Sheshi Kham
मर्कुसं 10
येशुले जोरापाराङ भाअसिइ बारे आह्युउन्या
मत्ती १९:१-९
फरि येशुले कफर्नहुमङन यहूदाला पो सनर यर्दन भईल अदिफन्ट रांऔ, ओटन रुयाङ हुल आल्योङ दुउसिवाङ, ओटन आचलन अनुसार नकाङजन सिक्छ्या यांऔ तअसिऊ। फरिसीयाङ आल्योङ रा:स्यु ओलजन अल्चिस्यु रांगिनौ, नैति काङ्का ल्हेपाले आमेएमाजन ब्यबस्थालं नियाम अनुसार राइन्या ठिक लेऊ? येशुले नकाङजन जबाक यांस्यु ऐआढोवाङ, “मोशाले जेजन नैति ढोचिते आढाचिऊ, अथाबा आग्या सरस्यु आयांचिऊ?” नकाङै ऐराढोव, “तोलोअ राइन्या कागस सरस्यु आमेएमाजन राहौ ढुदुवा, ऐलेस्यु मोशाले आग्या यांसिऊ नाएवा।”1
तर येशुले नकाङजन आढोवाङ, “चिमत्या जे यिङले गर्दा मोशाले ईका आग्या सरसिऊ आयांचिऊ। पबित्र शास्त्रल सरसिन्या लेया, स्रिस्टील सुरुकन्ज परमेस्वरले नकानेजन ल्हेपा सनर मेएमा आजाटौने।2 ऐताइस्यु रुले आबौ सनर आअमाजन राइस्यु आमेएमास मिलिस्युई लिज्याया,3 ओटन ना नेंलोअ तोलोअ बुलमन्जै ताइन्या।स ऐताइस्यु आब इकाने नेंलोअ माङडी, तोलोअ जै बुल ज्या। ऐताइस्यु परमेस्वरले जोजन तचोएकै आजोऱ्याहौने, नकानेजन काङ्काई रुले ताछुत्याहौनेत्या।” झिमल रारां पाइनाई सिइयाङै फरि ईका बारेल येशुजन रांगिनौ। येशुले नकाङजन ऐआढोवाङ, “जोले आमेएमाजन राइस्यु छुट्टै सकाए ब्याहा ढोव, नकाले ओलं बिरोद त ब्यबिचार ढोवा।4 ओटन यदि आमेएमाले आयोजन राइस्यु छुट्टैसं ब्याहा ढोव कन नाले बै ब्यबिचार आढोव ज्या।”
येशुले लुलल्याङजन आशिर्बाद आयोवाङ
मत्ती १९:१३-१५; लूका १८:१५-१७
ख्वाए रुयाङै इङन्या लुलल्याङजन येशुले रांयर्त आकुई नाएस्यु आशिर्बाद ग्यायौरत्या ऐलेस्यु आल्योङ राहोनौ, तर सिइयाङै नकाङजन राहप्काहौ। तर ना रङस्यु येशुल रिउ उठिऊ, ओटन नकाङजन आढोवाङ, “इङन्या लुलल्याङजन ङाल्योङ रांऔ योंचिरते, नकाङजन तारुखिचिर, दानाङभन्या परमेस्वरलं राज्य ऐटाइन्याङ लै ज्या। ङा जेजन मछ्यु ऐढाच्या, जोले परमेस्वरलं राज्यजन तोलोअ इङन्या बालअलेमन ग्रहन माढोव, नका खकै नका भितरलं पसिऊ माढुदुऊदी।”5 ओटन येशुले नका लुलल्याङजन घोनल हिनस्यु रांयर्त आकुई नाएस्यु आर्शिबाद आयोवाङ।
तोलोअ धापा साहू रु सनर स्वर्गला राज्य
मत्ती १९:१६-३०; लूका १८:१८-३०
येशु यमल आबाज्याऔक, सामन्दी तोलोअ रु चोएस्यु रांऔ, ओटन आहाक घुन्डा टिकिस्यु नाले आगिनौ, “औ, चान्या गुरु, अनन्त जिबन डोटौ नाल्ट नै ढान्या ताहौ।” येशुले नाजन ऐआढोव, “नङ दानाङ ङाजन चान्या गुरु ऐढाङ? तोलोअ याएज परमेस्वर बाहेक अपुर काङ्काई चान्या माल्दी। नङ आग्याङ ता ऐसन्ना, हत्या ताढो, ब्यबिचार ताढो, ताकु, ग्वारस्यु साचीबयन तायों, जालझेल ताढो, न बौ सनर नअमाजन आदर ढोवनेते।”6
ओटन नकाले येशुजन ऐआढोव, “औ गुरुज्यू, आका सोगलै ता ङा ङा धापा ङालेऊकन्जै मानिउयन ढास्यु ङारांङु हो।” येशुले नका यर्त नजर लाइस्यु, नकाजन प्रेम आढोव, “नङजन अझ तोलोअ छेनल कमि लेऊ। हिनन्ते ओटन नमी ज्वाए धनसम्पत लेऊ, नका सोगलै यएस्यु गरिबयाङजन योंवरते, ओटन नङजन स्वर्गला धन यांन्या लेसिया। ओटन रा:स्यु ङा छिन्ट लागिन्ते।” तर ईका छेनले नकाल भेसतं च्याऊऱ्याचिऊरि ताहौ, ओटन नाले दुख मानिस्यु हिनौ, दानाङभन्या नका सकाए भ्याई धन-सम्पत लेऊ। ओटन येशुले चारवर ब्याएस्यु आसिइयाङजन ऐआढोवाङ, “धनत भरमानिन्या साहूयाङजन परमेस्वरलं राज्यल हिनन्या ख्वाए खाव।” येशुले आपानन्या ईका छेनत आसिइयाङै अचम्म रामानिऊ। तर ओले नकाङजन ऐआढोवाङ, “ऐ लुलल्याङ, परमेस्वरलं राज्यल पसिन्या ख्वाए खाव। साहू रुजन परमेस्वरलं राज्य भितर पसिऊ भन्या ता बरु व्पल नाईल ऊट पसिन्या सजिलो लेया।” येशुल आ सिइयाङ भ्याई अचम्म ताइवाङ, ओटन रारांल ऐलेवाङ, “ना ताहकन्ता काङ्का बान्चिऊ ढुदुऊ।” येशुले नकाङजन खिमस्यु ऐलेऊ, “रुयाङल नाल्ट ता आका अचम्मलाइ लेया, तर परमेस्वरलं नाल्ट माल्दी दानाङभन्या परमेस्वरलं नाल्ट सोगलै छेन सम्भब लेया।” पत्रुसले ओलजन ऐआढोव, “खिम्ते, गे सोगलै जन्तु राइस्यु, नछिन्ट लागिस्यु लेया।” येशुले ओमनलेऊ, “मछ्यु ङा जेजन ऐढाच्या, कि ऐटाइन्या काङ्काई माल्दी जोले ङा नाल्ट सनर चान्याथाईल होटै झिम या दाज्यूभाई या दिदीबैनाङ या आमा-बौ या लुलल्याङ ओटन येङखेए राहौ, ओटन आकाई बेला नाले भ्याईज डोएवा, ना सय गुना तबर झिम दाज्यू भाईयाङ, दिदीबैनाङ, आमा-बौयाङ, ज़ायाङ, सनर येङखेए ओटन नकाले ओसकाएज दुख बै भोघिवा, ओटन रांन्या वाला दिनल नकाले अनन्त जिबन डोएवा। ओटन भ्याई जोयाङ हादेए लिज्यार, नकाङ छिन्ट ताइन्यालेरा, ओटन जो छिन्ट ताइज्यार, नकाङ हादेए ताइन्यालेरा।”7
येशुले ओलं आसिन्या बारेल तिनपाला आछ्योङन्या
मत्ती २०:१७-३४; लूका १४:३१-३३
येशुल सिइयाङ यरुशलेम हिनन्या यमल लिज्यावाङ, ओटन येशु नकाङल हा-हा हिनज्याऔ। आ सिइयाङ अचम्मै ताइवाङ, ओटन अपुर छिन्ङन राज्यान्याङ छ्याएवाङ। तब ओले बारं आसिइयाङजन आलेऊदेए होन्सिऊ आयर्त रांन्या वाला छेन ओयाङजन आसथएवाङ। येशुले आसिइयाङजन ऐआढोवाङ, “थएचिते, गे यरुशलेम सहरदेए गेहिनज्यायिउ। नङ ङाजन मुख्या पुजाउरोयाङ सनर शास्त्रीयाङ गैरयहूदीयाङल8 कुईत जिम्मा यांन्या लेरा, ओटन नकाङै ङाजन सिन्या सजाय यांन्या लेरा। नकाङै ङाजन गिलल्याहङरा, ओटन ङाजन ठिलङरा, ङाजन कोर्लाले स्वापङरा, ओटन ङाजन सतङरा। ओटन तिन दिन छिम्क ङा फरि बान्चिस्यु सोन्यालेङा।”
याकूब सनर यहुन्नाल बिन्ति
मत्ती २०:२०-२८
जब्दियाल नेंलोअ आज़ाने, याकूब सनर यहुन्ना येशु ल्योङ रा:स्यु ऐलेऊने, “गुरुज्यू, घोन नङसं जो नीच्यो ना नङ घोन नाल्ट ढास्यासिन्ते ऐलेन्या घेनमि इच्छ्या लेऊ।”
येशुले नकानेजन आगिनौने, “झेन नाल्ट ङा नै ढोङ झेन नै झेनचाहिचिनु?”
नकानेले जबाक नेंयोव, “नमी राज्यल नमहिमाला मुकुट सकाए नचुङौक, घोन घेनरोअचिऊ कि घोन तन तोलोअजन नदाइन्याङन ओटन तोलोअजन नदाबऱ्याङन चुङौ नाल्ट मन्जुरी यांसिन्ते।”
तर येशुले नकानेजन ऐआढोवने, “झेन नै झेननीचिनु, ना झेन मासन्चिन्दी। नैति ङा जो खुरीलन ओङा ङालज्याङु, नलन झेन ओव झेनढुदुचिनु? अथाबा जो सिन्या बप्तिस्मा ङा होन्ङा ङालज्याङु, नैति झेन ना बप्तिस्मा होनौ झेनढुदुचिनु?”9
नकानेले ओलजन ऐनेढोव, “घोन ऐढुदुच्या,” येशुले नकानेजन आढोवने, “जो खुरील ङा ओङ, ना झेन बै ओचिना, ओटन जो बप्तिस्मा ङा ङाहोन्ङु। ना बप्तिस्मा झेन होन्चिना। तर ङामि दाइन्या ङन सनर ङा दाबऱ्या ङन सचुनन्या ता ङा माङडी, इकाता जोल नाल्ट तयार ताइस्यु ले, ओलं नाल्ट जाई परमेस्वरले तयार जाएस्यु नाएवा।”
ईका थएस्युकने दसगोटाई सिइयाङ याकूब सनर यहुन्ना सकाए रायिङचोव। 10 ओटन येशुले नकानेजन आल्योङ खुल्स्यु ऐआढोवाङ, “जेजन थाहै लेया कि गैरयहूदीयाङयर्त शासक ढान्याङै नकाङयर्त अढिकार चलाइरा, ओटन अगवाङस पुरा अढिकार लेया। जे भितरलं ऐताहौ मापरिऊ, जे तन जोले घिन्या ताइन्या यिङ ढोव, ना जेमि सेवाऱ्या ताहा।11 ओटन जे जोले हादेए ताइन्या यिङ ढोव, नका सोगलैल सेवाऱ्या ताइन्या लेया। दानाङभन्या ङा रुयाङ ल्योङन सेवा डोएन्याल नाल्ट माङडी, तर सेवा ढान्याल नाल्ट ङारांङु हो, ओटन भ्याई रुयाङल छुटकाराल नाल्ट ङा बलिल येए पुरा जाटौ नाल्ट ङा परान ङायाराङु।”
येशुले म्युउ मारंनन्या बारतिमैजन आसबेलन्या
मत्ती २०:२९-३४; लूका १८:३५-४३
येशु सनर आ सिइयाङ यरीहोल रांवाङ, ओटन रुयाङल घिन्या हुल सकाए यरीहोङन रापलिइज्याऔक तिमैल ज़ा बारतिमै, तोलोअ मारङन्या बयानीन्या यमवङल बया नीज्याव। जब नकाले ओ नासरतला येशु ज्या ऐरालज्यान्या आठटौ, तब जोरसै कलिऊस्यु ऐलेऊ तअसिऊ “औ येशु, दाऊदल ज़ा, ङाजन दया ढाङते।”
तब भ्याईले नकाजन सज्याअस्यु छपक्कै दिङन्ते रांढोव। तर नकाजन अझै जोरसं कलिकौ तअसिऊ, “औ दाऊदल ज़ा, ङाजन दया ढाङते।”
तब येशु ठअ अदिउ ओटन ऐआढोवाङ, “नकाजन खुल्चिते।” ओटन नकाङै ना मारङन्याजन ऐलेस्यु रांखुलौ, “गाएगुइ तालेन सोन्ते येशुले नङजन खुलज्याऔ।”
ओटन नकाले आमि बाहेऱ्या खाइटो क्याइस्यु ना जरू सोव ओटन येशुल ल्योङ रांऔ।
येशुले नकाजन ऐआढोव, “नङ नै नरोअनु, ङा न नाल्ट नै ढोङ? ना मारङन्या रुले ऐलेऊ, औ रब्बी, ङा रङौ ग्याडोटङत्या।”
ओटन येशुले नकाजन ऐआढोव, “न यमल बान्ते। न बिस्वासले नङजन सबेल्दुन्वा।” ओटन ओचोएटै नकाले आरङौ ओटन यमल येशुल छिनछिन बाऔ तअसिऊ।
Source notes (11)
- Cross-reference ब्यबस्था २४:१-४; मत्ती ५:३१
- Cross-reference उत्पत्ति १:२७; उत्पत्ति ५:२
- Cross-reference उत्पत्ति २:२४
- Cross-reference मत्ती ५:३२; १कोरिन्थी ७:१०-११
- Cross-reference मत्ती १८:३
- Cross-reference ब्यबस्था ५:२०; प्रस्थान २०:१२; ब्यबस्था ५:१६
- Cross-reference मत्ती २०:१६; मर्कुस १३:३०
- Footnote गैरयहूदी=अबिस्वासी
- Cross-reference लूका १२:५०
- Footnote लूका २२:२५,२६गैरयहूदी=गैरयहूदी
- Cross-reference मत्ती २३:११; मर्कुस ९:३५; लूका २२:२६
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.