोअस्यु अशुद्द जाएन्या, तर रुङन बाहेर पलिईन्या छेनलेईज रुजन अशुद्द जाएवा। जोलं थएन्या ना ले नकाले ग्याथटौत्या।”3 जब ओले रुयाङजन बनाएस्यु झिमल रांऔ, तब आसिइयाङै ईका आहानल बारेङन रांगिनौ। येशुले नकाङजन ऐआढोवाङ, “नैति जे अझ बै जेमाबुजिचिऊ?” जो बाहेरलन रुल भितरलं पसि नाले रुजन जुठुउ माजाटौडी।

दानाङभन्या ना आयिङल माङडी, तर भन्दिउल हिना, ओटन बुललन बाहेर पलिहा। नैति जे जेमासन्चिऊ, (येशुले सोगलै ज्यान्या जन्तुजन चोखा ज्या ऐलेस्यु आपानस्योवाङ।)

ओटन येशुले ऐलेऊ रु ल्योङन जो पाखाल पलिह नकाईले रुजन जुठुउ जाएवा। दानाङभन्या भितरङा, अथाबा रुल यिङलन माचान्या बिचार, ब्यबिचार, कुन्या, सएन्या, छुट्टै मेएमा खिमन्या, लाबि, घुर्बी, छलिन्या, छडवा, खिई, बाएढान्या, गिलल्याइन्या, घमन्डी, मुर्खी ऐटाइन्याङ पलिइरा। ईका सोगलै माचान्या छेनयाङ भितरङन पलिइरा, ओटन रुजन जुठुउ जाएरा।

सिरिया-फोनिकेला मेएमाल बिस्वास

मत्ती १५:२१-२८

फरि येशु नङंन सोस्यु टुरोस सनर सिदोनल सान्ढल हिनस्यु, तोलोअ झिमल पसिऊ। ओटन ईका छेन काङ्काईले तासनरत्या ऐलेऊ, तर ओलजै मोअसिऊ माढुदुडा। ना बेला तोलोअ मेएमाले आबारेङन थएस्यु आनाटौ, ओटन नका रा:स्यु येशुल खङल धोक आयोव, दानाङभन्या नकाल मेएमाआज़ाल ल्योङ दुस्टआत्मा लेऊ। ना ग्रीक मेएमा ओटन सिरियाल फोनिकेला पोल जर्मिन्या हो, नाले येशु सकाए ऐलेस्यु बिन्ति आढोव, कि मेएमा ङाज़ा ल्योङन दुस्टआत्मा पलिइस्योते। येशुले नाजन जबाक आयोव, “पहेला लुलल्याङजन वाङौ योंवरते, दानाङभन्या ईका ठिक माङडी लुलल्याङ भरेई न्हानस्यु कांयाङजन क्याइस्यान्या ठिक माङडी।” तर नकाले येशुजन ऐआढोव, “औ, प्रभु, तर कांयाङै बै ता लुलल्याङै टेबल न्युउ रा:सतेईन्या टुक्राङ कैरा सा।” येशुले नकाजन ऐआढोव, “नङ ऐनलेऊकाले ज नझिम हिनन्ते। न ज़ा ल्योङन भूत पलिईस्यु हिन्दा।” जब ना आझिमदेए हिनौ, आज़ा चारपाई त आरुउज्यान्या आडोएनाङौ, ओटन नका ल्योङन भूत पलिईस्यु हिनस्यु लेऊ।

येशुले भैरा सनर या माछ्योङन्या रुनेंजन आसबेलन्या

टुरोसला पोलन पलिईस्यु येशु सीदोनलन ताइस्यु डेकापोलिस4 सहरला सान्ढल खार्लन ताइस्यु गालील समुन्दर हिनौ। रुयाङै नङं तोलोअ भैरा सनर तोलोअ माछ्योङन्या वाला रुनेंजन येशु ल्योङ राहोनौ, ओटन ओयाङै नकानेल यर्त कुई नाएस्योवनेते, लेस्यु ओलजन बिन्ति रांढोव। येशुले नकानेजन हुललन अलक्कै पोल लाङस्यु भैरालं नांल कुईसैले आछुउ ओटन ओलं छिन्क माछ्योङन्या वालाल ल्हेल ठिल्स्यु आछुउ। ओटन नमदेए खिमस्यु ल्होन्या सअ हिनस्यु नाजन आढोव, “इफ्फाता,”5 इकाल अर्थ “फएसिन्ते।” ओटन नवाए बेलाई नकाल ना थहौ, ओटन नकाल ल्हेल बन्दन पलाअसिऊ, ओटन नका फत्कारस्यु छ्योङौ तअसिऊ। “तब येशुले ऐलेऊ, ईका काङ्काईजन तापानस्योचिनर” ओमनलेस्यु येशुले नकानेजन आठाकौने। तर ओले ज्वाए तापान्चिन ऐआढोवने, जन भ्याई प्रचार ढाऔ तअसिऊने। रुयाङ भ्याई अचम्म ताइवाङ, ओटन पानौ तअसिवाङ, “इकाले जो आढोव चान्याई आढोव, ओटन नाले भैराजन थएन्या सनर माछ्योङन्याजन छ्योङन्या सक्ति आयोवने।”

Source notes (5)
  1. Cross-reference यशैया २९:१३
  2. Cross-reference प्रस्थान २०:१२; ब्यबस्था ५:१६; प्रस्थान २१:१७; लेवी २०:९
  3. Footnote ईका पदला बचन काङ्का-काङ्का ग्रीक हस्तलिपिल जाई डोएसिया
  4. Footnote देकापोलिस=१०सहर बराबरला पो
  5. Footnote इफ्फाता=फएसिन्ते=आरामि भासा

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.