Sheshi Kham
यहुन्ना 7
येशु सनर आभाईयाङ
ओलं छिन्ट येशु गालीलल बारिज्याऔ, तर ओलं यहूदिया हिनौ माचाहिदा, दानाङभन्या यहूदी अढिकारीयाङ ओलजन सएन्या दाउत लेवाङ। आब यहूदीयाङल छाप्रा-बाईपोल पर्ब नेरा लेऊ।1 नैताइस्यु येशुल भाईयाङै ओलजन ऐराढोव, “ईका पो राइस्यु यहूदिया हिनन्ते, ओटन नङ नढाज्यान्या काम नसिइयाङै बै ग्यारङरत्या। जो रुले मान डोटौ रोंकौ, नाले गोप्यल काम माढोवदी। नङ आका कामयाङ ढोनकन नङझन्जै सङ्सारलं थन्ते।” दानाङभन्या आभाईयाङ बै ओजन बिस्वास माढोरदी। येशुले नकाङजन ऐआढोवाङ, “ङामि चान्या समाय अझ रा:स्यु माल्दी, तर जे नाल्ट ता सोगलै समाय चान्याई लेया। जेजन सङ्सारले सज्युउ माढुदुऊदी, तर ङाजन ता सज्युङरा, दानाङभन्या सङ्सारला बारेल नाल कामयाङ दुस्ट लेवाङ, ऐलेस्यु ङा बयन योंङा। आका पर्बल जे हिन्चिते। ङा ईका पर्बल माहिनङदी, दानाङभन्या ङा समाय अझ पुरा ताइस्यु माल्दी।” नकाङजन ऐढास्यु येशु गालीललै लिज्याऔ।
छाप्रा पर्बल येशु
तर पर्ब छिम्क भाईयाङ हिन्रा पाइना येशु बै थनसिस्यु माङडी, तर गोप्यल हिनौ। पर्बल यहूदी अढिकारीयाङै येशुजन रोअज्यावाङ, ओटन “येशु काङ लिज्याऔ?” ऐलेस्यु गिनज्यावाङ।
रुयाङ हुलल खार्ल आबारेल चर्चा ताहौ लागिऊ। काङ्काङै ऐलिज्यावाङ, “ओ चान्या लेया।” फरि अपुऱ्याङै ऐलिज्यावाङ, “माङडी, इकाले रुयाङजन भरमल पराइज्याऔ।” तर यहूदी अढिकारीयाङल छ्याइले येशुल बारे काङ्काई खुल्लमखुल्ला माछ्योङदुरा।
पर्बल खार्ल येशु यरुशलेम मन्दिर भितर हिनस्यु सिक्छ्या ह्युउकौ तअसिऊ।
यहूदी अढिकारीयाङ अचम्म ताइस्यु ऐराढोव, “नैज मापरीस्यु इकाले कढाई आवाए बिद्या आडोटौ।” तब येशुले जबाक यांस्यु नकाङजन ऐआढोवाङ, “ङा सिक्छ्या ङामिइ माङडी, तर परमेस्वरङन्ता हो, जोले ङाजन आपरिङ्ङु। यदि काङ्का रुयाङै परमेस्वरलं इच्छ्या पालन धोरकन, ङासिक्छ्या परमेस्वर ङन्ताङन, सन् ङा तरफङन ऐलेस्यु नकाङै सनन्यालेरा। जोले आतरफङन छ्योङ, ओले सम्मान रोअवा, तर जोले ओलजन परिङन्याल सम्मान रोंकौ, ना सत्य लेया, सनर नका ल्योङ छल माल्दी। ओक्या मोशाले जेजन ब्यबस्था आमायांचिऊ? तर जे काङ्काईले ना ब्यबस्था पालन माढोचिदी। जे दानाङ ङाजन सएन्या कोशिस ढाज्याच्यो?” रुयाङै जबाक रांयोव, “नङ दुस्टआत्मा लागिस्यु नल्नु। नङजन काङ्काले सटौ रोअज्याऔ?”
येशुले जबाक यांस्यु नकाङजन ऐआढोवाङ, “ङा तोलोअ अचम्मला काम ङाढोङु, ओटन जे सोगलै इकातं अचम्म जेमानिचिऊ। मोशाले जेजन खटनाल नियाम आयांचिऊ, (तब बै ना मोशाल तरफङन ता माङडी, तर जे पुर्खाङन हो), ओटन बै फरि शबाथ-छिम्क जे ल्हेपाङल खटना ढोचिरा।2 यदि जोले मोशाल ब्यबस्था भङ्ग ताटाइत्या लेस्यु, शबाथ-दिन छिम्क खटना ढोवकन, ङाजन तोलोअ रु शबाथ-दिन छिम्क आसबेलौ ऐलेस्यु, जे ङासकाए जेयिङ चोन्या?3 अनवार खिमस्यु निया ताढोच्यो, तर ठिकसं निया ढोचिते।”4
नैति नका येशुका रों
यरुशलेमला ख्वाएयाए रुयाङै ऐलेवाङ, “नैति ईका नकाई माङडी, जोजन यहूदी अढिकारीयाङै सटौ रारोकौ? खिम्चिते, ईका ता खुल्लमखुल्ला छ्योङज्याया, तर नकाङ इकाजन गाएगुइ माढोरदी! नैति आका जै ख्रीस्ट ज्या ऐलेस्यु यहूदी अढिकारीयाङ मछ्यु रा:सन्दुऊ। तर जब ख्रीस्ट रंनौ, ईका रु काङन रांऔ। काङा हो ऐलेस्यु काङ्काईले मासनरडी।”
तब येशु यरुशलेम मन्दिरलं आह्युउज्याऔक, ओले बअजोरसै छ्योङौ, “जे ङाजन जेसहङचिऊ, ओटन ङा काङन ङारांङु, ना बै ऐसनच्या, ङा ङामिइ इच्छ्याले ङारांन्या माङडी, तर जोले ङाजन आपरिङ्ङु ओ सत्य लेया। जे ओजन माशईचिदी, तर ङा बौजन ऐशईङा, दानाङभन्या ङा आल्योङन ङारांङु, ओटन ओइले ङाजन आपरिङ्ङु।” आवाए छ्योङापाइना नकाङै येशुजन कोलोकौ रारोकौ, तर काङ्काईले आयर्त कुई माझोअदुरा, दानाङभन्या ओलं समाय अझ रा:स्युमालेऊ। तर हुलला भ्याई रुयाङै ओजन बिस्वास रांढोव। नकाङै ऐलेवाङ, “जब ख्रीस्ट रां, तब ओले इकाले आढान्या अचम्मला कामतन भ्याई अचम्मला काम ढोवाहोला का?”
येशुजन कोलोकौ नाल्ट सिपाइयाङजन रापरिङवाङ
हुलले येशुल बारेल चर्चा राढाज्यान्या फरिसीयाङै राथटौ। तब मुख्या पुजाउरोयाङ सनर फरिसीयाङै ओलजन कोलोकौ नाल्ट सिपाइयाङजन रापरिङवाङ। येशुले नकाङजन ऐआढोवाङ, “अझ तचिइ छिन्ङ समन ङा जेस लिज्याङा, ओलं छिन्ट ङा ङाजन परिङन्या ल्योङ हिन्ङा। जे ङाजन रोअन्या लेच्या, तर माडोटङचिदी, ओटन जोङ ङा लेङ, ओङ जे रांऔ माढुदुचिदी।”
तब यहूदी अढिकारीयाङै रारांल ऐलेवाङ, “ईका काङ हिनन्या आन्तिज्याऔ, ओटन गे आकाजन गेमाडोएयिउ? सन् आका ग्रीकयाङल5 सहरल तत्तर-बित्तर ताइस्यु चुङज्यान्या यहूदीयाङ ल्योङ हिनस्यु ग्रीकयाङजन ह्युउकौ रोअज्याऔ? आकाले आछ्योङन्या ईका नैति रैस? ‘जे ङाजन रोअच्या तर माडोएचिदी, ओटन ङा जोङ लेङ जे ओङ रांऔ माढुदुचिदी?’”
जिबन यांन्या रील मुल
आब पर्बल छिन्का छिम्क, अथाबा पर्बल मुख्या दिन छिम्क, च्याङस्यु येशुले घिन्या ग़ाले ऐआढोवाङ, “यदि जो ओ ना ङाल्योङ ग्यारांत्या ओटन ग्याओवत्या।6 जोले ङाजन बिस्वास ढोव, पबित्रशास्त्रले आपानन्या अनुसार ‘नकाल यिङलन जिङदा रील भईयाङ बगिस्यु पलिईन्या लेरा।’”7 तर ईका छेन येशुले पबित्र आत्माल बारेल आपानौ, जो पबित्र आत्मा यर्त बिस्वास ढान्याङै डोएङा लिज्यावाङ। दानाङभन्या पबित्र आत्मा आकअ समन यांस्यु माल्सिदी, दानाङभन्या येशु नाबेला समन महिमालं नाल्ट माछेन्सिऊ।
रुयाङ खार्ल यिसीइ
ईका छेन थएन्या काङ्का-काङ्का रुयाङै ऐलेवाङ, “ईका ता मछ्युकाई अगमबक्ता ज्या।”8 अपुऱ्याङै ऐलेवाङ “ईका ख्रीस्ट ज्या।” तर काङ्का-काङ्काङै ऐलेवाङ, “नैति ख्रीस्ट गालीलङन रांया का? नैति पबित्रशास्त्रले पानस्यु मालेऊ, कि ख्रीस्ट दाऊदल बङशङन सनर दाऊदलै बेथलेहेम सहरङन रांया?”9 ऐताइस्यु रुयाङ रारां येशुल कारनले भाअसिवाङ। नकाङ मध्य ख्वाएले येशुजन कोलोकौ रारोकौ, तर आयर्त काङ्काईले बै हात रांमाझोअदुऊ।
यहूदी अढिकारीयाङल अबिस्वास
तब सिपाइयाङ सनर मुख्या पुजाउरोयाङ, फरिसीयाङ ल्योङ रांवाङ। नकाङै इकाङजन ऐराढोवाङ “जे येशुजन दानाङ माहोनच्यो?” पाल्याङै जबाक रांयोव, “ईका रुले मनताइन्या ता काङ्काई रुले खकै माछ्योङदा!” फरिसीयाङै नकाङजन ऐराढोवाङ, “जेजन बै राबहकाइचिऊ सन् नैति? नैति यहूदी अढिकारीयाङ अथाबा फरिसीयाङ मध्य काङ्काङै ओजन बिस्वास ढास्यु लेवाङ? तर जोले मोशाल ब्यबस्था मासनौ, ना परमेस्वरङन स्रापित हो।”
नकाङ मध्य तोलोअ निकोदेमस मिनला फरिसी, जो हाक तपाला येशु ल्योङ रा:स्यु लेऊ, नकाले ऐलेऊ,10 “नैति गे ब्यबस्थालं हादेए रुल गवाइ नकाले नैआढोव ना माथएस्युईज, नका सजायल लायकला ठहराइवा का?” नकाङै ओजन जबाक रांयोव, “नैति नङ बै गालीलला रु हो? पबित्रशास्त्र रोअस्यु खिम्ते, ओटन नङ रङना, कि गालीलङन अगमबक्ता पलिईस्यु मारांडी।” तब सोगल रुयाङ राझिम-राझिमदेए हिन्वाङ।
Source notes (10)
- Cross-reference लेवी २३:३४; ब्यबस्था १६:१३
- Cross-reference उत्पत्ति १७:१०-१३; लेवी १२:३
- Cross-reference यहुन्ना ५:९
- Cross-reference यशैया ११:३; यहुन्ना ८:१५
- Footnote यूनानी=ग्रीक ऐढासिन्या छ्योङन्या रुयाङल भासा सनर पोल मिन
- Cross-reference लेवी २३:३६
- Cross-reference इजकिएल ४७:१; जकरिया १४:८
- Cross-reference मत्ती २१:११
- Cross-reference मीका ५:२; २शमूयल ७:१२
- Cross-reference यहुन्ना ३:१-२
Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.