Skip to content
BibleKenya

Sheshi Kham

मर्कुसं 11

यरुशलेम सहरल येशु आरांन्या

मत्ती २१:१-११; लूका १९:२८-४०; यहुन्ना १२:१२-१९

जब येशु सनर आ सिइयाङ यरुशलेम सहरल नेरा जैतुन डान्डाल वङल बेथफागे सनर बेथानियाला पोल रांवाङ, तब येशुले आ सिइयाङ तन नेंलोअजन ऐढास्यु आपरिङौने, ओटन ओयाङजन ऐआढोवाङ, “झेन सामन्दीला नङ्गरल हिन्चिन्ते ओटन झेन बाज्याऔ बाज्याऔकै आकअ समन काङ्काई रु आमाचरिन्या तोलोअ गडाहाल पुङ डोएचिना। नाजन पलाअस्यु आङ होन्चिन्ते। काङ्का रुयाङै झेनजन ‘दानाङ पलाअज्याचिन?’ ऐढाचिनरकन, ‘प्रभुजन इकाल आबस्यक लेऊ, ओटन नाजन छिटैज होलस्यासिना ऐढोचिन्ते।’” तब नकाने हिनौने, ओटन झिमल पाखाङा झलापल लेऊक सुरसिज्यान्या गडाहाल पुङ नेंडोटौ, ओटन नकाजन पलाअङा नेंलिज्याऊक। नल च्याङज्यान्याङ तन काङ्का-काङ्काङै नकानेजन रांगिनौ, “गडाहाल पुङजन दानाङ पलाअस्यु नै ढोङा झेनलेचिनु?” येशुले ओनेजन जोमन आढोवने, ओनेले ओमनजै नेंढोव, ओटन नानेजन पलाकौ रांयोव। नकानेले गडाहाल पुङजन येशुल ल्योङ नेंहोनौ, ओटन नें क्वा नकाल यर्त नेंनाटौ, ओटन येशु नकाल यर्त चुङौ। येशुजन सम्मान ढाऔ नाल्ट तबर रुयाङै रांक्वायाङ यमल राथुङौ, ओटन अपुऱ्याङै बाङलन हाङ्गा पलस्यु स्याऊला राथुङौ। ओटन ओलं हा-हा बान्या वालाङ सनर छिनछिन-छिनछिन रांन्या वालाङै ऐलेस्यु जयजयकार लेवाङ, “होसन्ना बअचान्या ना जो परमप्रभुल मिनतन रांन्याजन!1 बअचान्या ग्याताइत्या, गे शाखा दाऊदल ना रांन्या वाला राज्य, परमधामल होसन्ना!” येशु यरुशलेम सहरल रा:स्यु मन्दिर भितरलं पसिऊ। ओटन ओले हुङा आङा सोगलै जन्तुदेए ब्याएबिई आढाज्याऔक कुबिला आताहौकाले, बारैं गोटा सिइयाङजन ओलसं लाङस्यु बेथानिया हिनौ।

येशुले ड्यूजन सराप आयांन्या

मत्ती २१:१२-१७; लूका १९:४५-४७; यहुन्ना २:१३-१६

छिन्काछिम येशु आ सिइयाङसं बेथानियाङन राराज्याऔ बेला येशु करेव। ओटन लोएतन ल्हापटा कै ल्हापटा लेन्या तोलोअ ड्यूल टुङ रङस्यु किगर्दाङ नकाल किगर्दाङ आजाए डोएसिऊसन लेन्या यिङस्यु हिनौ, तर नङं तापा पाइना येशुले ड्यूलटुङल ल्हापटायाङ बाहेक अपुर नैज माडोएदा, दानाङभन्या नकाए बेला शैन्या साहा माङडी। तब येशुले ड्यूल टुङजन ऐआढोव, “आब आटनपार काङ्काईले नजाए ताज्योरत्या।” ओटन ईका आपानौ बेला आसिइयाङै राथटौ।

येशु मन्दिरलं आहिनन्या

मत्ती २१:१२-१७; लूका १९:४५-४८; यहुन्ना २:१३-२२

ओटन यरुशलेम सहरल ताप्‌रा पाइनाई येशु मन्दिर भितरलं हिनौ, ओटन मन्दिरलं लङन्यावालाङ यएन्या वालाङजन पाखाल आपलिइवाङ ओटन रुप्या होनन्या यांन्या वालाङल देस्कयाङ सनर परेवा यएन्याङल चुङन्या चुन2 आपल्ताइस्योवाङ। ओले काङ्काईजन बै नैज जन्तु मन्दिरलन लाङस्यु हिनौ मायोदुऊरा। ओटन ओले सिक्छ्या आयांज्याऔक ऐलेऊ, “नैति पबित्र शास्त्रल ऐटाइन्या मासरसिज्याऔ, ङा झिमजन सोगल सङ्सारला जातियाङल नाल्ट प्रार्थनाल झिम कहलाइसिया? तर जे ता इकाजन गोएयाङ डाङ्काङल अड्डा जाएस्यु नाएच्या।”3

येशु आराधना झिमल हिनौ

ओटन मुख्या पुजाउरो सनर शास्त्रीयाङै ईका थएस्यु येशुजन कैलेस्यु नस्ट जाटै लेस्यु दाउ रोंकौ तअसिवाङ। दानाङभन्या नकाङ ओलसं छ्याएवाङ, दानाङभन्या सोगल हुल ओलं सिक्छ्यात अचम्म ताइस्यु लेवाङ। ओइ आताहौ पाइना येशु सनर आ सिइयाङ यरुशलेम सहरलन बाहेर हिन्वाङ।

राङन्या ड्यूल टुङ्ङन छेन ह्युउसिन्या

मत्ती २१:१८-२२

तयोअका छिम्क छकाल्या ओङंन पहेलाकाई यम ताइस्यु हिनज्यावाङ, ओयाङै नका ड्यूल टुङजन रिंनङन जै पुरै आराङज्यान्या रांरङौ। ओटन पत्रुसजन हाका छिम्का छेन यांका रांऔ, ओटन नाले येशुजन आपानस्योव, “औ गुरु4, खिम्ते नङ सराप नयांन्या ड्यूल टुङ ता राङदा रैस।”

येशुले सिइयाङजन जबाक यांस्यु ऐआढोवाङ “परमेस्वरतं बिस्वास नाएचिते। ङा जेजन मछ्यु ऐढाच्या, यदि काङ्काङै रायिङल सङ्का माढास्यु ङायिङन्या पुरा ऐताहा लेस्यु बिस्वास ढास्यु ईका डान्डाजन ‘भोइस्यु नङ समुन्दरल तेहन्ते’ ऐढोवकन, नकाल नाल्ट नैज ताइन्यालेया।5 ऐताइस्यु ङा जेजन ऐढाच्या, प्रार्थनात जो नीच्यो ना डोएस्यु लेच्या, ऐलेन्या बिस्वास नाएचिते, ओटन ना जेमिई ताहा। जब जे प्रार्थना ढान्याल नाल्ट च्याङच्यो, तब काङ्काङै बिरोदल जेमि कोबाअ छेन लेकन छेमा नीचिते, ताकि स्वर्गल लिज्यान्या वाला जे बौले जेअपराद छेमा ग्याढोउत्या।6 7तर जे छेमा माढोच्योकन स्वर्गला लिज्यान्या जे बौले बै जे अपरादयाङ छेमा ढान्यामाल्दी।”

येशुल अधिकारल बारे गिन्

मत्ती २१:२३-२७; लूका २०:१-८

येशु सनर आ सिइयाङ फरि यरुशलेम सहरल रांवाङ। ओटन येशु मन्दिरलं हुदेए अदेए आबाज्याऔक मुख्या पुजाउरोयाङ, सनर शास्त्रीयाङ, ओटन आल्योङ रांवाङ। नकाङै येशुजन रांगिनौ, “नङ ईका काम नै अधिकारले नढोनु? ईका काम ढाऔ नाल्ट नङजन काङ्काले अढिकार आयानु?” येशुले नकाङजन ऐआढोवाङ, “ङा जेजन तोलोअ गिनच्या, ओटन जे नकाल उत्तर यिङचिते, ङा नैति अढिकारले ईका काम ङाढोङु, ना जेजन पानस्याच्या। यहुन्नाल बप्तिस्मा सुरुक स्वर्गङन ताहौ, सन् रुल तरफङन ताहौ, ङाजन जबाक यांङचिते।”

तब नकाङ रारांल ऐलेस्यु छ्योङौ तअसिवाङ, “यदि ‘स्वर्गङन’ ऐलेईकन नाले गेजन ऐढाइवा, नैताहकन यहुन्नाजन बिस्वास दानाङ माढोच्योवन। ओटन यदि गे ‘रुङन’ ऐलेईकन” रुयाङलै छ्याइ लेया। दानाङभन्या सोगलै सनस्युईलेरा, यहुन्ना मछ्युकाई अगमबक्ता ज्या लेस्यु। तब नकाङ येशुजन जबाक यांस्यु ऐलेवाङ, “गे मासनैदी।” येशुले नकाङजन ऐआढोवाङ, “ङा बै नै अढिकारङन ईका काम ङाढोङु, ना जेजन मापानस्याचिदी।”

Source notes (7)
  1. Cross-reference भजनसङ्ग्रह ११८:२५-२६
  2. Footnote टेबल=देस्क;
  3. Cross-reference यशैया ५६:७; यर्मिया ७:११; लूका १९:४६
  4. Footnote रब्बी=गुरु
  5. Cross-reference मत्ती १७:२०; १कोरिन्थी १३:२
  6. Cross-reference मत्ती ६:१४-१५
  7. Footnote ईका बचन ग्रीक हस्तलिपिल जाई सरसिन्या लेया

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.